Nunanut Allanut Ministeri Pituffik pillugu isumasioqatigineqassaaq

Nunanut Allanut Ministeri Pituffik pillugu isumasioqatigineqassaaq
Nunanut Allanut Ministeri Pituffik pillugu isumasioqatigineqassaaq

21.01.16

Tusagassiutitigut nalunaarut.

Maanna Aaja Chemnitz Larsenip Inuit Ataqatigiinneersup aamma Christian Juhlip Enhedslistenimeersup Nunanut Allanut ministeri venstremeersoq, Kristian Jensen, Pituffik pillugu isumasioqatiginiarlugu qaaqquaat. Tamanna Pituffimmi kiffartuussinissamut isumaqatigiissutip Danmarkimi, Kalaallit Nunaanni USA-milu piffissami sivisuumi matoqqassutigereeraallu pissaaq. Illersornissamut isumaqatigiissutaasoq naapertorlugu kiffartuussinissamut isumaqatigiissut ingerlatsiviup danskinit/kalaallinit pigineqartup pisussaavaa, taamaattorli 2014-imi amerikkarmiut piginneqatigiiffiutaannit pigineqartumit pissarsiarineqarpoq. Advokatinit misissuisitsinermi Naalakkersuisuniit suliakkiissutigineqarsimasumi, suliariumannittussarsiuussinermi piumasaqaatit pillugit kalaallinit allannguutissamut siunnersuut Nunanut Allanut Ministeriaqarfimmiit pimoorunneqarsimanngitsoq inerniliisoqarpoq.

Pisoq manna Kalaallit Nunaannut aningaasatigut annertoorujussuarmik kinguneqarpoq. Pituffimmiit isertitat akileraarutitigut- akitsuutitigullu isertitat tamakkiisut, nunattalu karsianiit 70 mill. kr. it ilanngullugit, 10%-ii tikillugu annertussuseqarput, taamaattumillu kalaallit soqutigisaasa isumagineqarnissaannut pisoq paasisaqarfigisariaqarparput. Pisaq suli naammassineqaqqajanngilaq taamaattumillu akileraarutitigut isertitatigut, suliffissatigut ilinniarfissatigullu annaasaqaatissat minnerpaaffianiitinnissaat qulakkeertariaqarparput. Peqatigitillugulu Nunanut Allanut Ministerip matumani atuuffia suli tamakkiisumik qulaarneqanngilaq, taamaattumillu ministeri isumasioqatigerusupparput”, Aaja Chemnitz Larsen isumasioqatigiinnissaq pillugu oqarpoq.

Advokatinit nalunaarummi nutaami taamaallaat Namminersorlutik Oqartussat Naalakkersuisullu atuuffii pineqarput, taamaattumillu Nunanut Allanut Ministerip atuuffigisimasaanut tunngasumik qulaarsinissaq suli amigaataavoq. Nunanut Allanut ministeriusimasoq Martin Lidegaardi (RV) paasissutissat tamaasa tunniunnissaannut piareersimasimagaluartoq, maanna nunanut allanut ministerimiit Kristian Jensenimiit (V) pisoq oqaaseqarfigineqarusunngilaq.

Soorlu Inuit Ataqatigiit taamaasiorsimasut aamma Folketingimi Enhedslistenimiit Pituffimmi kiffartuussinissamut isumaqatigiissummut atatillugu qanoq ililluni taama ajortigisumik pisoqarsinnaasimaneranut paasiniaaneq ukiuni kingullerni ingerlanneqarsimavoq.

Christian Juhlip Enhedslistenimeersup isumasioqatigiinnissaq tapersersorpaa oqarlunilu: “Misissuisitsinerup kingorna danskit ministeriata akuulernissaa iterngalu tikillugu pisami paasisaqartoqarnissaa pingaaruteqarpoq. Pisami matumani Kalaallit Nunaannut pingaaruteqaqisumi tamanik paasisaqartoqarnissaanik IA-p piumasaqaateqarnera tapersersorpara. Aningaasarpassuit pineqarput, Danmarkimilu Kalaallillu Nunaanni kukkusoqarsimannguatsiarnera ilimanaateqarpoq.”

Attavissat:

· Aaja Chemnitz Larsen (IA): +45 61 62 46 67 iml. Aaja.Larsen@ft.dk

· Christian Juhl (EL): +45 61 62 50 98 iml. Christian.Juhl@ft.dk

Isumasioqatigiisitsinermi apeqqutissat:

1. ”2013-imi pisup ingerlanerani Nunanut Allanut Ministeriaqarfiup atuuffianut iliuusaanullu ministeri nassuiaaqquneqarpoq, tassami taamani Pituffimmi kiffartuussinissamut isumaqatigiissummut atatillugu ingerlatsiviit danskinit kalaalliniillu pigineqarnissaannut piumasaqaatit allannguiffigineqarput, taamatullu piumasaqaatit suna pillugu allanngortinneqarnissaannut patsisit, piumasaqaatillu allanngortinneqarnissaannut ingerlaatsimi kikkut akuusimanerannik paasissutisseeqquneqarpoq. Tassani Pituffimmut atatillugu advokatinit nalunaarut pineqarpoq, ilaatigut ima allassimasoqarmat “Danmarkimi Nunanut Allanut ministeriaqarfik naalagaaffiup nunanut allanut politikkianut suli akisussaasuusoq, Nuummi Nunanut Allanut Pisortaqarfimmeereernermini piumasaqaatit allanngortinneqarnissaannik aalajangiivoq” (nam. nutsigaq), kiisalu piumasaqaatit allanngortinneqarnerannut kammeradvokatip allakkiaa pineqarluni.

2. Ingerlatsiviit USA-meersut ingerlatsisinnaanerisa akuersissuteqarfiginissaannut Nunanut Allanut ministeriaqarfik eqqarsaatinik tunngavigineqartunik nassuiaaqquneqarpoq, tassani kalaallit soqutigisaasa isumagineqarnissaannit Danmarkip EU-mi suliariumannittussarsiuussinernut malittarisassaasa malinnissaat soqutigineqarnerusimanersoq ilanngullugu.

3. ”Pituffimmi kiffartuussinissamut isumaqatigiissummut maanna pineqartumut atatillugu ukiup ataatsip matuma siornatigut suleqatigiissitat marluk pilersinneqarput, taakkunanilu ingerlatsiviup danskiusup kalaalliniillu pigineqartup suuneranik nassuiaqquneqarpoq, kiisalu kiffartuussinissamik isumaqatigiissutip Kalaallit Nunaannut iluaqutaanerpaaffissaanik, aammalu isertitassatigut annaasaqaatit Kalaallit Nunaannut qanoq taarserneqarnissaannut tunngasunik paasisaqquneqarlutik. Suleqatigiissitat suliaannut tunngasunik suli tusagaqanngilagut. Suleqatigiissitat suliaannut tunngasunik ministeri nassuiaaqquneqarpoq, kiisalu kalaallit soqutigisaasa siunissami qanoq qulakkeerneqarsinnaannerannut naalakkersuisut isuliuusaannik nassuiaaqquneqarluni, qanoq ililluni kiffartuussinissamut isumaqatigiissutip kalaallit/danskillu ingerlatsiviannit isumagineqarnissaanik qulakkeerinnittoqassanersoq ilanngullugu.

del på de sociale medier

Del på facebook
Del på twitter
Del på linkedin