Inuit Ataqatigiit Folketingimi ammaanersiorluni oqallinnermi immikkut ittumi peqataavoq

Aaja C Larsen
Inuit Ataqatigiit Folketingimi ammaanersiorluni oqallinnermi immikkut ittumi peqataavoq

Folketingimi ullumi ammaanersiorluni oqallittoqaqqippoq. V-LA-K suleqatigiillutik nutaamik naalakkersuisooqatigiiliornerat taamatut immikkut ittumik oqallitoqarneranut peqqutaavoq.  Naalakkersuisut nutaat atuutilernerannut atatillugu statsminister Lars Løkke Rasmussenip (V) aalajangersimavaa ammaanersornerluni oqallinneq aammaarluni ingerlanneqassasoq.

Ullumi partiinit Folketingimi issiatitalinnit statsministerip sisamanngormat nassuiaataa oqallisigineqassaaq. Inuit Ataqatigiinneersoq Aaja Chemnitz Larsen ammaanersiorluni oqallinnermi peqataassaaq, tassanilu folketingimi ilaasortamit ilaatigut naalakkersuisunngoqatigiit ingerlatsinissaminnut tunngavissiaat isumersorfigissavaa.

”Naalakkersuisunit politikkikkut angunniagassat arlalippassuit nunatsinnut tunngassuteqartut, IA-miillu sorsuutigineqarsimasut, attatiinnarneqarput. Tamakku ilagivaat suliassaqaqarfinni Danmarkimit akisussaaffigineqartuni pitsaassusermik Danmarkimi pitsaassutsimut assingusumik qulakkeerinnittoqarnissaa.

Suliassaqarfiit suli ukkatarineqarluartarineqartut ilaat tassaavoq inatsisinik atuutsitsinermut tunngasut minnerunngitsumillu eqqartuussiveqarnermut tunngasut. Uanga  naalakkersuisortaanut oqariartuutigissavara, sapiissuseqarfigisariaqaripput inatsisinik atuutsitsinermut tunngatillugu pisariaqartitsiffinni nutarsaanissaq, ilutigisaanillu pitsaasumik ingerlasut attatiinnarlutigit.

IAp politikkikkut anguniagarivaa eqqartuussiveqarfimmi illua-tungeriinnit ilinniarsimasunngorsaanissaq, aammattaarli attatiinnartariaqartoq eqqartuussisutigoortitsivigineqaraanni suliaq najukkamut qanittumi ingerlanneqassasoq. Taakku imminnut assortuuttuusariaqarnngillat, kisianni anguniagarisaqarpavut”, Aaja Chemnitz Larsen ualimut oqallinnissap aallartinnginnerani oqarpoq.

Oqallinneq toqqaannartumik ugguuna malinnaavigineqarsinnaavoq: http://www.ft.dk/webTV/Direkte.aspx

Statsministerip sisamanngormat 1. dec. 2016 Folketingimut nassuiaataa uani atuarsinnaavat:http://www.ft.dk/samling/20161/redegoerelse/r5/1695828.pdf

 

Oqaaseqaat atuaruk

del på de sociale medier

Del på facebook
Del på twitter
Del på linkedin