IA-mi siulittaasoq: Urani pillugu isumaqatigiissusiornermi Namminersorneq pillugu inatsit innarlerneqarpoq

IA-mi siulittaasoq: Urani pillugu isumaqatigiissusiornermi Namminersorneq pillugu inatsit innarlerneqarpoq
IA-mi siulittaasoq: Urani pillugu isumaqatigiissusiornermi Namminersorneq pillugu inatsit innarlerneqarpoq

Naalakkersuisut Namminersorneq akigalugu uranisiorniarput. Oqartussaaffinnik suliassaqarfinni Nunatsinnut angerlaanneqareersimasunik Danmarkimut utertitsisoqassappat Namminersorneq pillugu inatsit innarlerneqassaaq. Pisinnaatitaaffinnik piiaaneq innuttaasunik taasissutigineqaqqaarlunilu Inatsisartuni isummerfigineqaqqaartussaavoq.

Uranimik avammut nioqquteqarnissaq nakkutilliinissarlu pillugit nunatsinnit maannakkorpiaq Danmark isumaqatigiissusiorfigineqarpoq. Isumaqatigiissutit aallaavigalugit aatsitassat avammullu nioqquteqarnerup tungaasigut nunatta Danmarkimut oqatussaanerminik tunniussivoq. Taama ilinikkut uranimut aatsitassanullu allanut sakkussianut atorneqarsinnaasunut ”dual use”-mik taaneqartartunut Nunatta namminersornera akigisussaavarput. Uranisiorniarneq piinnarlugu Namminersorneq akigineqassanngilaq, taama iliorneq namminersorneq pillugu inatsimmut naleqqutinngilaq.

Isumaqatigiissutit atsiorneqartinnagit Inatsisartuni oqaluusereqqaarnissaat akuereqqaarnissaallu Inuit Ataqatigiinnit piumasaraarput. Aamma piumasaraarput innuttaasut aalajangiinermut peqataatinneqassasut. 2008-mi Namminersorneq pillugu Inatsit taasissutaammat amerlanerussuteqarluartut akuersaarput maannali namminersornermit oqartussaaffiit tigusimasatta ilaat utertinneqarnialerput, taamalu iliortoqassappat innuttaasut nutaamik taasitinneqartariaqarput

Taamatuttaaq oqartussaaffinnik utertitsinissaq pillugu apeqqummut Naalakkersuisut politikkikkut isummernissaat piumasaraarput. Tamanna tassaava Nunatsinnit piumasarineqartoq? Isumaqatigiissutit oqartussaaffitsinnik utertitsinermik kinguneqassappata uranimik aatsitassanillu allaasinnaasunik piaasinnaanermik avammullu nioqquteqarsinnaaneq namminersornerput akigalugu Nunatsinnit iliuuseqartoqassaaq. Nammineerluta oqartussaanitsinni annertuumik kinguariarnertut Naalakkersuisullu sanngiinnerannik takutitsisutut ersarissumik oqaatigisariaqarpoq.

Sunnguamilluunniit Nunatta oqartussaaffinnik tunniussinissaa sutigulluunniit peqataaffigerusunnginnatsigu Inuit Ataqatigiinnit ersarilluinnartumik oqaatigissavarput. Uranimut naaggaarnerput, taamatullu piginnaatitaaffitsinnik Nunatsinni tigoriikkatsinnik utertitseqqinnissamut akerliulluinnarnerput matumani tunngaviupput.

Sara Olsvig

Siulittaasoq, Inuit Ataqatigiit

del på de sociale medier

Del på facebook
Del på twitter
Del på linkedin