IA: Ilinniartut kalaallit politikkikkut sukaterinernik eqqornerlugaapput

IA: Ilinniartut kalaallit politikkikkut sukaterinernik eqqornerlugaapput

Inuit Ataqatigiit Folketingimi qanittumi ilinniartut kalaallit aammalu ilinniartunut siunnersortit Danmarkimi Kalaallit Illuutaaneersut Folketingimi oqaloqatigiinnissamut qaaqquai. Qaaqqusat ilinniartunut atugassarititat oqaloqatigiissutiginiarlugit naapinnginnerini AVALAK folketingimilu ilaasortaq ilinniartuunersiuteqarnikkut ajorseriaatsit pillugit Christiansborgip saavani akerliussutsimik takutitsipput. Tassani allagartarsuartigut eqqaasitsissutigineqarpoq ilinniartuunersiutitigut ajorseriaateqarnissaq inuuniarnikkut eqquinerlussasoq.

Tassani ullormi oqaloqatigiinneq siorna ukiakkut oqaloqatigiinnermut nangitsineruvoq, taamani ilinniartut pilertornerusumik ilinniakkaminnik naammassinnittarnissaat pillugu nutarterineq oqaluuserineqarluni. Maanna naalakkersuisut aamma ilinniartuunersiutit pillugit sukaterinissaminnik pilersaaruteqarput. Kalaallit ilinniartut amerlasuut politikkikkut sukaterinerit qaavisigut aamma unammilligassarivaat nunami allami allanertamik inuusaasilimmik allatullu oqaaseqarfiusumi angerlarsimaffimmit ungaseqisumi ilinniarnissartik. Folketingimi ilaasortap Aaja Chemnitz Larsenip (IA) kissaatigaa polikkikkut qulakkeerneqassasoq, ilinnniakkamik naammassiaarnerunissaq anguniarlugu nutarterisimaneq aammalu ilinniarnersiutitigut sukaterissutissatut oqariartuutigineqartut kinguneqassanngitsut taamaatiinnartartut amerleriarnerinik imaluunnit kalaallit ilinniakkamik aallartitsisartut ikileriarnerinik.

Aaja Chemnitz Larsen oqarpoq: ”Ilinniartuunersiutitigut ajorseriaatsit kalaallinik ilinniartunik eqquinerloriaannaapput. Ilinniartut assigiinngitsunik aallaaveqartiterput, ilaannullu ajornarnerusinnaavoq ilinniakkamik nammassinninnissaq ilinniartuunersiutit ilia amerlasuut attartugaatillugit, allalli nukissaqarsinnaasarput saniatigut suliffeqarnissaminnut imaluunnit ilaquttaminnit aningaasatigut ikiorserneqarnermikkut. Ataatsimut isigalugu allannguutissat pilersaarutigineqartut kingunerisaannik ilinniartut ilinniagartik naammassigunikku 250.000 kr. angullugit akiitsoqarsinnaapput, tamannalu Kalaallit Nunaanni ukiorpassuarni ilinniartitaanikkut politikkimik mumisitsineruvoq, kissaatigissagutsigu kikkut tamarmik ilinniarsinnaanermut naligiimmik periarfissaqassasut aammalu kissaatigigutsigu kalaallinik sapinngisamik amerlasuunik ilinniarluarsimasunik peqarnissarput. Naalakkersuisut aqqiissutissamik ujartuisariaqarput, ajorseriaatissat kalaallinut ilinniartunut atuutinnginniassammata.”

Oqaloqatigiinnermi Aaja Chemnitz Larsenip ernumassutigeriigai amerlasuut uppernarsarneqarput soorluttaaq unamminartunik allanik ilaneqartut. Ilaatigut naqissuserneqarpoq ilinniartunut kalaallinut paasissutissiissutiginerusariaqartoq, siusinnerusukkut inissaminnik ilinniagqarnersiutinillu qinnuteqartarnissaq, taamaalilluni Danmarkimi kalaaliulluni ilinniartutut inuunermut ikaarsaariarneq oqinneruniassammat. Aammattaaq kalaallit ilinniartut piffissaqarnerusariaqarput allatut inuusaasillit akornanni inuunissamut qallunaallu oqaasii atorlugit ilinnniartuunissamut sungiussinissaminnut. Piffissaq piareersarfiusoq, ilinniartut ilinniarnerup allartinnerani pisartunut peqataalluarnissaannik piumaffiginninneruneq kiisalu ilinniartunik siunnersortinik suleqateqarnerunissaq aaqqissutissat ilaattut taakkartorneqarput. Oqaloqatigiinnerup kingorna Naalakkersuisunut Danmarkimilu naalakkersuisunut ernumassutit matumani ersersinneqartut saqqummiunneqassapput.

Aaja Chemnitz Larsen itisiliivoq: ”Meeqqat inuusuttullu isumalluutissaraagut pingaarnerpaat, pisariaqarporlu sapinngisamik pitsaanerpaamik atugassaqartillugit inuusuttut piareersassagigut, ilinnialernissamut tunngavissarissaarlutillu piginnaaneqalerniassammata, siunisamut tamatsinnut inuiaqatigiinnullu iluaqutaasussamik.”

Oqaloqatigiinnermi peqataapput AVALAK aamma ILI ILI, Danmarkimi Kalaallit Illuutaanni ilinniartunik siunnersortit, IA Folketingimi qaaqqusisuulluni. Namminersorlutik Oqartussat aamma Ilinniartitaanermut Pisortaqarfikkoortumik sulisumik peqataatitsinissaminnut qaaqquneqaraluarput, kisianni taanna inuk ajoraluartumik peqataasinnaasimanngilaq.

Aamma takukkit assit ilanngussat, aammalu siorna oqaloqatigiinnermit taamani nutaariassatut nassiunneqartoq: http://www.iafolketingimi.dk/politisk+taleror+for+studerende+i+danmark.html

del på de sociale medier

Del på facebook
Del på twitter
Del på linkedin