fbpx

Ukiorpassuarni anaanaaqataanissamut malittarisassanut piareersarnerit unitsinneqarput

IA-mit folketingimi ilaasortaq Aaja Chemnitz Larseni maanna anaanaaqataasinnaanermut ataataassusermullu tunngasumut suliaq misissoqqeqqammerpaa, tamannalu meeqqanut inatsisinut atasuulluni. Social- aamma ældreministeriamit tusagaq qiimmaallannarpallaanngilaq; Suliaq maannanut unitsinneqarsimavoq maannakkut danskit inatsisaanni nutaanik ilaartuineq peqqutigalugu. Tamanna Folketingimi ilaasortamit Aaja Chemnitz Larsenimit akuerisassaanngitsutut taaneqarpoq. Suliap ingerlanneqarnera sivisoorujussuunikuuvoq, assullu Kalaallit Nunaanni oqariartaaseq malillugu neriusaatut ilaqutariinnut inernera isumaqartorujussuusussaalluni.

– Ministeriap qasseriarluni kinguaattuungajaannavilluni paasitittarpaatigut meeqqanut inatsit ingerlanneqarnerarlugu, tassani anaanaaqataasinnaaneq ataataassuserlu suiaassutsit assigiitsillugit ilaatigut pineqarluni. Taamatut unitsitsineq assorujussuaq pakatsinarpoq Kalaallit Nunaannilu inatsisinut pingaartitsinngippallaarnertut uanga paasivara, ilami suliaq 2016-mili aallartinneqarpoq iluatsitsissaguttalu 2023-mi naammassineqarnissaa ilimagineqassalluni, Aaja Chemnitz Larseni oqarpoq.

– Nutaanik ilaartuineq oqariartaaseq malillugu neriusaatut iluaqutariinnut pisinnaatitaaffiit tungaatigut pingaaruteqarpoq. Ullutsinni meerarsiartaarnertut ass. anaanaasumut erninngitsumut angajoqqaanngorniaraanni suliaqartoqartariaqartarpoq. Meerarsiartaarniarnermi ernereernerup kingorna qaammatit pingasut qaangiukkaangata siusinnerpaamik aallarnerneqarsinnaasarpoq, tassanilu sullissisup piffissamik atuinera aamma eqqarsaatigineqassalluni. Taamatut inissisimanermi meeqqap inuunerani ukiumi siullermi angajoqqaajusup aappaa pisinnaatitaaffeqarneq ajorpoq imaluunniit angajoqqaatut pisussaassuseqarneq ajorluni, ass. ernereernerup kingorna sulinngiffeqarsinnaanermut pisinnaatitaaffeqarneq ajorluni.

Nangitsinermi Inuit Ataqatigiit paasitinneqarput nangitsineq unitsinneqarsimasoq danskit inatsisaat suliamut tunngatillugu nutaamik ilaartorneqartussaanera peqqutigalugu. Folketingimi inatsimmut siunnersuut nutaaq novembarimi 2018-mi saqqummiunneqarnissaa ilimagineqarpoq siusinnerpaamillu 2023-mi atuutsilerneqarsinnaassasoq ilimagineqarluni. Malittarisassat marloriarlugit nutaanik ilaartorneqannginnissaat anguniarlugu Kalaallit Nunaanni meeqqanut inatsimmik suliaqaqqinniarneq inatsisit malillugit unitsinneqarsimavoq, nutaanik ilaartuiniarneq ukiorpassuit ingerlanneqareersimagaluarpoq.

– Paasilluarsinnaavara marloriarluni suliaqartoqannginnissaa anguniarneqartoq nalunagulu nutaamik ilaartuineq siunissami angajoqqaanut suiaassusermik assigiimmik suiaassusillit atugaannut iluaqutaajumaartoq. Assersuutigalugu arnat marluk kateqqasut meerartaarpata anaanaaqataaneq nammineerluni aaqqinneqartalerumaarpoq. Soorunami LGBT+-inut ilaqutariinnut suliap oqinnerusumik ingerlanissaa pissusissamisoorpoq. Danmarkimi suliap oqinnerusumik ingerlanissaa eqqartorneqarpoq, Kalaallit Nunaannili anaanaaqataanissamut pisinnaatitaaffeqannginnermut allaat tunngassuteqarluni, Aaja Chemnitz Larseni oqarpoq.

2015-imili Aaja siullermeerluni Folketingimut isermalli inatsisit sukkanerpaamik allanngortinneqarnissaannut kaammattuisarsimavoq kingornalu ass. ataatsimiititaliamut nutaamik ilaartuinerup ingerlaneranut apeqquteqarsimalluni.

– Kalaallit Nunaanni inatsip nutaap atuutilernissaanut aatsaat 2023-mi pisussaanerannut ilimasuttoqarnera assorujussuaq pakatsinarpoq, tamannalu allaat Danmarkimi inatsisitigut allannguinermik akuersinerup kingorna aatsaat atuutilersinnaalluni. Danskit inatsisaammi kinguartinneqaqqippat qanoq iliussaagut? Kalaallit LGBT+-tut angajoqqaajusut angajoqqaatut pisinnaatitaaffissaminnut suli utaqqeqqissappat?

– Apeqqutit taakku akineqartariaqarput, taamaammallu ullumikkut §20 tunngavigalugu socialministerimut apeqqutinik nassiussinikuuvunga ilumut isumaqarnersoq pissutsit taakku naleqquttuusut tusarumallugu. Suliaq malinnaavigilluarpara inerniliisoqarnissaanullu qulakkeerusullunga, ilami LBGT+-tut ilaqutariit sukkanerpaaq atorlugu angajoqqaatut pisinnaatitaaffii qulakkeerneqartariaqarmata – angajoqqaat suiaassusaat qanorluunniit ittuuneri apeqqutaatinnagit.

del på de sociale medier

Share on facebook
Share on twitter
Share on linkedin