Navigate / search

Sara Olsvigip saqqummiutissavaa nalunaarusiaq Issitumi inuiaqatigiit ineriartornerat pillugu innersuussutinik imalik

Sara Olsvigip saqqummiutissavaa nalunaarusiaq Issitumi inuiaqatigiit  ineriartornerat pillugu innersuussutinik imalik
Sara Olsvigip saqqummiutissavaa nalunaarusiaq Issitumi inuiaqatigiit ineriartornerat pillugu innersuussutinik imalik

Sapaatip akunnerani matumani pingasunngorpat Issittup inatsisartuisa isumasio-qatigiinnissarsuat aallartissaaq. Isumasioqatigiinneq ingerlanneqassaaq Islandimi illoqarfimmi Akureyri-mi, tallimanngornerlu ilanngullugu sivisussuseqassalluni. Tassani Sara Olsvigimit (IA) nalunaarusiaq Issittumi inuiaqatigiit ineriartornerat pillugu inunnik qitiutitsilluni innersuussutitalik saqqummiunneqassaaq. Oqaluuserisassanut aamma ilaapput Issittumi naalakkersuinikkut ingerlatseriaaseq aammalu Issittumi aningaasaqarniarnikkut periarfissat

 

Issittup inatsisartuinik ataavartumik ataatsimiititaliap (SCPAR) ataatsimiittarnermi nalinginnaasut saniatigut ukiut allortarlugit isumasioqatigiinnermik annertuumik aaqqissuussaqartarpoq. Isumasioqatigiiinnermi suliarineqartarput innersuussutit assigiinngitsut Issittumi naalakkersuisunut Issittumilu Siunnersuisoqatigiinnut, tassunga ataatsimiititaliaq alaatsinaattutut inissisimavoq, ingerlateqqitassat.

 

Isumasioqatiginnissap tungaanut Sara Olsvig sammisamut inuiqatigiit ineriartornerat inuk qitiutillugu (human development) nalunaarusiortuusimavoq. Inatsisartunut ilaasortat allat marluk nalunaarusiortuuffigisimavaat Issittumi naalakkersuinikkut ingerlatseriaaseq aamma Issittumi aningaasaqarniarnikkut periarfissat, nalunaarusiallu taakku pingasut tamarmik isumasioqatigiinnermi saqqummiunneqartussaapput.

 

”Sammisamut nalunaarusiortuunera iluarilluarnikooqaara. Innersuussutissatut siunersuutikka junimi Nuummi ataatsimiinnitsinni tigulluarneqarput. Maanna nalunaarusiaq innersuussutinik assigiinngitsunik itisileriffiusoq naammassisimalerpara, qilanaaraaralu taakku pillugit tallimanngorpat paasisimasallit akornanni oqallinnissaq”, Sara Olsvig oqarpoq.

 

Inuk qitutillugu inuiaqatigiit ineriartornerat pillugu nalunaarusiaq Issittumi naalakkersui-sunut amerlasuunik innersuussutitaqarpoq. Innersuussutit ilaatigut ilagivaat, inuit Issittu-miittut Issittumi ineriartornermut qitutinneqassasut, Issittumi nunat killeqarfii akimorlugit ilisimasanik avitseqatigiillunilu katersinissaq ajornannginnerulersinneqassasoq, najukkami aamma qangaaniilli ilisimasat Issittumi ilisimatusarnermi akuutinneqartuassasut, ilisimasat Issittumi katersorneqartut aamma Issittumut iluaqutissanngortinneqartassasut, aammalu tarnikkut peqqissuseq, pinaveersaartitsineq inuussutissanillu isumannaallisaaneq pingaartitatut inissisimatinneqarnerat ingerlaannassasoq.

 

”Nunat allat Issittumik soqutiginninnerata annertusiartuinnarnera ilutigalugu pingaarneruleriartuinnarpoq, uagut nunani issittumiittuusugut nammineerluta Issittumi ineriartorneq pillugu tunngavissanik malittarisassanillu pilersitsisarnissarput. Tamatumanilu pingaarluinnarpoq, inuit Issittumi najugallit naalakkersuinikkut ingerlatsinermi ineriartornermilu qitiusutut inissinneqarnissaat. Taamaattumik nuannarutigeqaara, uagut Issittumi inatsisartut a-taatsimiititaliaanni akunnitsinni pissutsit tamakku samminiarlugit aalajangersimagatta”, Sara Olsvig naggasiivoq.

 

Ataatsimiititaliaq aamma piffissami sivisunerusumi naluanaarusiamik suliaqarsimavoq, Issittumi naalakkersuinikkut nukittorsaanissaq aammalu Issittumi Siunnersuisoqatigiinnik nukittorsaanissaq pillugit innersuussutitalimmik.

 

”Isumasioqatigiinnermi matumani Issittumi naalakkersuinikkut ingerlatseriaaseq pillugu aammalu Issittumi Siunneruisoqatigiinnik nukittorsaanissamik siunnersuut pillugu nalunaarusiarput naammassiniartussaavarput. Qularutissaanngilaq Issittumi Siunnersuisoqatigiit nukittorsarneqartariaqartut uagullu innersuussutitsinni ilaatigut tunngavigineqarpoq, Issittumi Siunnersuisoqatigiit pillugit piffissamut sivisunerusumut isiginnittaaseqarnissaq”, Sara Olsvig (IA), Issittumi inatsisartut ataatsimiititaliaanni Folketingi sinnerlugu issiatitaaasoq oqarpoq. Innersuussutit tamarmik Issittumi naalakkersuisunut aammalu Issittumi Siunnersuisoqatigiit siutittaasoqarfiannut ingerlatinneqassapput.

 

Sara Olsvig attavigineqarsinnaavoq atorlugit sara.olsvig@ft.dk oqa. +45 33375404 iml. +299 526858

 

 

SCPAR aamma Issittumi inatsisartut isumasioqatigiinnissaat pillugit paasissutissat:

 

Naalagaaffiit issittumiittut inatsisartuinut isumasioqatigiisitsisarneq (SCPAR) ukioq allortarlugu ingerlanneqartarpoq, ukioq manna qulissaannik aaqqissuussineq Akureyri-mi ingerlanneqassalluni.

 

Naalagaaffiit issittumiittut inatsisartuinit ataavartumik ataatsimiititaliap (SCPAR) inuttarai inatsisartut, nunat issittumiittut (Canada, Danmark, Finland, Island, Norge, Rusland, Sverige, USA) inatsisartuinit kiisalu Europa-Parlamentimit toqqakkat.

 

Issittumi nunat inoqqaavisa kattuffii suleqatigiinnermi ataavartumik peqataatitaqarsinnaa-

titaapput. Naalakkersuisut aamma nunat tamalaat inatsisartuisa akornanni suleqatigiiffiit, naalagaaffiit Issittumi Siunnersuisoqatigiinni alaatsinaattutut inissisimasut kiisalu nunat tamalaat akornanni suleqatigiiffiit naleqquttut  isumasioqatigiinnermut aammalu ataatsimiititaliap ataatsimiinnerinut peqataatitaqarnissamut periarfissaqarput.

Ataatsimiititaliaq ataavartoq ukiumut 3-4-riarluni Issittumi nunani assigiinngitsuni naapit-tarpoq, pissutsit assigiinngitsut Issittumut tunngassuteqartut oqaluuserissallugit aammalu isumasioqatigiinnermi kingullermi innersuussutaasimasut piviusunngortinneqarnissaat isumaginiarlugit. Ataatsimiititaliap suliniutigisartagaasa ilagivaat imaani annaassiniarnermut upalungaarsimaneq sillimaniarnerlu, ilinniartitaaneq ilisimatusarnerlu, inuttut inuiaqatigiittullu ineriartorneq kiisalu silaannaap allanngoriartornera.

 

Ataatsimiititaliami ataatsimiinneq kingullermik pivoq Nuummi, Sara Olsvig (IA) qaaqqusisoralugu. Oqaluuserineqarput University of the Arctic-ip siulersuisuinik ataatsimeeqateqarneq aammalu Nuummi Kalaallit Nunaanni Sakkutooqarfimmik ataatsimeeqateqarneq, tassani oqallisigineqarluni Issittumi imaani sillimaniarneq.

 

Annertunerusumik paasissutissat takuneqarsinnaapput uani: http://www.arcticparl.org/

 

Print Friendly, PDF & Email