Navigate / search

Sara Olsvigi Udenrigsministerilu illugiillutik ataatsimeeqatigeeqqipput

Sara Olsvigi Udenrigsministerilu illugiillutik ataatsimeeqatigeeqqipput
Sara Olsvigi Udenrigsministerilu illugiillutik ataatsimeeqatigeeqqipput

Danskit Nunanut Allanut Naalakkersuisuat Villy Søvndal (SF) taavalu Sara Olsvig (IA) pingasunngornermi Kalaallit Nunaannut Issittumullu sammisanut tunngassutillit pillugit ataatsimeeqatigeeqqipput.

Pingasunngornermi Sara Olsvig (IA) taavalu Nunanut Allanut Naalakkersuisoq Villy Søvndal Issittumi sammisat pillugit pingajussaa ataatsimeeqatigiipput.

Sara Olsvigip Folketingimut isernermili kingorna, Naalagaaffeqatigiinnerup iluani nunap inoqqaavi pillugit kisiartaalluni kattuffiusup, taavalu Issittup Siunnersuisoqatigiianni issiatitaqartuusup, ICC-p, Siunnersuisoqatigiinni peqataaneranut taavalu FN-ip iluani suliaqartarneranut taperneqartarnissaa sulissutigisimavaa.

ICC siusinnerusukkut Udenrigsministeriaqarfimmiit FN-imi suliaqartarneranut tapiiffigitittarsimangaluarpoq, tamannali tapiisarneq 2011-mi qaangiummat taamani naalakkersuisuusimasut tapiisarneq unitsissimavaat. Tamannalu aaqqiiffigineqarnissaa IA-mit Sofia Rossen taartaaneraniilli piffissami aalajangersimasumik sulissutigineqarsimavoq.

“Isumaqarpunga pingaarutilerujussuusoq FN-imi Issittullu Siunnersuisoqatigiivini suliaqarneq Naalagaaffimmit sapinngisamik atituumik peqataaffigineqartarnissaa suleqataaffigineqartariaqartoq. Issittumi Siunnersuisoqatigiit aaqqissungaanera immikkuullarilluinnartumik iluseqarpoq, tassani naalagaaffiit taavalu ataavaartumik peqataatitat ataatsimoorlutillugit issiaqatigiittaramik.Tamanna aaqqissungaanikkut ilusaasoq Issittup Inatsisartuinik Ataavartumik Ataatsimiititaliaaniit atatiinnarneqarnissaa nukittorsarneqarnissaalu siunnersuutigisimavarput”.

Sara Olsvigip Nunanut Allanut Ministerip ataatsimeeqatiginerani ilaatigut oqaloqatigiissutigisimavaa Issittumi inuiaqatigiit pillugit misissuisarnerit pisariaqartut, tassungalu atatillugu Issittup Inatsisartuisa Ataatsimiititaliaaniit nalunaarusiat marluk saqqummiunneqaqqammersut ingerlateqqissimallugit.

“Aammattaaq nuannaarutingaara Nunanut Allanut Ministerip nunatsinnut Issittumullu sammisanut tunngasutilinnik toqqarlungu isumatusaartumik illugiiulluta oqaloqatigisinnaanera tikilluaqqummagu. Sammisat taakku illugiiulluni oqaloqatigiissutiginissaat pingaaruteqaqimmat, taamaasillunilu Naalagaaffeqatigiinnerup iluani issittumut tunngassutillit suliutigineqarnera pitsaanerpaaq anguniarneqassammat” taama oqarpoq sara Olsvig.

Sara Olsvigip Nunanullu Allanut Ministerip ataatsimeeqatigiinnerat kingulliunngilaq, tassami illugiillutik ataavartumik oqaloqatigiittarneq anguniarlungu naapeqatigiittarnissaminnut isumaqatigiissuteqarput.

Print Friendly, PDF & Email