Navigate / search

Sara Olsvig unnummut Ramadani naanerani Folketingimi nerersuaaqatigiinnermi peqataassaaq

Sara Olsvig unnummut Ramadani naanerani Folketingimi nerersuaaqatigiinnermi peqataassaaq
Sara Olsvig unnummut Ramadani naanerani Folketingimi nerersuaaqatigiinnermi peqataassaaq

Ukioq manna aamma Ramadan naanerani Folketingimi nerersuaaqatigiittoqassaaq. Aggustip 17.-iani nalunaaqutaq 19.30 Folketingimi matut ammarneqassapput peqataasussanut 200-nut, kulturikkut aaqqissuussinermut muslimit upperisaminnut atatillugu nalliuttorsiutigisartagaat Ramadanen peqataaffigiartorlugu.

 

Nereqatigiinneq aaqqissorneqarpoq Folketingimi ilaasortaq Özlem Cekic Mungo Park suleqatigalugu. Nereqatigiinnermi peqataasussat makkuussapput politikerit, eqqumiitsuliortut, kulturikkut malunnaatillit,
allamik upperisallit allamillu kinaassusilinnut sinniisut

 

”Ramadani naanerani nerersuaaqatigiinnissamut peqataanissannut pissamaartorujussuuvunga. Pingaartippara amerlasuunik pissuseqarnissaq upperisaqarnissamullu pinngitsaalisaannginnermut pisinnaatitaaffik tapersersussallugu. Nerersuaaqatigiinnermut peqataaninni tamanna takutissavara” , Sara Olsvig, IA taamak oqarpoq.

Ukioq manna Ramadan naanerani nerersuaaqatigiinnermi kalaallit nunaanniik peqataasoqassaaq, Sara Olsvig aaqqissuussinermut nalunaarnikuummat.

 

Qallunaat partiianeersut sinniisut Dansk Folkeparti (DF) minillugu siornatigut aaqqissuussinermut peqataasareernikuupput. Ukioq manna naalakkersuisut arlallit ilimagineqarput peqataanissaat taamaasillutillu inuiaqatigiinni ikinnerussuseqartunut pitsaasumik nalunaarusiussallutik.

 

Tallimassaa Folketingimi Ramadani naanerani nerersuaaqatigiittoqarpoq. Ukioq mannalu Folketingip formandia Mogens Lykketoft, aaliangersimavoq pisortatigoortumik aaqqissuussineq tapersersorniarlugu nerersuaaqatigiinnermi videokkut tikilluaqqusiniarluni.

 

Partiit inuiaqatigiillu akornanni isumaqatigiinngissutaasimavoq Ramadani naanerani nerersuaaqatigiinneq Christiansborgimi aaqqissuunneqartarneranut. Akerliusut upperisarsiorneq inatsisiliornerlu avissaaqqanissaat tunngavilersuutigalugu.

 

Ramadan pillugu paasissutissat

Ramadan tassaavoq muslimit qaammat iisinnginniartarfiat, seqineq nuineraniik tarrinnissaata tungaanut iisinnginniartarlutik. Ukiut tamaasa ulloq ullunik qulinik nikisittarpaat. Ramadani aallartittarpoq qaammanniffimmi naasarlunilu qaammanniffik tulliani. Pisarneq malillugu qaammat iisinnginniarfik naggaserneqartarpoq ulluni pingasuni nuannataarnermik, Eid-imik taaneqartartumik.Ullut nuannataarfiit nereqatigiinnernernik, mamakujuttutornernik meeqqanullu tunissutissanik tunioraanernik imaqartarput. Ukioq manna aggustimi Ramadaneqassaaq.

 

 

 

Print Friendly, PDF & Email