Navigate / search

Sara Olsvig Illersornissamut Ataatsimiititaliap Kalaallit Nunaannut tikeraarneranut peqataavoq

Sara Olsvig Illersornissamut Ataatsimiititaliap  Kalaallit Nunaannut tikeraarneranut peqataavoq
Sara Olsvig Illersornissamut Ataatsimiititaliap Kalaallit Nunaannut tikeraarneranut peqataavoq

Illersornissamut Ataatsimiititaliamut ilaasortaanini aqqutigalugu Sara Olsvig piffissami 27. – 31. august 2012 Kalaallit Nunaanniissaaq. Paasisassarsiorluni angalanerup siunertaraa Issittumi illersugaanerup inissisimaffia unammilligassartaalu pillugit paasisaqarnerunissaq.

 

”Angalanissaq manna assorsuaq qilanaarinikuuara. Uannut pingaaruteqarluinnarpoq Kalaallit Nunaanni illersugaanerup immikkoortortai assigiinngitsut misigisaqarfiginissaat.Uannut pingaartuaannarpoq naqissusissallugu, illersugaanerup Kalaallit Nunaanniiinneranut soorunami tunngaviummat nunami kisimi oqartusaassuseqarnermik illersuineq aammalu Kalaallit Nunaata iluani avataanilu angallannerup sapinngisamik toqqissisimanarnerpaamik ingerlanneqarsinnaanissaa, tassungalu tunngatillugu arlalitsigut innutaasunik sullissinernik pisariaqarluinnartunik ingerlataqarput. Sakkutooqarnikkut illersornissamik annertusaaniarneq pineqanngilaq, kisiannili pineqarlutik assigiinngitsutigut upalungaarsimanianermut tunngassutillit isumagineqartariaqartut pitsanngorsaavigineqartariaqartullu”, Sara Olsvig oqarpoq.

 

Tikeraarnermi nalaani Illersornissamut Ataatsimiititaliap annerusumik tusagaqarfigissavai Issittoq pillugu illersornissamut politikkikkut unammilligassat. Takornariartaassuit uuliasiornermillu suliffissuaqarfiit uuliasiornermik ingerlataqarnerat aallaavigalugit angallannerup annertusiartuinnarnerata kingunerisussaavaa ullumikkut sullissinerit siunissami annertusiartuinnarnissaat, tamannalu Issittumut amerlanerusunik aningaasaliissuteqarnissamik pisariaqartitsissaaq. Aningaasanut inatsisissamut isumaqatigiinniarnissat sioqqullugit politikkikkut isumaqatigiissutaavoq, Illersornissaqarfik amerlanerusunik aningaasaliiffigineqassasoq, Issittumi sakkutooqarnikkut illersornissap innuttaasunillu sullissinerup tungaasigut suliassat amerliartuinnarnerat pissutigalugu.

 

”Qaammatini ukunani tulliuttuni aammalu 2014-imi illersugaaneq pillugu nutaamik isumaqatigiissusiornissaq tikitserlugu, Kalaallit Nunaanni illersugaanerup tungaatigut aningaasaqarniarnikkut pissutsit isummerfigineqartussaapput, taamaattumillu uannut ataatsimiititaliamilu ilaasortanut allanut iluaqutaassaaq pissutsit pillugit annerusumik ilisimasaqalerutta. Qaammatip matuma siusinnerusuani illersornissamut ministerimit oqaatigineqarnikuuvoq Kalaallit Nunaanni illersugaanikkut sulianut annerusumik aningaasaliissuteqarnissaq siunnersuutigissamaarini. Tamannalumi pisariaqarluinnarlunilu pingaaruteqarluinnarpoq, ilimagaaralu namminneerluta ullutsinni Kalaallit Nunaanni illersugaanerup unammilligassartaasa ilai misigisaqarfigiumaarlutigit, ukiuni kingulliunerusuni ingerlatat amerleriarsimanerannik aallaaveqartut”, Sara Olsvig oqarpoq.

 

Ataatsimiititaliap angalanermini Kalaallit Nunaannut illersornissakkut sullissiviit arlallit tikeraassamaarpaat, ilaatigut Station Nord, Mestersvig aammalu Nuummi ataatsimoorussamik Issittumi Sakkutooqarfissaq, taakkunanilu sinniisuutitat assigiinngitsut peqatigalugit Sakkutooqarnikkut Illersornissap Kalaallit Nunaanni suliassatai unammilligassaalu oqaloqatigiissutigineqartassapput

Print Friendly, PDF & Email