Navigate / search

Sara Olsvig danskillu aningaasaqarnermut naalakkersuisuat siullermeersumik oqaloqatigiipput

Sara Olsvig danskillu aningaasaqarnermut naalakkersuisuat siullermeersumik oqaloqatigiipput
Sara Olsvig danskillu aningaasaqarnermut naalakkersuisuat siullermeersumik oqaloqatigiipput

Ullumi ataasinngornermi Sara Olsvig (IA) siullermeerluni danskit aningaasaqarnermut naalakkersuisuat Bjarne Corydon (S) ataatsimeeqatigivaa. Ataatsimiinnissaq Sara Olsvig-p kissaatigisaanik isumaqatigiissutigineqarpoq. Ukiorli kingulleq septemberimi folketingimut qinigaanerminiik naalakkersuisut assigiinngitsut ataatsimeeqatigisimanerinut finansministerimik ataatsimeeqateqarnerup siunertaraa.

 

Folketingimulli qinersisoqarmat sammisat Kalaallit Nunaannut attuumassuteqartut ikinngitsut Christiansborgimi oqaluuserisassani akuusimapput. Pisortatigoortutulli  aningaasartuutissanut inatsit isumaqatigiinniarnerini  aningaasaliinissat piviusut aatsaat isumaqatiginniutaasarput. Massakkut qaammataajunnaareerpoq naalakkersuisut aningaasartuutissanut inatsit siunnersuut saqqummiunnissaanut. Naalakkersuisunut amerlanerussuteqartitseqataasutut inississimanermut tunngatillugu Sara Olsvig (IA) aningaasaqarnermut naalakkersuisoq aallarniutaasumik ataatsimeeqatigiumavaa.

 

Ataatsimeeqatigiinnermut aningaasaqarnermut inatsimmut 2013-moortumut isumaqatigiinniarnerit qanillinerat peqqutaavoq.

 

”Soorunami massakkut pissutsit allaapput IA danskit inatsisartuisa amerlanerussuteqarnerannut tunngavilersueqataammat. Taamaammat pisariaqarsimavoq aningaasaqarnermut inatsimut tunngatillugu suleriaatsinik nutaanik ujaarlernissaq. Aningaasaqarnermut naalakkersuisoq ataatsimeeqatiginera naalakkersuisut allat ataatsimeeqatigisarneri kalaallit nunaannut tunngassutilinnut  aningaasartuutissanut inatsimut tunngassuteqartunut tapertarissavaa”, Sara Olsvig oqarpoq.

 

Ilisimaneqartutut naalakkersuisut aningaasartuutissanut inatsimmut siunnersuut septemberimi saqqummiutissavaat, ilimagineqarporlu Enhedslisten partiillu talerperliit aningaasartuutissanut inatsimmit isumaqatigiinniaqatiginissaanut peqataajumaartut.

 

”Isumaqarpunga danskit naalakkersuisuisa uagut atlantikup avannaaneersugut aningaasaqarnermut inatsimmik isumaqatigiinniarnerni isiginngitsuusaaginnarsinnaanngikkaatigut, uagummi naalakkersuisuutitsinerannut amerlanerussuteqartitsisuuvugut. Taamaammat finansministerimik oqaloqatigiinnerit aallarnerpakka ilisimalluarniassammagut IA-mit ukioq manna suut pingaartinnerivut”, Sara Olsvig oqarpoq.

 

2013-mut aningaasaqarnermut inatsimmut siunnersuut naatsorsuutigineqarpoq marlunngorneq augustip 28-ni saqqummiunneqassasoq, siullermeersumik suliarineqassaaq sisamanngornermi septemberip 6-ani, aappassaanillu pingajussaanillu suliarineqassalluni ukiup naajartornerani.

 

Print Friendly, PDF & Email