Navigate / search

Sara Olsvig: Arfanniarneq pillugu nipi pitsaanerusoq

Sara Olsvig: Arfanniarneq pillugu nipi pitsaanerusoq
Sara Olsvig: Arfanniarneq pillugu nipi pitsaanerusoq

Marlunngornermi ullaap tungaa Nunat Tamalaat akornanni Arfanniarnermut Ataatsimiititaliami, IWC-mi ataatsimiinnissamut Naalagaaffeqatigiit isumaqatigiinniarnissamut pisinnaatitsinissaat pillugu Folketingip Avatangiisinut Ataatsimiititaliaata Nunanut Allanut Ministeri matoqqasumik isumasioqati-giinnermik ataatsimeeqatigaa . Kalaallit Nunaannut Ataatsimiititaliaq/Grønlandsudvalget aamma Savalimmiunut Ataatsimiititaliaq/Færøudvalget isumasioqatigiilluni ataatsimiinnermut qaaqqusaapput. Folketingimut ilaasortat Atlantikup Avannaaneersut tamarmik isumasioqatigiilluni ataatsimiinnermut peqataapput

Sara Olsvig, IA, Avatangiisinut ataatsimiititaliamut ilaasortaavoq matoqqasumillu ataatsimiinnermut peqataalluni. Ataatsimiinnermi oqaaseqaatimi ilai matumani saqqummiuppai:

”Uanga pingaartillugit oqaaseqarfigerusutakka ataatsimut isigalugu sammisanut marlunnnut tunngapput. Siullermik kissaatigaara Nunanut Allanut Ministerip erseqqinnerusumik nalunaarutigissagaa, Atlantikup Kujataani arfernut eqqissisimatitaliornissamik siunnersuut Danmarkimit qanoq isumaqarfigineqarnersoq, aammattaarlu kissaatigaara tusassallugu naalagaaffiit allat IWC’mi ataatsimiinnerni NGO’t annerusumik oqaaseqarsinnaatitaanissaannik kimigiisernernerujussuat danskit naalakersuisuisa qanoq isumaqarfigineraat”, Sara Olsvig oqarpoq.

Ukiuni kingullerni nunatsinni Naalakkersuisunit aalajangiusimaneqarluinnarnikuuvoq, pisuussutinik uumassusilinnik aqutsineq biologinit siunnersuineq tunngavigalugu ingerlanneqassasoq. Sara Olsvig isumaqarpoq, taamatut isummersimaneq pitsaasuusoq, nunanit allanit taamatuttaaq piumasaqarsinnaanerput eqqarsaatigalugu. Tamanna minnerunngitsumik tunngatinneqarpoq naalagaaffiit allat NGO’llu misigissutsinik aallaave-qarpasittumik nalunaaruteqartarnerannut, assersuutigalugu arfernik eqqissisimatitaqarfiliuussinissamik kissaateqarneq.

”Uanga biologinit siunnersuinermik tunngaveqarluni arfernik aqutsisariaqarnermik isumaqarnera saqqummiuppara. Atlantikup Kujataani arfernik eqqissisimatitaqarfiliornissamik siunnersuut taamatut biologinit ilisimatusarnernillu tunngaveqanngilaq, taamaattumillu Naalagaaffeqatigiinnit tunngaviatigut isummernersimaneq aalajangiusimaneqartariaqarpoq, taamatullu isumaqarnera erseqqilluinnartumik anippara. Iluaqutigeqaarput nammineq tunngaveqarluarnerput, silarsuarmioqatitsinnit piumaffiginninnikkutta pisuussutinik uumassusilinnik aqutsineq biologinit ilisimatusarnermillu tunnngaveqartumik ingerlanneqartariaqartoq”, Sara Olsvig oqarpoq.

IWC’ip ataatsimiinnerini NGO’t inissisimanerat aamma Folketingimi ilaasortanit Atlantikup Avannaaneersunit sammineqarpoq. IWC’p ataatsimiinnerini NGO’t angisuut annertunerusumik oqaaseqarsinnaatitaanissaannik kimigiiserneq annertuvoq, nunallu EU-mut ilaasortat amerlasuut taamatut kissaateqarneq tapersersorpaat.

”Tassunga tunngatillugu uanga pingaartippara puisit tungaasigut ullumikkut inissisimanitsinnnut sanilliussissallunga. Ersarillluinnarpoq NGO’t angisuut anguniakkaminnik saqqumilaartitsinissamut akissaqarnerungaartut uatsinnut nunatsinnilu kattuffinnnut, soorlu KNAPK-mut, sanilliullugu. Taamaattumik Nunanut Allanut Ministerimut kaammattuutigaara, NGO’t inissisimanerat IWC’mi oqallisigineqalerpat sunniuteqarnissamut periarfissaqarnikkut oqimaaqatigiissaarinissaq anguniarneqassasoq”, Sara Olsvig oqarpoq.

Naalakkersuisit nutaat partiillu tassani peqataasut siornatigut taakkunikuupput nalinginnaasumik arfanniarnermut akerliunerpaat. Taamatut isummertariaaseqarneq allanngorsimavoq. Sara Olsvig isumaqarpoq, tamanna naalakkersuisooqatigiit Naalagaaffeqatigiinnut tamarmiusunut sullissisuunerminnik akisusaassuseqarnerminnillu ilumoorussinerannut ersiutaasoq.

”Naalakkersuisut nikkinnerisa kinguninnguaniilli puisinnniarnermut arfanniarnermullu tunngasut maani suleqatigisannut saqqummiuttarpakka. Isummertaatsikkut allanngoqarsimanera ersarippoq, ilaatigut SF-imi siornatigut uumasunik illersuiniarnernermut sammisorujussuusimasumi. Assersuutigalugu sapaatip akunnera kingulleq EU-p parlamentiani arfanniarneq tusarniaassutigineqarpoq, taassumalu imaqarniliornerani takusinnaavarput, SF’ip EU-p parlamentiani ilaasortaatitaasa ilaat Kalaallit Nunaannik illersuilluni ilugersuuteqarsimasoq, tamannalu nuannaarutig eqaara”, Sara Olsvig naggasiivoq.

IWC’p ukiumoortumik ataatsimiinnera pissaaq julip 2-aniit 6-anut Panamami.

Sara Olsvig attaveqarfigineqarsinnaavoq ukunuuna: sara.olsvig@ft.dk imaluunnit tlf. +45 3337 5404

Print Friendly, PDF & Email