Navigate / search

Danskit Naalakkersuisui Naalagaaffeqatigiinnermi naligiinnissaq anguniarlugu iliuuseqarnissaminnut piumassuseqanngillat

Folketingimi ilaasortap Inuit Ataqatigiinneersup Aaja Chemnitz Larsenip biilernermut allagartanut atatillugu pissutsit killersuutaasut atorunnaarnissaat sulissutigisimavaa. Pingaartumik kalaallit Danmarkimiittut eqqarsaatigalugit taamaasiorpoq, soorlumi savalimmiormiut taamaassinnaatitaasut kalaallit biilernermut allagartaminnik danskit biilernermut allagartaannut allanngortitsisinnaanerat pillugu.

Septembarip aallaqqaataani biilernermut allagartat pillugit nalunaarut nutaaq atuutilerpoq, tassanilu biilernermut ilinniartitsisumit akunnerni marlunni ilinniartinneqarsimanermut uppernarsaasinnaagaanni kalaallit biilernermut allagartaat Danmarkimi atorneqarsinnaasunngortinneqarput. Danskit Naalakkersuisui naapertorlugit kalaallit biilernermut allagartaat danskit allagartaannut naligiisinneqarpoq. Folketingimili ilaasortap isaanit isigalugu aaqqiineq tamanna oqinaarneqarpallaarujussuarpoq: 

”Kalaallit biilernermut allagartaasa taamatut aaqqinneqarnerat aaqqiigallarnerinnaavoq naligiittullu inissisimanissamik qulakkeerisuunani. Qularutissaanngitsumik kalaallit Danmarkimiittut tassa biilersinnaanerulerput, piginnaatitaaffiilli eqqarsaatigalugit savalimmiormituulli naligiissumik inissiisoqanngilaq. Savalimmiormiut Danmarkimiittut biilernermut allagartatik biilernermut ilinniartinneqaqqaanngikkaluarlutik misilitseqqaanngikkaluarlutillu danskit allagartaannik taarsertissinnaavaat. Sooq assigiinngisitsineq tamanna pissava? Tamanna unitsinneqartariaqartoq isumaqarpunga.” Aaja Chemnitz Larsen oqarpoq.

Tamanna tunngavigalugu Inuit Ataqatigiit folketingimi ilaasortaatitaata angallannermut ministeri apeqquteqarfigisimavaa, taannalu Naalagaaffeqatigiinnerup iluani assigiinngisitsineq pillugu nassuiaateqassaaq.


Kalaallit biilernermut allagartaat danskit allagartaannik taarserneqassappat biilernermut misilitsinneq peqqaartussaavoq, kalaallilli biilernermut allagartaannik ullut 90-it sinnerlugit Danmarkimi atuiniaraanni biilernermik ilinniartitsisumit illoqarfinni, nunaannarmi motorvejikkullu angalanissamut akunnerni marlunni ilinniartinneqaqqaassalluni.

Apeqqutinut linkit:

https://www.ft.dk/samling/20182/almdel/GRU/spm/33/2073147.pdf
https://www.ft.dk/samling/20182/almdel/GRU/spm/34/2073148.pdf
https://www.ft.dk/samling/20182/almdel/GRU/spm/35/2073149.pdf
https://www.ft.dk/samling/20182/almdel/GRU/spm/36/2073150.pdf

Attavissaq:
Aaja Chemnitz Larsen, tlf. 6162 4667



Print Friendly, PDF & Email