Navigate / search

OQALLISSAARUT

Asseq: Inuit Ataqatigiit Folketingimi

18.09.2019

Siullermik Altingip suliffeqarfinnut isaaffiannit saqqummerpoq marlunngorneq 24.09.2019.

Kalaallit Danmarkimiittut amerlanerit sulisartoqarnermi sulilernissaat ataatsimut akisussaaffigissavarput

Aaja Chemnitz Larsenimit folketingimi ilaasortamit aamma Morten D. Skovlundimit Vejle Byråd-imi ilaasortamit allataq

Ungasinngitsumi danskit naalakkersuisui ajunngitsumik nutaamillu sulisartoqarnerup iluani suliniuteqalissapput. Suliassaq Inuit Ataqatigiinnit sivisuumik sulissutigineqareerpoq. Kalaallinut isumanik pigiliutiinnakkanik akiuiniarneq pisariaqarpoq kalaallillu amerlanerit suliffeqarfinnut sulilertarnissaat toraagaralugu ikiuisariaqarluta.

Sulerusussuseq annertugaluaqisoq taamaallat kalaallit Danmarkimiittut 33%-ii sulisartuupput danskinullu sanilliullugit innuttaasut 75%-ii sulisarlutik. Nikingassut taanna takunngitsuusaaginnarsinnaanngilarput iluuseqarfigisariaqarlugulu. 

Suliassarli taanna kisitta sulissutigisinnaanngilarput danskillu kommuniannut piareersaatitut sammisassanut aningaasanik qinnuteqartoqarnissaa piumanikuuarput taamaalilluta kalaallit Danmarkimi innuttaasut amerlanerit sulilersinniassagatsigit. Tamakku saniatigut sulisitsisunik inunnut Kalaallit Nunaanneersunut ammasunik pisariaqartitsivugut tunniussassaqartaqimmata. 

Ilinniaqqinnerit, suliffiit annikitsut isumaqarluartulli ataatsimullu isigalugu kalaallinik sulilersitsinissamut ammasuuneq ineriartornermut nuanniitsumut unitsitsisinnaapput. Tamatta akisussaaqataavugut. 

Inuit ilaasa nerisassiornerup iluani suliffiit atorluarsinnaavaat ilaasalu suliffeqarfiit nunanut assigiinngitsunut atassuteqartut atorluarsinnaallugit. Sulisut pikkorissut amerlasuut Kalaallit Nunaanneersut atugarissaarnissamut tunngasunut suliffeqarfinni sulilersinnaapput assersuutigalugulu kalaallinik atugarliortunik utoqqarnillu sullissisinnaallutik. 

Arlallit Kalaallit Nunaanni ukiorpassuit sulisuusareerlutik Danmarkimut nuuttarput ilaalu Danmarkimut pissutsinut nuuttariaannaanngitsunik suliaqartarnikuullutik. Uagulli isumaqarpugut Danmarkimit sulisitsisunit ammanermik takutitsisoqartillugu ajunngitsumik inerniliisoqarsinnaasartoq.

Kalaallit Danmarkimiittut amerlanerujussuit ingerlalluartuupput taamaammallu sulisartunut nassuiaasiornerni ikittuuneri ernumalersitsipput. Isumat pigiliutiinnakkat Kalaallit Nunaannullu nutaaliaanerusumik ilisimasaqannginnerit arlalinnut sulilinngitsoortitsisoqarsinnaaneri ernumassutigaagut. 

Kalaallit ilinniagartuut ingerlalluarput. Ingerlalluartorujussuupput. Amerlasuut naluaat, kisianni ilinniagartuut tamangajammik suliffeqarput Danmarkimullu sanilliutissagaanni kalaallit ilinniagartuut amerlanerit danskinit ilinniagartuunit sulisartuullutillu suliffeqarlutik.

Ataatsimoorluta allannguisinnaavugut. 

Attavissat:

Inuit Ataqatigiinnit Folketingimi ilaasortaq, Aaja Chemnitz Larsen, Aaja.Larsen@ft.dk

Vejle Byråd-imi ilaasortaq Socialdemokratiet-imeersoq, Morten D. Skovlund, modks@vejle.dk

Print Friendly, PDF & Email