Navigate / search

Nunat isittut inatsisartui sapaatip akunnerani uani Nuummi ataatsimiipput, Sara Olsvig qaaqqusisoralugu

Nunat isittut inatsisartui sapaatip akunnerani uani Nuummi ataatsimiipput, Sara Olsvig qaaqqusisoralugu
Nunat isittut inatsisartui sapaatip akunnerani uani Nuummi ataatsimiipput, Sara Olsvig qaaqqusisoralugu

Nunat issittut inatsisartuisa ataatsimiititaliaat 4. – 6. juni Nuummi ataatsimiipput, Folketingimit sinniisuutitatut ilaasortap Sara Olsvigip, IA-p Folketingimut ilaasortaatitaata qaaqqusinerata kingunerisaanik.

Issittumeersut Kalaallit Nunaanni ataatsimiinneranni oqaluuserisassatut ilanngunneqarsimasut ilagivaat Issittumi ataatsimiititaliap Issittumilu ilisimatuarfiup, University of the Arctic (U-Arctic) ataatsimeeqatigiinnissaat, Kalaallit Nunaata Universitetiani, Ilisimatusarfimmi ingerlanneqartussaq.

Nunat issittuni ataatsimiititaliamut ilaasortat aamma ataatsimeeqatigissavaat Kalaallit Nunaanni Sakkutooqarfiup Nuummi allaffeqarfia, paasisaqarfigerusullugit Issittumi Sakutoo-qarfimmik pilersitsiniarneq aammalu Atlantikup Avannaani imarsiornermi sillimaniarnerup tungaatigut suliniuteqarneq sumut killinnersut. Kalaallit Nunaata imartai annertuneruartuinnartumik umiarsuarnit angallavigineqarput, ilaatigut takornariartaassuarnit.

Sara Olsvig ataatsimiititaliap tikeraarnera pillugu imatut oqaseqarpoq: ”Nuannaarutigaara Nunat issittut inatsisartuinut ataatsimiititaliaq Nuummut tikilluaqqusinnaagakku, tamaanilu Kalaallit Nunarput, Namminersorluni Oqartussaanermik aaqqissuussineq aammalu politikkikkut unammilligassat sulissutigisavut ilisaritinneqassapput. Aamma periarfissaqassaagut Issittumi Sakkutooqarfik imarsiornermi sillimaniarneq pillugu oqalliseqatigissallugu, suliassaq Kalaallit Nunaanuinnaanngitsoq aammalu Issittumut tamarmut pingaarutilik. Pingaartuuvoq Issittumi naalagaaffiit imarsionermi sillimaniarnerup pitsanngorsarnissaanut suleqatigiinnissaat ”.

Imarsiornermi sillimaniarneq Sara Olsvigip qallunaat inatsisartuini sulinermini pingaartitaralugu suliniutaasa ilagivaat.

Nunat issittut inatsisartuisa ataatsimiititaliaanut sinniisuutitaqarput USA, Rusland, Canada, Island, Norge, Sverige, Finland aamma Europaparlamenti, kiisalu alaatsinaattutut issiasuullutik saamit parlamentiat, Nunat Avannarliit Siunnersuisoqatigiivi aamma Nunat Avannarliit Killiit Siunnersuisoqatigiiffiat.

Ataatsimiititaliap Nuummi ataatsimiinneranut aamma peqataassaaq Norgip inatsisartuini Stortingip inatsisartuini Issittoq pillugu ataatsimiititaliaq.

Annerusumik paasissutissanut: sara.olsvig@ft.dk imaluunnit tlf. +299 526858

Nunat issittut inatsisartuisa ataatsimiititaliaat pillugu paasisutissat amerlanerusut uani atuarneqarsinnaapput: http://www.arcticparl.org/

Print Friendly, PDF & Email