fbpx

Nunasinissamut qinnuteqarsimallutik itigartinneqarsimasut inissinnissaannut naaggaarpugut

Oqallissaarut, Folketingimi ilaasortaq Aaja Chemnitz Larsen

Danskit naalakkersuisuinit paasinninnermut allakkami allaqqavoq naligiimmik, nuannersumik pitsanngoriartortuartumillu peqatigiinnissaq Naalagaaffeqatigiinnermit kissaatigineqartoq. Taakku saniatigut Naalagaaffeqatigiinneq tatiginninnermit illugiissitamillu ataqqinninnermik tunngaveqarnissaa allaaserineqarsimalluni. Oqaatsit taakku uteqattaarneqartarput ataatsimullu isigalugu illorsuarmi maani malinneqarluartarlutik.

Taamaammat Dansk Folkepartimit aaliangiinissamut siunnersuummi Kalaallit Nunaanni nunasinissamut qinnuteqarsimallutik itigartinneqarsimasunut inissiivimmik pilersitsinissamut imaqartumut assorujussuaq ugguaammerpunga. DF-imit ataatsimut isigalugu kinguneqartussamik isumaliornermik annertusiartortumik takusaqartaraluarpunga, ilaatigut partiip Kalaallit Nunaanut tunngatillugu oqaaseqartittakkap Søren Espersenip oqaloqatiginerani taamatut misigisarsimallunga.

Inuit Ataqatigiit taamatut Danmarkimi unammillernartunik nalaataqarnermi Kalaallit Nunaannik atorluaarusulerneq akuerisinnaanngilaat. Maanngaannit naaggaarpugut – ersarissumik naaggaarpugut, naaggaarnitsinnullu peqqutit arlaqarput.

Siullermik Danmarkimi nunanit allaneersut tungaatigut danskit akisussaasuuneri erseqqissarneqartariaqarpoq, namminerlu unammillernartunut inerniliinissaq eqqaaneqartariaqarluni. Taamaaliornermi Kalaallit Nunaanni nunasinissamut qinnuteqarsimallutik itigartinneqarsimasunik inissiisoqassanngilaq. Taamatut Kalaallit Nunaannut avinngarusimaqisumut isseqisumullu inissiiniarnermi inuit pisinnaatitaaffiinut tunngatillugu unammillernartutut oqallisigineqarsinnaavoq. Uanga eqqaasinnaavara qanoq Kalaallit Nunaanni nunasinissamut qinnuteqarsimallutik itigartinneqarsimasunut ilassinninnissatsinnut piareeqqanngitsiginerput immaqaluunniit qanoq qimaasunut qinnuteqarnermi akuerineqarsimanngitsunut ilassinninnissamut paasisimannissimanermik amigaateqartiginersugut, allaammi qimaasut eqimattat qanorpiaq isumagissanerlugit tunngavissaqarnata. Kingullertut eqqaarusuppara uagut nammineerluta Kalaallit Nunaanni unammillernartut siulliullugit pingaartinnerullugillu aaqqitassagut aaqqittussaagatsigit.

 

Qimaasut qinnuteqareernermi kingorna akuerineqarsimanngitsut Danmarkimilu inissisimasut nammineerlutik aamma inuunerminni artorsaaterpassuaqartarput. Eqimattat taamak ittut sullinniaraanni immikkut ilisimasaqarnissaq toqqissisimasumillu sinaakkusiinissaq pisariaqarluinnarpoq. Suliassaq taanna Danmarkimiippoq Kalaallit Nunaannilu inernilerneqartussaanani.

Oqallinneq silatusaartumik ingerlanneqanngitsoq Kalaallit Nunaata Danmarkillu ataqatigiinnerannut ajoqutaasinnaavoq

DF-imit Kalaallit Nunaanni nunasinissamut qinnuteqarsimallutik itigartitaasimasunut inissiivimmik pilersitserusunnermik isummertoqaqqaarmat Rasmus Stoklundimit, socialdemokratiet-imit nunanut allamiunut peqataatitsinissamullu oqaaseqartittakkamit “pilerinartutut” taaneqarpoq. Taamatut pisoqarmat assorujussuaq uissuummivunga. Uanga isumaqanngilluinnarpunga isumassarsiaq taanna pilerinartuusoq isumaqarnangalu siunnersuut tatiginninnermut illugiissitamillu ataqqinninnermut tunngassuteqartoq. Taamaammat nunanut allanut- peqataatitsinissamullu oqaaseqartittakkamut danskit naalakkersuisuisa politikkikkut najoqqutassaannut tulluarnersoq aperaara. Akissutaa – ilimagisattut – naaggaarneruvoq. Soorlu aamma maanngaannit ersarissumik naaggaartugut.

Danskit naalakkersuisui Kalaallit Nunaanni nunasinissamut qinnuteqarsimasunut itigartitaasimasunut inissiisoqassanersoq apeqquseerusussimanngillat Kalaallit Nunaannilu Namminersorlutik Oqartussanut taamaaliorusunnatik, siunnersuullu taanna danskit naalakkersuisuinit aamma tapersersorneqarsimanngilaq.

Uagut – tassa Kalaallit Nunaannit politikerit Kalaallit Nunaannilu inuiaqatigiit tamatta – DF-imit politikkikkut sammisamut danskit naalakkersuisuinut pisariaqanngitsumik susassarineqaleraluarpugut. Uanga isumaqarpunga politikkikkut angorusutat anguniaannarlugit uagutsinnik atorluaarusunneri ataqqinninnginnerusuusoq.

Kalaallit Nunaat nunaanngilaq Danmarkip piumallerlunilu atugassarisaa, tamannalu Dansk Folkepartimit nalunnginneqarluarpoq. Taamaaliornermi ataqqeqatigiinneq suleqatigiinnissarlu ajornakusuulertarpoq, arlaqaraluarpugummi suleqatigiinnermik piffissamut naleqquttumik, naligiimmik tamanullu iluaqutaasussamik suliniuteqartuusugut, taamatulli pisoqarnerani ataqatigiinnerput nungullarneqartarpoq.

Maanngaannit Kalaallit Nunaanni nunasinissamut qinnuteqarsimallutik itigartitaasimasunut inissiivimmik pilersitsiumaneq ersarissumik naaggaarfigaarput.

del på de sociale medier

Share on facebook
Share on twitter
Share on linkedin