Nakuusernernut tunngatillugu nassuillinerni videukkut nakkutiginninneq iluaqutaassaaq

Mimi Karlsenimit, Inatsisartunut qineqqusaartumit aamma Aaja Chemnitz Larsenimit, Folketingimi ilaasortamit allataq, Inuit Ataqatigiit

Nakuusernernut tunngatillugu kisitsisit ukiut marluk ingerlaneranni marloriaammik amerleriarnikuupput 2020-milu amerlanerpaaffissaminni 1.394-inik nakuusernermut unnerluussisoqarsimalluni. Tamanna Mimi Karlsenip (IA) Inatsisartunut qineqqusaaqqittup Folketingimilu ilaasortap (IA) Aaja Chemnitz Larsenip ernumassutigaat, marluullutillu nakuusernermut tunngatillugu suliniutinik allanik pilersitsinissamut siunnersuipput. IA-mi politikerit nakkutiginninnermut atuinerup misissorneqarnissaa unnersuussutigaat – aqqusiniinnarmi nakuusertoqartarneranut inerniliinissamut tapiissutissatut isigalugu.

”Nakuusernerit amerlanerit imigassamit tunngaveqartarput, taamaammallu nakuusernerup pitsaaliuiffiginissaanut imigassamik atuinermut misissuinissaq pisariaqassalluni. Kingullertigulli takunikuuarput illoqarfinni inunnik arlalinnik ujaasisoqartartoq taamaattoqartillugulu videukkut nakkutilliinerit politiit paasiniaanerannut iluaqutaasinnaapput. Nakuusernermut pitsaaliuineq imaaliallaannaq inerniliiffigineqarsinnaanngilaq, uangali videukkut nakkutilliinerup toqqissisimanermik annertunerusumik tunisisinnaanissaa ilimagaara, tamattami toqqissisimalluta aneersinnaasariaqarpugut”, Mimi Karlseni, Inatsisartunut qineqqusaartoq, Inuit Ataqatigiinneersoq, oqarpoq.

”Videukkut nakkutilliineq aqqusinermi nakuusernernut pitsaaliuinermut iluaqutaasinnaavoq, pingaartumillu politiit nakuusernermut tunngatillugu nalunarunnaarsitsinissaat sukkanerusumik ingerlanneqarsinnaalissallutik. Ukiut marluk ingerlaneranni nakuusernermut unnerluutiginninnerit marloriaammik amerlinerisa takutippaat suliniutinik allanik pilersitsisariaqalersugut. Paasisinnaavara innuttaasutut nakkutigineqarnissamut annilaangasoqarsinnaasoq, paasisinnaavarali aamma videukkut nakkutilliineq toqqissisimanermik pilersitsisinnaasoq. Nakuusernermut eqqugaasunut uppernarsaatinik amigaateqartunut pingaaruteqarsinnaavoq suliap sukkanerusumik erseqqissarneqarnissaanik inerneqarsinnaammat”, Aaja Chemnitz Larseni, Folketingimi ilaasortaq, Inuit Ataqatigiinneersoq, oqarpoq.

Aaja Chemnitz Larseni Folketingimi Kunngikkormiuni Peqqussummi videukkut nakkutiginninnermut tunngatillugu atortuulersitsinissamut apeqquteqarsimavoq, uanilu takuneqarsinnaavoq: https://www.ft.dk/samling/20201/almdel/GRU/spm/66/2342758.pdf

 

 

del på de sociale medier

Share on facebook
Share on twitter
Share on linkedin