Naammaleqaaq! Isertitsivinni politiinut akissarsiat tunniunniarsigit

Apriilimi politikkikkut isumaqatigiissut naammassineqarpoq tassanilu 38,4 mio. koruunit isertitsivinni politiit akissarsiaannut qaffaanissamut ukiuni 2020-imit 2023-imut atugassatut qulakkeerneqarlutik. Isumaqatigiinniarnerit taassumap kingorna faginut peqatigiiffinnut ingerlanneqaqqipput juulillu aallartinnerani isumaqatigiipput annikitsorsiornertaalu inissitsiterlugit. Inuit Ataqatigiit Folketingimeersut sommerferiap ingerlanerani tuavisaarisarnikuupput – maannali qaammatit pingajussaanni oqartussaasuni akuersisussani suliaq uninngaannarluni.

”Assut pakatsinarpoq. Politikkikkut isertitsivinnut politiinut akissarsianik isumaqatigiinniarnerit naammassigatsigit apriilimi fagit peqatigiiffiit tiguaat. Isumaqatigiinniarneri qangali naammassereerput isertitsivinnili politiit akissarsiami allagartaanni allanngortoqarnermik suli takusaqarsinnaanngillat. Tamanna assut pakatsinarpoq oqartariaqarpungalu suliap taamak sivisutigisumik ingerlanneqarnera naammaginngilluinnarlugu”, folketingimi ilaasortaq Aaja Chemnitz Larseni (IA) oqarpoq.

Inuit Ataqatigiit Folketingimi arlaleriarlutik danskit naalakkersuisui tuavisaartarsimagaluarpaat. Tamatigut paasitinneqartarsimapput Skatteministeriami isumaqatigiissutip akuerineqarnissaa utaqqineqartoq inerneralu takkutiliivinnerartarlugu:

”IA-mit isumaqatigiinniarnerni Justitsministeri Nick Hækkerup-i (S) peqatigalugu oqaluussinerni piumasaqaataanikuuvoq akissarsiat jannuaarip aallaqqaataannit 2020-imit atuutilissasut isertitsivimmi politiit suliap sussaaginnarnissaa pissagaluarpat annaasaqannginniassammata. Oqartussat aningaasanik tunniussinissaminnik pingaartitsinnginnerat ugguareqaara pingaartumik maannakkut utaqqisunut annikillisaanissamik eqqartuinerput eqqarsaatigissagutsigu – tassami akissarsianik pitsanngorsaanerit isertitsivinni ilungersornernut inernertut iluaqutaasussaammata”, folketingimi ilaasortaq Aaja Chemnitz Larseni (IA) naggasiilluni oqarpoq.

Kalaallit politiit pillugit akissarsiat eqqarsaatigissagutsigit politikkikkut isumaqatigiissut maajimi matuneqarnikuuvoq. Isumaqatigiissutip anikitsorsiornertai suli fagini peqatigiiffinni isumaqatigiissutiginiarneqarput. IA-mit suliaq taanna aamma malinnaalluarfigineqarpoq akissarsiallu qaffanneqarnissaannut assoroortoqarluni.

del på de sociale medier

Share on facebook
Share on twitter
Share on linkedin