Naalakkersuisumut Jess Svane-mut allagaq Fast-track pillugu

Folketingip ukiuata iluani Inuit Ataqatigiit Folketingimit fasttrack-imik aaqqissuussisoqarnissaanut sulissuteqarnikuuvugut – taamaaliornermi EU-mi nunanit Kalaallit Nunaannut suliartortunut eqaannerusumik najugaqarnissamut- sulinissamullu akuersissummik ingerlatsisoqartarnissaanut qulakkiisoqarniassammat. Suliaq aaliangiinermut siunnersuummik imalik unitsikkallarneqarnikuuvoq. Tamanna danskit naalakkersuisuinit Naalakkersuisunut suliassat suut ilissinnit akuerineqarneranit utaqqinermit peqquteqarpoq, taamaalillutik nunanit allanit suliartortut akuerineqarsinnaaniassammata fasttrack-imillu aaqqissuussap iluani sulilersinneqarsinnaaniassammata. Taamannak ingerlatsineq Savalimmiuni aamma ilisimaneqareerpoq.

Suliniut Kalaallit Nunaanni naammattumik piukkunnaateqartumillu sulisinnaasoqarnissaanit unamminartoqarneranit tunngaveqarpoq. Kisitsisit kingulliit 2019-imeersut takutippaat Kalaallit Nunaanni suliffeqarfiit tungaatigut ilinniarsimasunit tamanit sulisoqarsinnaanermut tunngatillugu nukingernartunik inissisimasoqartoq. Kalaallit Nunaanni inuussutissarsiornerup tungaatigut sulisussanik pisariaqartitsisorujussuuvugut killiffitsinniillu nammineerluta tamanna iliuuseqarfigisinnaanagu.

Fasttrack-imik aaqqissuisoqanngippat kalaallit suliffeqarfiisa pisiassaataat suliassaallu piviusunngortinneqarnavianngillat, ass. akunnittarfeqarnerup- sanaartornerullu iluani, tamannalu naggataatigut aningaasatigut siuariarnissaraluamik unitsitsisinnaalluni. Ullutsinni maanna qinnuteqaatinik ingerlatsinerni utaqqinerit sivisusarput.
Maanna pisumi killiffik tassaavoq danskit naalakkersuisuisa Naalakkersuisut sammisani sorlerni fasttrack-imik aaqqissuisoqassappat iluaqutaanerunissaanik nalunaarutiginninnissaannik utaqqinerat. Allagaq una tunngavigalugu sukkasuumik ersarissumillu danskit naalakkersuisuinut utertitsisoqarnissaa kissaatigaara fasttrack-imik aaqqiinissaq suli kinguarsarneqaqqinnginnissaa piniarlugu.

Qanittumi ajunngitsumik inerniliisoqarnissaa neriuutigalugu Naalakkersuisup sammisaq una pillugu oqaluukkusussagaluarpanga soorunami piareersimavunga.

del på de sociale medier

Share on facebook
Share on twitter
Share on linkedin