fbpx

Meeqqat misiliinermut ilaasut taarsiivigineqassapput

(Sermitsiami 3. september saqqummissaaq)

Inuit Ataqatigiit Folketingimi sivisuumik politikkip tungaatigut meeqqat misiliinermut ilaasimasut naapertuilluanngitsumik pineqarsimaneri ukkatarerusussimavaat. Decembarimi 2020-mi meeqqat misiliinermut ilaasimasut suli najuuttut naalagaaffimmit kiisami utoqqatsissummik tunineqarput. Inernissarli suli kingulleq inissinneqanngilaq. Godhavnimeersunik ikiuisimasup eqqartuussissuserisup maanna meeqqanut misiliinermut ilaasimasut naalagaaffimmut eqqartuussinissaannut periarfissanik misissuilerpoq. Taarsiivigineqarnissaq anguniarneqarpoq.

 

”Danskit naalakkersuisui oqaatsit piviusunngortittariaqalerpaat meeqqallu misiliinermut ilaasimasut taarsiivigalugit. Danskit naalakkersuisui utoqqatsernerminni ileqqorissaarnissamut akissaaffimmik tigusipput. Tamanna nersorluinnarpara. Aningaasatigut meeqqat misiliinermut ilaasimasut taarserneqarpata inatsisilerinerup tungaatigut aamma akisussaassusermik tigusisoqassaaq, tamannalu pissusissamisut ittutut isigaara”, Inuit Ataqatigiinnit folketingimi ilaasortaq Aaja Chemnitz Larseni oqarpoq.

”Tamanna naapertuilluarnermit naleqaqatigiinnermiillu tunngaveqarpoq. Taarsiiviginninnikkut inerniliisinnaassagatta. Tamanna meeqqanut misiliinermut ilaasimasunut naleqqulluinnarpoq. Naalagaaffik meeqqanut misiliinermut ilaasunut piorsarsimassusermik, oqaatsinik kinaassutsimillu arsaagaasimanerannut akisussaaffimmik tamakkiisumik tigusisariaqaraluarpoq. Danskit naalakkersuisui nukappiaqqanut Godhavnimeersunut akisussaaffimmik tamakkiisumik tigusipput isumaqatigiilernermilu inissinneqarsimasut 17-t immikkut 300.000 koruuninik taarsiivigineqarlutik. Pisuni meeqqat misiliinermut ilaasut aamma nukappiaqqat Godhavnimeersut naalagaaffimmit sumiginnagaanerujussuarmit pisuupput. Uanga isumaqanngilanga naalagaaffik immikkoortitsissasoq nukappiaqqallu Godhavnimeersut kisiisa taarsiivigalugit”, Aaja Chemnitz Larseni oqarpoq.

Børns Vilkårimeersut meeqqat misiliinermut ilaasimasut ikiorpaat nukappiaqqallu Godhavnimeersut aamma ikiornikuullugit. Eqqartuussissuserisup Mads Prammingip suliaq ingerlappaa nukappiaqqanullu Godhavnimeersunut aamma ikiuinikuulluni.

del på de sociale medier

Share on facebook
Share on twitter
Share on linkedin