Navigate / search

Meeqqat kinguaassiuutitigut atornerlunneqarnikunut ikiorneqalerput, Naalakkersuisulli sumiippat?

Asseq: Inuit Ataqatigiit Folketingmi

Naammaleqaaq! Oqaaseq taanna IA-mit folketingimi ilaasortamit Aaja Chemnitz Larsenimit ukiami qineqqusaarnerup iluani oqariartuutigineqartarnikuuvoq naalakkersuisunilu isumaqatigiinniarnerni tulliuttuni aamma Inuit Ataqatigiinnit (IA) Kalaallit Nunaanni meeqqanut kinguaassiuutitigut atornerluinermut tunngasut ilungersuunneqartareernikuullutik. Piviusumik eqqartussagutsigu IA-mi folketingimi ilaasortaq arlaleriarluni meeqqanut atugarliortunut katillugit 100 mio. koruuninik – danskit naalagaaffiup aningaasiviannit 80 mio. koruunit Kalaallit Nunaanniillu 20 mio. koruunit – atuisoqarnissaanik pitsanngorsaasoqartariaqarneranillu erseqqissaasarnikuuvoq. Aningaasat taakku meeqqanut inuusuttunullu kinguaassiuutitigut atornerlunneqarsimasunut ingerlanissaat erseqqissartarnikuuai. Maanna aningaasat taakku ullumikkut Danmarkimit politikkikkut isumaqatigiissuteqarnermit qulakkeerneqarput.

Sapaatip-akunneri kingulliit folketingimi partiit, ilaatigut Inuit Ataqatigiit, inooqatigiinnut tunngasunut suliniutissat isumaqatigiissutiginiarnikuuaat. Tamatigut danskit naalakkersuisuisa 80 mio. koruuninik tunisisoqarnissaa sulissutigisarsimavaat tamannalu IA-mit folketingimi ilaasortamut nuannaarutaanikuuvoq.

Aaja Chemnitz Larseni oqarpoq: “Qaammatit kingulliit amerlasuut danskit naalakkersuisuisa 80 mio. koruuninik tunniussinissaat sulissutiginikuuara Naalakkersuisullu namminneq 20 mio. koruuninik meeqqanut inuusuttunullu nunatsinni atorneqarneqarsinnaasunik atasinnaasumik siumut isiginninnermik tunuliaqutilerlutik nassaarnissaannik iliuuseqaqqusinikuullunga. Taamaammat danskit naalakkersuisuisa inooqatigiinnut isumaqatigiinniarnernut siunnersuutaat tapersersortarnikuuara maannalu 80 mio. koruunit piumasarinikuusagut tunniunneqalerlutik – tamannalu danskit naalakkersuisuinit pingaartinneqarnera nuannaarutigaara. Maanna Naalakkersuisut iliuuseqarnissaat amigaatigiinnalerparput”.

Ukiumut isumaqatigiinniarnerit aningaasanit agguagassanit annertoorsuunngitsunit ingerlanneqarnikuupput. Meeqqanut inuusuttunullu 80 mio. koruunit Kalaallit Nunaanni atorneqartussat aamma Danmarkimi utoqqarmut silakillisimasunut atorneqartussat tassaapput suliniutini aningaasanik tunisiffiunerpaani inissisimasuusut. Taamaammat isumaqatigiinniarnerni taakku akerortitsinernik annerpaanik imaqarnikuullutik.

”Suliassarput annikitsuunngilaq meeqqallu tallimaagaangatta tallimaat kinguaassiuutitigut atornerlunneqarsimasarpoq meeqqallu ilaat pingasuinnarnik ukioqarlutik kinguaassiuutitigut nappaatipilunnik tunillatsissimasarlutik. Ajornartorsiutit taakku immikkut ittumik aningaasaliiffigineqarlutillu inerniliiffigineqartariaqarput. Taamaammat meeqqanut inuusuttunullu amerlasuunut tulliani kinguaassiuutitigut atornerlunneqarnissamut qunullutik inuusunut aningaasaliinermit qulakkeerinnittoqarnera nuannaarutigisorujussuuara. Aningaasat akisussaassuseqarpaluttumik atorneqassapput siunissami meeqqat atornerlunneqarnissaat pinngitsoortinnissaanut iluaqutaaniassammata. Suliassaq taanna politikeritut sulinermi pingaarnersaavoq nuannaarutigaaralu danskit naalakkersuisuinit tapersersorneqarmat”, Aaja Chemnitz Larseni naggasiilluni oqarpoq.

Print Friendly, PDF & Email