Navigate / search

Killigititat ersarissut pissusermit killeqanngitsumit orniginarnerupput

Oqallisissiaq, allattoq Aaja Chemnitz Larsen, Folketingemi ilaasortaq, Inuit Ataqatigiit

Naalakkersuisup Martha Abelsenip Inuit Ataqatigiit Folketingimeersunit pineqaatissiinerit nunatsinni naammannersut oqallisiginissaannut kissaataat ingerlateqqissimavaa. Qujanarujussuaq. Nuannaarutigeqaara.

Maannamut nunap Eqqartuussisuuneqarfianit aamma Kalaallit Nunaata politeeqarfiannit sulisunit tusagaqarnikuuvugut. Taamaattorli innuttaasunit Inatsisartunilu inatsisinut ataatsimiititaliamit takutitsinerit sumiippat? Eqqartuussisoqarnerup tungaatigut sammisat nunatsinni eqqartorneqarnerusariaqarput, soorlu Folketingimi eqqartorneqartarnerisa annertussusaat malillugit eqqartuisoqarnerusariaqartoq.

Inunnut akuuleqqinnissaq sumi tamaani pitsanngorsartigu

Arlaliuvugut isumaqartut inunnut akuuleqqinnissaq aqqutissaasoq, inunnulli akuuleqqinnissamut suliniutit amigarpata imal. suliniuteqartoqanngippat eqqartuussisoqarnerput sanngiinnerulissaaq. Pinerluttuliornerit uteqattaartut – isertitsivinniillu iserlutillu anisartut tallimariarlutik imal. arfineq-marloriarlutik – periaaseq taanna naliginnaasuuvoq.

Taamaammat pissutsit unammillertariaqarpagut apeqqullu suut kukkussutiginerlugit akisariaqarlugu pinerluttut uteqattaartartut inuunermi pissuseriinnarneqaleraangata.

Isertitsivimmi nakkutilliisunut, inunnut isumaginnittunut assigisaannullu akissarsiagissaarnerunermik qaffasinnerusumillu ilinniaqqissinnaanermik periarfissiigitsi

Allataq sulisunik ataasiakkaanik kukkunersiuinerunngilaq. Taamaattorli uanga Pinerluttunik Isumaginnittoqarfimmi sulisut ataqqilluinnarpakka isumaqarlungalu akissarsiatigut ilinniakkallu tungaasigut atatiinnarnissaat iliuuseqarfiginerusariaqarigut. Inooqatigiit akornanni suliniutinut inunnullu akuulersitsiniarnermut sulianut allataq kukkunersiuivoq.

Toqqorsineq imaluunniit nutaamik aallartitsineq?

Politikkikkut pineqaatissiissutinik sakkortunerusunik piumasoqartillugu inunnut akuulernissamut ajunnginnerusumik kissaateqarnissaq atassuteqartartussaavoq. Pineqaatissiinerit katsorsarnertaqanngitsut, tapersersuinertaqanngitsut siunnersuinertaqanngitsullu toqqorsinerinnartut taaneqarsinnaapput.

Nuummi isertitsiviup iliusai kusagaakka eqqaamasariaqarparpulli isertitsiviit Narsamiittut, Sisimiuniittut, Tasiilamiittut Ilulissaniittullu malinnaasinnaasariaqassammata inunnullu akuulersitsineri siunissami ajunngitsunik aamma inerneqarsinnaasariaqarneri eqqaamassallugu.

Nakuusernerit innarliinerillu rekortiliiffiginikuusagut unitsissavagut

Piviusumik oqassaguma isumaqarpunga isertitsiviit aaliangersimasut marsigaasariaqartut. Pinngitsaaliilluni atoqateqarnerit, nakuusernerit innarliinerillu pingaartumik meeqqanut aamma inersimasunut uanga silarsuanni akuerisassaanngivipput. Tamakku tamarmik pinerlunnertut inunnut ulorianartutut taaneqartarput Kalaallit Nunaannilu allanut sanilliullugu 34-eriaammik annertunerusumik tamakkua pisarlutik.

Assersuusiulaassaanga eqqarsarnartitannik. Tasiilaq Kalaallit Nunaanni imal. Naalagaaffeqatigiit iluanni meeqqanut kinguaassiutitigut atornerluiffiunerpaasarpoq. Meeqqanut kinguaassiutitigut atornerluinerit affai tassani pisarput.

Meeqqanut kinguaassiutitigut atornerluinerit qaammatinik pingasunik pineqaatissinneqartarput – tamanna naammaginarpa?

Meeqqamut kinguaassiutitigut atornerluineq qaammatini pingasuni isertitsivimmiinnissamik pineqaatissinneqartarpoq. Danmarkimi assinganik iliuuseqartut ukioq ataaseq affarlu isetitsivimmiittarput. Tamanna naammagisassaanngivippoq. Nalunngilara Danmarkimut assersuuttuaannarsinnaanngitsugut, sammisamili uani assersuusiorluarsinnaasugut isumaqarpunga.

Imminortarneq pillugu pinaveersaartitsineq eqqartortarparput. Kinguaassiutitigut atornerluinerit pinaveersaartissinnaagutsigit imminortarnerit aamma pinaveersaartissinnaavagut. Tamanna qularinngilluinnarpara.

Killiliisa – ataatsimut tamatta killileeqatigiitta

 Qanoq taava iliorsinnaavunga? Eqqartuussisoqarnerup iluani unioqqutitsinerit amerlavallaat akornanni immikkut suliniuteqartoqarnissaanut aningaasanik agguagassanik tunisisoqarnissaa sulissutigisinnaavara. Politiit suliniutaannut, eqqartuussisuni sukkanerusumik sullissinernut, pinerluttuliortunit eqqugaasunut ikiuinerit ajunnginnerusunut aamma pinerluttuliornernut pinaveersaartitsinernut aningaasat amerlanerusut suliniutigerusuppakka.

Maanna Inuit Ataqatigiinnit Naalakkersuisut eqqartuussisoqarnerup iluani kinguaassiutitigut atornerluinermut pinaveersaartitsiniarlutik iliuusissaminnit immikkoortut qulinit arfinillit aallarteriinngikkunik naammassinikuunerinut qulakkeeqataanikuuvugut.

Print Friendly, PDF & Email