Navigate / search

Kalaallit Nunaanni eqqartuussiveqarnikkut pitsanngorsaatissaq pilersoq

Kalaallit Nunaanni eqqartuussiveqarnikkut pitsanngorsaatissaq pilersoq
Kalaallit Nunaanni eqqartuussiveqarnikkut pitsanngorsaatissaq pilersoq

Kalaallit Nunaanni illersuisuunertut atorfik maanna inuttassarsiuunneqartoq ukiorlu naatinnagu inuttalerneqartussanngorunartoq Inuit Ataqatigiinniit nuannaarutigalutigu paasivarput. Taamatummi pisoqarnissaa Inuit Ataqatigiit Folketingimit sivisuumik sulissutigineqarsimavoq.

”Nuna tamakkerlugu illersuisuunertut atorfiup piviusunngulernera nuannaarutigaarput. Tamanna IA-miit 2010-miilli sulissutigisimavarput, uangalu nammineerlunga Folketingimulli qinigaagama tamanna pingaarnertut suliniutigisimavara. Maannalu piviusunngulerpoq.” IA-meersoq Aaja Chemnitz Larsen atorfik nutaaq pillugu oqarpoq. Imatullu itisiliivoq: ”Nuna tamakkerlugu illersuisuunermik atorfinitsitsinikkut Kalaallit Nunaanni inatsisitigut isumannaatsuuneq nukittorsarneqassaaq, taamaasiornikkummi illersuisutut akuerisatut atuuttut, taamatullu inatsiseqarnikkut tunngasut piginnaassutsikkut pitsanngorsaavigineqassapput. Tamannalu eqqartuussisoqarnerup iluani piginnaasat aallunneqarnerulernissaannut alloriarneruvoq pisariaqartoq. ”

Nuna tamakkerlugu illersuisuuneq Kalaallit Nunaanni illersuisut ilinniartinneqarnissaannik ilinniaqqitsinneqarnissaannillu isumaginnissaaq. Kalaallit Nunaanni illersuisuunermik atorfinitsitsinikkut eqqartuussiveqarneq pitsanngorsaavigineqassaaq inatsisitigullu isumannaatsuunissaq annertusarneqassalluni.

Taamatuttaaq Nuna tamakkerlugu illersuisuunertut atorfeqartitsineq pissusissamisoortumik Kalaallit Nunaanni inatsiseqarnikkut pikkorissutsimik annertusaaqataassaaq.

Kalaallit Nunaanni inatsiseqarnermut tunngasut danskiniit akisussaaffigineqarput, maannalu ukiorpaalunngortuni Folketingimi Inatsisartunilu Inuit Ataqatigiinniit pitsanngorsaasoqarnissaa sulissutigisimavagut. Kalaallit inuiaqatigiit ineriartornerat ilutigalugu eqqartuussiveqarnikkut ineriartortitsinissap pingaaruteqarnera IA-miit naqissuserusupparput.

2010-mi Kalaallit Nunaanni Eqqartuussiveqarnermut ataatsimiititaliarsuarmiit Kalaallit Nunaanni illersuisuunertut atorfimmik pilersitsisoqarnissaa inassutigineqarpoq, maannalu tamatuma piviusunngornera Inuit Ataqatigiinniit nuannaarutigineqarpoq.

Atorfimmut inuttassarsiuussineq uani atuaruk.

Attavissaq: Aaja.Larsen@ft.dk aamma mobil: +45 61624667

Print Friendly, PDF & Email