Isumasioqatigiinneq SAR pillugu isumaqatigiissummik ersarinnerulersitsissaaq.

Inuit Ataqatigiit, Radikale Venster, SF, Enhedslisten aamma Venstre peqatigalugit sillimaniarnermut ministeri Trine Bramsen (S) SAR pillugu isumasioqatiginissaanut qaaqquaat. IA Folketingimi piffissami sivisuumi SAR pillugu isumaqatigiissutip Kalaallinit tigummineqarnissaa sulissutiginikuuaa, upernaaq mannalu tamanna iluatsippoq. SAR pillugu isumaqatigiissut ukiut marluk matuma siorna suliarinnittussarsiuunneqarluni aallartippoq. Qinnuteqaatilli tuniniakkallu akia nikingavallaarmat naalakkersuisut isumaqatigiissut ukiunik marlunnik sivisussuseqartussaq Air Greenland-imut tunniuppaa.

 

Aaja Chemnitz Larsen, IA tunuliaqutaralugu folketingimut ilaasortap tamanna pillugu ima oqaaseqarpoq: ”Isumaqatigiissutip Kalaalliniit tigummiinnarneqarnera Kalaallit Nunaannut ajugaaneruvoq annertooq. Kisianni isumaqatigiissutip Air Greenland-imut neqeroorutigineqartup imarisai suli ilisimanngilagut aammalu naalakkersuisut aalajangerneranni isumannaallisaaneq pillugu politikkikkut sillimaffissagut suli paasisaqarfiginatigit. Isumaqarpugut Air Greenland suliap kivinnissaanut misilittagaqarnerpaajusoq piukkunnarnerpaajusorlu, Isumaqatigiissummilu pingaaruteqarpoq siunissaq ungasinnerusoq eqqarsaatigineqassasoq aammalu sillimananiarneq pillugu piumasaqaatit sakkortusineqassasut pissutigalugu SAR-ip, nunarsuarmi pinngortitani peqqarniinnerpaajugunartumi annaassiniartarneri amerlaneruleraluttuinnarput unammillernarneruleraluttuinnarlutillu”

 

Air Greenland-ip SAR-imi qulimiguullit atugai Naalagaaffeqatigiinni qulimiguulinni pisoqaanerpaapput taarserneqartussaallutillu. Qulimiguulik Kangerlussuarmi inissisimaffeqarpoq. Atorfissaqartitsisoqartillugulu Narsarsuarmi qulimiguulimmik periarfissaqartitsisoqarluni, tamannali ulluunerani taamaallaat periarfissaavoq. Inuit Ataqatigiinniit tamanna aaqqiiffigineqarusuppoq, taamaaliornikkut Kalaallit Nunaat tamakkerluni pitsaanerusumik sillimaffigineqalissammat.

Isumasioqatigiinneq ulloq 27. august 2020 ammasumik ingerlanneqassaaq. Isumasioqatigiinnissami apeqqutit ataani iserfissaq toorlugu takuneqarsinnaapput:
https://www.ft.dk/samling/20191/almdel/GRU/samspm/A/index.htm

 

Attavissaq: Aaja Chemnitz Larsen, tlf. 0045 61624667 imaluunniit aaja.larsen@ft.dk

del på de sociale medier

Share on facebook
Share on twitter
Share on linkedin