Isumaginninnermut, Ilaqutariinnut Inatsisinillu Atuutsitsinermut Naalakkersuisumut ammasumik allagaq

Atoqatigiinneq akuersissummik imaqanngitsoq pinngitsaaliineruvoq. Qanittumi Folketingimi amerlanerussuteqartumik isumaqatigiissummik isummiussisoqarpoq isumaqatigiissullu akuersissummit tunngaveqartumik pinngitsaaliinermut inatsisissamut tunngassuteqarluni. Tamanna Kalaallit Nunaanni aamma atuuttariaqaraluarpoq. Taamaammat oqallinnermut malinnaanikuuvunga Justitsministerilu aperinikuullugu tamanna Kalaallit Nunaanni aamma atuussinnaanersoq. Akivaanga Naalakkersuisut apeqqutaasut.

Meeqqanut atornerluinernut kannguttaaliorfiginninnernullu ukkatarinnitsigaluta pinngitsaaliinermut inatsit sukatitertariaqaraluarparput. Kalaallit Nunaanni akuersissummik imalimmik pinngitsaaliinermut inatsimmik pisariaqartitsivugut, taamaasilluta pinngitsaaliinerup qanoq isikkoqarnera paasiniassagatsigu pinngitsaalineqarsimasullu tamaasa eqqartuussisutigoortumik illersornissai qulakkeerniassagatsigu.

Naalakkersuisoq, nalunngilara pinerlunnikkut kinguaassiuutit tungaatigut suliassanik ulikkaartugut. Maannali kinguaassiuutitigut nammineq aalajangersinnaanermut periarfissatsialammik tunineqarpugut pinngitsaalineqarsimasullu eqqartuussivitsigut illersorneqarnissamut pisinnaatitaaffiinik pisassaannik ikiorsiisinnaalluta. Taamaaliorsinnaavusi akuersissummik tunngaveqartumik pinngitsaaliinermut aalajangersaagussi tamannalu pinerluttulerinermi inatsimmi ilanngullugu. Pinerluttulerinermi inatsimmi siorasaarinermik, nakuusernermik pinaasernermilluunniit pisoqarsimatillugu aatsaat pinngitsaaliinertut nalilerneqarsinnaanera assut ernumassutigaara. Tamanna isumaqarpoq inuk naameersimagaluarpalluunniit pinngitsaaliinertut taasariaqanngitsoq. Tamanna isumaqarpoq pisumi iliuuseqarnani qerisutut pissuseqarnermi pinngitsaaliinerunngitsoq – qisuariarneq taanna naliginnaasuuvoq pinerluttulionermilu eqqugaasumut ajornerusumik pisoqannginnissaanit tunngaveqarluni.

Pinngitsaalineqarsimasut tamaasa eqqartuussisutigoortumik illersorneqarnissaat pisinnaatitaaffii malillugit qulakkeertariaqarpagut. Tamanna akuersissummik tunngavilimmik pinngitsaaliinermut inatsisip piviusunngortitsinermut tapeeqataaffigisinnaavaa.

Pinngitsaaliinerup nakuusersimanerluni pinngitsaaliisimanerluniluunniit pisimanersoq apeqqutaanngitsoq erseqqissarnissaanut kingusinaartoqarsinnaanngilaq, soorlu aamma kinguaassiornermut tunngatillugu ilaasut nammineq piumallutik ilaanerannut tunngassuteqanngitsoq. Peqqutissat amerlaqaat oqimaallutillu, taamaalillunilu inatsisitigut pinerluttulerinermi inatsimmi nassuiaaqqinnissaq maannakkut pisariaqarluinnarluni.

Ilinnut tamanullu ammasumik allagaqarpunga taassumap tungaatigut ersarissumik inassuteqarusullunga. Sukkanerpaamik akuersissummik tunngaveqartumik inatsimmik allannguisariaqarpugut pinngitsaalineqarsimasut eqqartuussisutigoortumik inissisimaneri nakussassarniassagatsigit.

Justitsministerip Naalakkersuisut kissaatigippassuk pinerluttulerinermi inatsimmi allannguinissamut akuersissummik tunngaveqartumik pinngitsaaliinermut aalajangersaanermik pingaartitsinissaminik neriorsuereerpoq. Iliuuseqartussat tullii tassaapput ilissi.

 

Inussiarnersumik inuulluaqqusillunga,

Folketingimi ilaasortaq Aaja Chemnitz Larsen

Inuit Ataqatigiit Folketingimi

del på de sociale medier

Share on facebook
Share on twitter
Share on linkedin