fbpx

Issittumi siunnersuisooqatigiit ataatsimiinnginneranni Aaja Issittumi nunanut allanut ministerinut innersuussutissaqarpoq

Folketingimi Inuit Ataqatigiinnit ilaasortaq Aaja Chemnitz Larseni qanittumi Issittumi inatsisartunut komitémi (SCPAR) siulittaasutut toqqagaaqqammerpoq sulileqqammerlunilu. Issittumi naalagaaffinni nunanut allanut ministerinut allakkamik nassiussami Aajap siulittaasuunermini ukkatarerusutani pingasut paasiteqqammerpai: Silap pissusaata allanngoriartornera, inuussutissarsiorneq atasinnaasoq aamma Issittumi innuttaasut.

 

Issittumi Inatsisartut qanittumi apriilip 13-anit 14-ata tungaanut ataatsimiimmata Aaja siulittaasutut qinigaavoq. Ulloq taanna Aajap sivisuumik sulissutigisimavaa sivisuumillu qilanaarisimallugu. Issittoq tamakkerlugu politikerit ataatsimiinnermi ilaasut innersuussuteqarput, maannalu Aajap Issittumi nunanut allanut ministerinut Issittumi siunnersuisooqatigiit naapinnginneranni innersuussutit tunniullugit.

”Siulittaasutut sulininni anguniakkakka marluupput, siulleq Issittumi Politikerinut sulineq innuttaasunut erseqqarinnerulernissaanut qulakkeerinninneq aammalu Issittumi nunani tamani innuttaasut peqataatinneqarnerulernissai. Suliassaq siulittaasumit aqunneqartorujussuusussaammat suliassaqaqaanga aallarnereersimanerilu nuannaarutigaakka. Ukioq allorlugu ataatsimiittartussaavugut 2022-milu Nuummi ataatsimiissalluta, tassanilu innuttaasut qaaqquneqarumaarput, taamaalillutami politikkikkut innersuussutissat naalakkersuisunut ingerlaqqittussat suliarisinnaassagatsigit. Politikki uninngaannartuunngilaq ineriartortuartuullunili, taamaammallu Issittumi ineriartortitsinermi Issittumi ataatsimiisitsinitsinni aammalu inooqatigiit akornanni attaveqaqatigiiffinni (sociale medier) peqataatitsinerunissaq anguniarpara. Taamaammat Facebook-imi aamma quppernermik pilersitsiniarpugut Kalaallit Nunaannut soqutigisallit tamarmik Issittumiittullu tamarmik suliatsinnut malinnaasinnaaniassammata. Nittartakkamik nutaamik aamma pilersitsinikuuvugut suliatsinnullu tunngatillugu attaveqaqatigiinneq allilerusullugu. Tamanna qilanaaraara”.

Ersarissumik maannakkullu pisunut malinnaatitsinermik suliaqarneq eqqaassanngikkaanni Aajap siulittaasutut suliassat pingasut pingaartumik sulissutigerusuppai.

“Issittumi naalakkersuisuni silap pissusaannut suliniutinut pitsanngorsaanissamut innersuussuteqarpugut, taamaalillutik Parisimi isumaqatigiissummi anguniakkat anguneqarsinnaaniassammata. Ukioq manna immikkut nuannaarutigalugu oqaatigisinnaavarput IA-mi Naalakkersuisut Kalaallit Nunaanni Parisimi isumaqatigiissummut atsiornissaq anguniarmassuk. Taamaaliornermi ataatsimut suliassamut anguniagaqarnermut naleqartorujussuussammat. Taakku eqqaassanngikkaanni Issittumi inuussutissarsiornerup ineriartornera pitsanngorsarusupparput nunanit allanit aningaasaliinikkut, soorlu aamma Kalaallit Nunaata Arctic Economic Council-imut ilaasortaanissaannut suliniuteqarnikkut, taamaaliornerni aningaasaliisussat suliffeqarfiillu Issittumiittut akornanni oqartariaaseq malillugu ikaartarfiliortoqarsinnaassammat. Issittumi eqqissisimaneq allanngujuissuserlu inuussutissarsiornermi ineriartornissamut pingaaruteqarluinnarput, tamannalu assut sulissutigaarput. Taamatullu isumaqarpugut Issittumi inuusuttut Issittumi ineriartornermut peqataatinneqarnerulissasut inuusuttullu akornanni Issittumi “issittumit issittumut” isiginnaagassianik peqalissasoq isumaqarluta”.

Suliassat pingasut taakku Issittumi nunanut allanut ministerinut ingerlateqqinneqareerput, tassa Joe Bidenip qanittumi nunanut allanut ministeritut toqqagaanut Antony Blinkenimut aamma Ruslandimi nunanut allanut ministerimut Sergej Lavrovimut allakkamik Aajamit nassiussisoqarnikuulluni. Issittumi siunnersuisooqatigiit maajip 20-ani Reykjavikimi naapissapput, Aajalu aamma peqataassaaq.

del på de sociale medier

Share on facebook
Share on twitter
Share on linkedin