Navigate / search

Inuit Ataqatigiit Folketingimi

Qinigaaffik nutaaq allartillualeruttorpoq, Aajalu Christiansborgimilu allattoqarfik ulapaarlualereerput. Tamanut ammasumik aaqqissuussinermit, 1. augustimi pisunut kiisalu Amerikkap præsidentianiit oqariartuummut oqallisaaqisumut tunngasunik suliaqarsimalereerpugut.

Talerpimmiit: Karl-Peter Kristensen , Anne-Katrine Brandt Olsen, Aaja Chemnitz Larsen, Maalia Lynge Christiansen, Kasper Gimsing Juul, aamma Kuluk Møller Haltrup,.

Qinigaaffimmi nutaami aammattaaq IA-p allattoqarfiani sulisutigut nikittoqarpoq. Soorunami Aaja ingerlaannarpoq – tamanna qinigaalluarnermigut qulakkeerpaa. Sulisut eqqarsaatigalugit Inuit Ataqatigiit Folketingimi sulisui arlallit qutsavigalugit inuulluaqquagut, nutaallu tikilluaqqullutigit.

Suleqatit sulilluarsimaqisut inuulluaqquagut

Inuit Ataqatigiinniit ilaatigut suleqatigisimasarput pikkorilluartoq, Sara Biilmann Egede, allami suliffittaartoq inuulluaqquarput. Sara siullermik ilinniartutut ikiortaasimavoq, kingornalu politikkikkut siunnersortaasimalluni. Sara sulisuusimavoq nuannaarineqartoq, Kalaallit Nunaat pillugu Folketingimi sorsuuteqarsimasoq.

Inuit Ataqatigiinni Folketingimi sulisimanera nuannarisimaqaara. Ukiut suliffigisakka ilinniarfigisimaqaakka, ilikkakkakku qujamasuutigeqaakka. Sulinermi sinaakkutit pitsaanerusinnaanngitsut atorsimavakka, sulianullu Kalaallit Nunaannut taamak pingaaruteqartigisunut peqataasimanera nuannarilluinnarsimavara”, Sara oqarpoq.

Aammattaaq Inuit Ataqatigiit Folketingimiit ikiortitut suleqatigisimasarput Aputsiaq Bourup Lynge inuulluaqquarput. Aputsiaq ilaquttani ilagalugit Nuummut angerlaqqammerput, Air Greenlandimilu pissanganartumik atorfittaariikatappoq. Aputsiap sulilluarsimanera paasisimasaqartutullu ilanngussaqartuarnera pillugu qutsavigaarput.

Inuit nutaat tikilluaqquagut

Qujanartumilli suleqatigisimasanik inuulluaqqusiinnarnata aamma nutaanik tikilluaqqusivugut.

Ilaat tassaavoq Kuluk Møller Haltrup. Kuluk Inuit Ataqatigiit Folketingimi nalunngilluarparput, illinniartutummi ikiortitut sulereersimavoq. Immikkut allaaserisaminik naammassinnereermat, maanna nuannaarutigisatsinnik Naalakkersuisunikkut Siunnersortitut tikilluaqquarput.

Aammattaaq allattoqarfimmi pisortaq Anne-Katrine Brandt Olesen meerartaareernermi kingorna sulinngiffeqareerluni uterpoq. Ulluinnarni AK-mik taagorparput, ilaannilu aqqata naalisaataa AK qanorpiaq isumaqarnersoq nalornilersarpugut, AK, Anne-Katrine imaluunniit Altid Klar, piareersimajuaannartoq. Uteqqinnera nuannaarutigeqaarput, sorpassuillu aqutarisarpai.

Nutaat ilaat tassaavoq Maalia Lynge Christiansen. Maalia upernaaq Folketingimi sulilerpoq, tassa qineqqusaarnerup nalaani sulianut ikiuulluarluni. Kingorna Nuummi Inuit Ataqatigiit Kattuffianni Folketingimut qineqqusaarnerup nalaani atorfeqalerpoq, IA-llu qinersinermi angusaqarluarneranut peqataalluni.

“Piffissaq pissanganartoq nalerorlugu Inuit Ataqatigiit Folketingimi suliffigilerpakka. Qineqqusaarnissaq suaarutigineqarmat, Nuummilu qineqqusaartoqarmat kingornalu danskit Naalakkersuisuinik allarniutitut isumaqatigiinniartoqarmat ilaavunga. Aajap eqqaani pisoqartuaannarpoq – allattoqarfillu Aajalu suleqatigalugit pissarsinartuaannarput”, Maalia oqaluttuarpoq.

Inuit Ataqatigiinniit ilinniartunik ikiorteqartarneq pingaartittuaannarneqarsimavoq. IA Folketingimiit ilinniartut sulinertigut misilittagaqalernissaannut peqataarusuppugut, Folketingilu suliffiuvoq pissanganarluinnartoq. Inuit Ataqatigiit Folketingimi inuk tulluarluinnartoq pissarsiarisimavarput, tikilluaqquarpullu Karl-Peter Kristensen. Karl-Feter ulluinnarni sulinitsinni ikiortassavaatigut, Christiansborgimilu peqatigisalernissaanut qilanaarpugut.

Kingullertut piumassutsiminik siunnersorti Kasper Juul Gimsing iluatsissimavarput, taassumalu naalakkersuinikkut paasiniaaqqissaarnertigut peqatigisassavaatigut, allatigullu suliassanik ikiortarluta. Tikilluaqquarput.

Sulisussat tamaasa katikkaanni qularnanngilaq nunarput pillugu qinigaaffimmi matumani Inuit Ataqatigiit Foketingimi aamma Aaja Chemnitz Larsen politikkitigut suliassarpassuarnik naammassisaqartarumaartut. Qilanaarpugut suleqatissagullu nutaat tikilluaqquutigalugit qujamasulluta nutaanngitsut takoqqikkumaarnissaannik kissaappagut.

Print Friendly, PDF & Email