Inuiaqatigiit ataanit qaqikkutsigit siuariartorneq attartunerusoq atulissavarput

Qularnanngitsumik maanna aningaasaqarnikkut siuariarneq misigaarput. Siuarnerullu annertussusaa siornatigut misigisimanngilarput. Siuariarnerli aningaasaqarnitsinnut siumut ingerlatitserujussuarsimasoq akissarsialinnut naliginnaasunut atugarliortunullu tunngilaq. Qanoq aningaasaqarnikkut siuariartorneq tusartuarlugu ulluinnarnili ajunnginnerusunik atugaqalernermik kinguneqarnera misiginagu pakatsinartigaa. 

Kalaallit Nunaanni naligiinnginneq annertoorujussuuvoq. Pingaartumik nunanut avannarlernut Naalagaaffeqatitsinnullu Savalimmiunut Danmarkimullu assersuutissagutta. Inuiaqatigiinni naligiinnginneq arlalitsigut ersertarpoq assigiinngitsunillu peqquteqartarluni. Maani Kalaallit Nunaanni naligiinnginneq kusanaatsumik naalagaaffimmi atugarissaarnerup tungaatigut allanngorfeqarnermit pinngortarpoq taannalu ajoraluartumik assigiinngitsutigut assersuusiorfigineqarsinnaalluni.

Qanittumi Kofoed Skole-mut pulaarninni ersarissumik takusinnaavara Nuummi angerlarsimaffeqanngitsut amerliartortut. Unikaallalluta immitsinnut aperisariaqarpugut sooq inuit inuiaqatigiinni inissisimaffimminnik nassaarsinnaanngitsut taamak amerliartortiginersut. Pingaartumillu immitsinnut aperaluta qanoq isilluta ineriartorneq atugarissaarnermut tunngatillugu ataanit qaffassarsinnaanerlugu?

Sulisartulli amerlasuut suliffillit inuunissamut pisariaqartinneqartunit minnerpaanit atuillutik inuupput. SIK-mi ilaasortat 6000-it assersuutigissagutsigit takutippaat inuit suligaluarlutik akissarsiaat annikingaarmata sulinissaat akilersinnaanngingajattuusoq.

Piffissaq sivitsulaareeraluartoq atuarnikuuarput atuartut 11-nit 17-inik ukiullit 12 procentii tamatigut imal. akulikitsumik kaallutik innartartut. Tamanna meerartatta 29 procentii misigereerpaat. Assersuutit taakku assersuuterpassuit amerlasuut akornanni ilaannaapput.

Aningaasatigut ineriartorpugut. Ineriartorneq ima annertutigaaq allaat aningaasaqarnitta ingerlalluarneranut malinnaasinnaajunnaarsinnaalluta suliffeqarfinnut malinnaanissamut piumasaqaatit annertusivallaassammata. Aningaasaqarnermut Siunnersuisoqatigiit ilimagivaat Kalaallit Nunaanni 2020-mi aningaasaqarneq 3,9 procentimik siuariassasoq. Maanna akisussaaffigaarput – piviusumik – aningaasaqarneq akisussaassuseqarluta attartuumik ingerlatissallugu.

Aningaasaqarnitta siuariartornera ajunngitsuuvoq. Siuariarnerli inunnut ikitsuinnarnut maanna tuttarpoq atuarfitsinnullu, naligiinnginnermut meeqqallu kaannginnissaannut suliniuteqarnernut atorluarneqassanani. SIK-mi ilaasortat, akissarsiallit naliginnaasut inuiaqatigiinnilu atugarliornerpaat ulluinnatta oqinnerulernera malugisussaavaat. Iluanaarutit malugisariaqarpaat inuunermilu nalillit tigussaanngitsut ajunnginnerusumik misigalugit.

Inuit Ataqatigiinnit Folketingimit HK-mi ilaasortanut Pinerluttunik Isumaginnittoqarfimmiittunut naalagaaffimmi atorfilinnut ajunnginnerusumik isumaqatigiissummik pilersitsisoqarnissaanut qulakkeeqataanikuuvugut politiillu isertitsivinnilu politiit akissarsiaannut qaffaanissaq ingerlaarluni. Neriuppunga suliniutit taakku akissarsisartunut allanut atugaqarluarnissamut pissaminnut pisinnaatitaaffeqarnissamut eqqarsarnissamut sunniuteqarluassasut.

Uannut tamakku ersoqatigiinnissamut tunngassuteqarput. Eqqaamassavarput qallunaat oqariartaasaat malillugu ujameq taamaallaat sanngiinnerpaaffimmi nukittussutsini nukittussutigimmagu. Tassa inuiaqatigiittut ajugaanavianngilagut ataatsimut pitsannguinngikkutta. Utoqqaat atugarliortut, angerlarsimaffeqanngitsut meeqqallu. Tamatta naligiinnissatsinnut naligiissinnaanitsinnullu tamanna tunngassuteqanngilaq. Tamattali naleqartinneqarluta inuttullu naleqassusitta akuerineqarnissaanut tunngassuteqarpoq. Suliniutit siusissumik suliarisassavagut meeqqat inuusuttullu amerlanerit aserujaatsumik ilinniakkamik naammassisaqarniassammata suliffeqarfimmilu sulinissaminnut piareersimallutik. Tamanna aamma sulisitsisunut iluaqutaasussaavoq aningaasaqarnikkullu ineriartornermik aserujaatsumik inerneqartitsissalluni. Tamanna inuaqatigiinni amerlanernut isumalluutinik atuisinnaanermik qulakkeerinnissinnaavoq.

Tassa imaappoq inuiaqatigiittut pimoorullugu iluatsitsissagutta ataanit qummut ataatsimut qaqitsinissarput pisariaqarpoq. Tamanna tamatsinnut iluaqutaasussaavoq. 

del på de sociale medier

Share on facebook
Share on twitter
Share on linkedin