Navigate / search

Illersornissaqarfiup suliassaataanut kalaallit akuutinneqarnerulernissaat Aajamit nersualaarneqarpoq

Illersornissaqarfiup suliassaataanut kalaallit akuutinneqarnerulernissaat Aajamit nersualaarneqarpoq
Illersornissaqarfiup suliassaataanut kalaallit akuutinneqarnerulernissaat Aajamit nersualaarneqarpoq

Ullumikkut illersornissamut ministerip Peter Christensenip (V) Issittumi illersornissatigut suliassat qanoq naammassineqarnissaannut misissueqqissaarneq sivisuumik utaqqineqarsimasoq saqqummiuppaa. Misissueqqissaarneq 2013-imi naalakkersuinikkut suliakkiutaasimavoq. Aaja Chemnitz Larsen Inuit Ataqatigiinneersoq misissueqqissaarnermit inassuteqaatinut ataatsimut isigalugu iluarisimaarinnippoq. Maannalu naalakkersuinikkut isumaqatigiinniartoqarnissaanut qilanaarpoq.

”Siullertut maanna inassuteqaatit piareerneqarmata nuannaarutigivara. Nutaanik iliuuseqartoqarnissaanut piffissaq manna atugarput piffissaalluarpoq, misissueqqissaarnerullu inerniliineri ukiuni arlaqartuni utaqqisimavagut. Suliakkiissummi suliassat suuneri ersarilluinnarsimapput, aallaqqaataaniillu Kalaallit Nunaanni illersornissaqarfiup suliassaasigut nukittorsaanissap aallunneqarsimanera pitsaasutut isigivarput. Susassaqarfiullu tamassuma pingaarnersiuinermi salliutinneqarnerulernissaanut pisariaqartitsisoqarpoq”, folketingimi ilaasortaq Aaja Chemnitz Larsen (IA) oqarpoq.

Sulisussat Kalaallit Nunaanneersut atorlugit

Kalaallit Nunaanni illersornissamut suliassanut kalaallit amerlanerusut akuutinneqarnissaat Inuit Ataqatigiinniit suliassatut pingaarnertut sivisuumik aallussarisimavarput. Inatsisartuni Folketingimilu siunnersuuteqartarnertigut ilinniartitaanermi piginnaanngorsaanermilu Kalaallit Nunaanni sumiiffiit aallaaviunissaat illersornissaqarfimmiit salliutinneqassasoq, pingaartumik inuusuttut eqqarsaatigalugit, tunngavilersortarsimavugut.

Sumiiffinni inuit sulisutut atorneqarnissaannut tunngatillugu Aaja Chemnitz Larsen IA-meersoq oqarpoq: ”Kalaallit amerlanerusut illersornissaqarfimmi atorfinitsinneqarnissaat pingaaruteqarpoq. Tamanna Arktisk Kommandomi kajumissutsimillu aallaaveqartumik upalungaarsimatitassani pissaaq, tassa inuit sungiusarneqarlutik pikkorissarneqarlutillu Kalaallit Nunaanni ujaasinerni annaassiniarnernilu peqataasinnaanngortillugit. Kalaallit sulisussat oqaatsitigut, nunaminnut tunngasutigut pinngortitamullu ilisimasaqartuupput – piginnaasallu tamakkua illersornissaqarfimmik nukittorsaaqataassapput. Ilisimavarput Kalaallit Nunaanni ullut pingasukkaarlugit annaassiniartoqartartoq, siunissamilu Issittup suli atorneqarnerulernissaani annaassiniartarnerit suli amerlanerulersinnaapput”.

Illersornissaqarfik aamma Kalaallit Nunaanni attaveqarneq

Kalaallit Nunaanni illersornissaqarfiup suliassat arlalippassuit isumagisarpai. Taakkunannga ikittuinnaat sakkutooqarnermut tunngasuupput, amerlanerillu tassaapput sinerissami attavissatut piareersimatitat, aalisakkanik misissuinerit, pinngortitamik nakkutilliinerit nunallu tamakkiisumik oqartussaaffigineqarnerata nakkutigineqarneranut tunngasut. Suliassat arlallit Kalaallit Nunaanni attaveqarnermut toqqaannartumik attuumassuteqartuupput.

”Ataatsimut isigalugu Kalalallit Nunaanni attaveqarnermut tunngasut nukittorsarneqassapput. Mittarfeqarfinniit satellitikkut nakutilliinernut kiisalu imartat assingi imaatigut nunakkullu isumannaatsuunissamut apeqqutaalluinnarput. Mittarfeqarnerit qimerluussagutsigit assersuutigalugu illersorfissaqarfiup mittarfiutaasa qanoq atorneqarnissaannut pilersaarutinut tunngasut ilisimassallugit pingaaruteqarput. Peqatigitillugulu imaatigut isumannaatsuunissamut imaatigut uuttortaanissaq assiliornissarlu pisariaqarput, soorlu aamma satellitit internetillu atorlugit digitalimik attaveqarnikkut nakkutilliisoqarsinnaallunilu nunamik tamakkiisumik oqartussaaffiginninneq nakkutigineqarsinnaasoq – taamatullu sumiiffiit minnerit avinngarusimasullu avataanut attaveqarnerusinnaanerisa pitsanngorsarneqarnissaanni Kalaallit Nunaanni ataqatigiinneq pitsanngorsarlugu”, Inuit Ataqatigiit folketingimi ilaasortaatitaat oqarpoq.

Illersornissamut atatillugu isumaqatigiinniarnissani naapiffiusuni peqataanissaq

Folketingimi sulinermi ukiuni kingullerni Inuit Ataqatigiinneersup Aaja Chemnitz Larsenip arlaleriaqaluni kalaallit savalimmiormiullu folketingimi ilaasortaatitaasa Folketingip naaperiarfittut isumaqatigiissutaanni peqataasarnissaat pillugu sorsuutigisarsimavaa. Pingaartumik aningaasanut tunngasutigut isumaqatigiinniarnerni kiisalu illersornissaqarfik pillugu naaperiarfiusumik isumaqatigiissutitigut kalaallit savalimmiormiullu aallarniutitut peqataatinneqarnissaat tulluartuussaaq.

”Kalaallit Nunaat sinnerlugu Danmarkip isumagisaani illersornissamut tunngasoq qitiulluinnarpoq. Naaperiarfiusumik isumatigiinniarnerni folketingimi ilaasortat atlantikup avannaatungaaneersut peqataatinneqarnerisigut naalakkersuinikkut ingerlaatsit nukittorsarneqassapput. Taakkunanimi politikkikkut aalangiinerit apeqqutaasut pisarput”, Aaja Chemnitz Larsen oqarpoq.

Annertunerusumik itisiliisitserusukkuit attavigisassaq: Aaja.Larsen@ft.dk aamma mobil: +45 61 62 46 67.

22. juni Aaja Chemnitz Larsen Kalaallit Nunaanni illersornissatigut suliassanik isumaginninneq pillugu P1 Orienteringimi apersorneqarpoq, taannalu uani tusarnaarsinnaavat: http://www.dr.dk/p1/orientering/orientering-2016-06-14-2

Print Friendly, PDF & Email