Navigate / search

Illersornissaqarfimmi sumiiffiit ataasiakkaat akuutinneqarnerunissaasa piviusunngitinneqarnissaat IA-miit kissaatigineqarpoq

Asseq: Inuit Ataqatigiit Folketingimi

Folketingimi ilaasortap Aaja Chemnitz Larsenip (IA) Kalaallit Nunaanni illersornissaqarfitsigut suliassanut amerlanerusunut kalaallit amerlanerusut peqataatinneqarnerunissaannik kissaatini piffissami sivisuumi ersarissartarsimavaa. Kalaallit Nunaanni Illersornissaqarfiup inuiaqatigiinni suliarisartagai Aajap tikkuarpai, soorlu ajutoortoqartillugu annaassiniarnerit, sikunik aserorterinerit aalisarnerullu iluani nakkutilliinerit. Trumpip Kalaallit Nunaannik pisiarinninniarluni saqqummiinera aallaavigalugu maanna danskit illersornissamut ministeriata illersornissaqarfimmi ilinniakkat amerlanerusut kalaallinut inuiaqatigiinnullu tunngatinneqarnissaat qulakkeerneqassasoq nalunaarutigivaa.

Siusinnerusukkut Inuit Ataqatigiinniit illersornissatigut politikkitigut siunnersuut saqqummiunneqarsimavoq, tamannalu sakkussakillisaanikkut, isumannaallisaanikkut kalaallillu illersornissaqarfimmi akuutinneqarnerulernissaasigut pitsanngorsaanernik kinguneqarsimavoq. Pinngortitamik, oqaatsinik sumiiffinnillu ilisimanninnitsigut Kalaallit Nunaanni illersornissaqarfiup suliassaasigut iluaqusiineqassaaq, peqatigitillugulu kalaallit inuusuttut ilinniagaqarnikkut piginnaasqarnikkullu illersornissaqarfimmit iluaquserneqassapput. Piffissamili sivisuumi kalaallinut kalaallinullu tunngasutigut ilinniagassat pikkorissarfissallu amigaataasimapput.

”Illersornissaqarfimmi ilinniakkatigut akunnitsinni ataatsimut aallussineeput inuusuttatsinnut ilinniarfissatigut nutaanik periarfissiissaaq. Piffissaq sivisunerusoq isigalugu isumaqarpunga illersornissatigut sungiusarnerit Issittumi pisariaqartut. Tassanilu kalaallit misilittagartuut assersuutigalugu upalungaarsimanissami peqataatinneqartariaqarput. Nuannaarutigaara naalakkersuisunit nutaaniit inuit nunatsinniittut pisinnaasut isiginiarneqalermata. Inuusuttut illersornissatigut ilinniagaqartinneqarnerannut nammineerluta peqataanissarput taamatullu Kalaallit Nunaanni suliassanut peqataanissarput pissusissamisoorluinnarpoq.” Aaja Chemnitz Larsen naalakkersuisut siunnersuutaannut nutaamut atatillugu oqarpoq.

Sapaatip akunnerani matumani Illersornissamut ministeri Trine Bramsen (S) aamma folketingimi ilaasortaq Aaja Chemnitz Larsen (IA) Kalaallit Nunaat Issittorlu pillugit ataatsimeeqatigiipput.

Suliniummi nutaami illersornissamut ministerip pisamilu Naalakkersuisup ilinniakkat pillugit oqalliffik pilersissimavaat, tassanilu Kalaallit Nunaanni ilinniakkat pisariaqartitsinernut periarfissanullu tulluarsarneqarsinnaapput. Peqatigitillugulu qatserisartut kalaallit issittumi pissutsit aallaavigalugit sungiusaanernut ilinniaqqinninnernullu akuutinneqarsinnaapput, tamannalu Folketingimi IA-miit pingaarnertut sulissutigisimavarput. Piffissami aggersumi Inuit Ataqatigiinniit naalakkersuisut qanimut oqaloqatiginerat nangissavarput.

Ilanngussaq: Inuit Ataqatigiit Folketingimi Illersornissatigut siunnersuutaat 2017-meersoq ”Issittumut isumannaatsumut anguniagassat qulit” 

Qallunaatut: http://iafolketingimi.dk/wp-content/uploads/2017/09/IA_Forsvarsudspil-DK_FINAL.pdf 

Kalaallisut: http://iafolketingimi.dk/wp-content/uploads/2017/09/IA_Forsvarsudspil-GL_FINAL.pdf

Print Friendly, PDF & Email