Navigate / search

Illersornissamut Ataatsimiititaliaq Kalaallit Nunaata imartaanik uuttortaanissaq pillugu isumaqatigiinniaqateqarfigineqarpoq

Illersornissamut Ataatsimiititaliaq Kalaallit Nunaata imartaanik uuttortaanissaq pillugu isumaqatigiinniaqateqarfigineqarpoq
Illersornissamut Ataatsimiititaliaq Kalaallit Nunaata imartaanik uuttortaanissaq pillugu isumaqatigiinniaqateqarfigineqarpoq

Uani sap. akun. marlunngornermi Folketingimi Illersornissamut Ataatsimiititaliaq danskit Avatangiisinut Ministeri Ida Auken (SF) peqatingalugu Kalaallit Nunaata imartaani uuttortaanissaq pillugu isumaqatigiinniaqateqarfigineqarput.

Inuit Ataqatigiit Folketingimi ilaasortaatitaata piffissami annertusingaatsialersumi imartamik uuttortaaneq sammisimavaa. Januaarip februaarillu qaammataani Sara tamanna pillugu apeqquteqaateqarsimavoq, taakkununngalu akissutaasuni erseqqippoq, nunatta imartaata 20 %-ia kisimi nalunaarsorneqarluni uuttortarneqarsimasoq, taassumalu ilaa uniuuttumik uuttortangaalluni. Akissutinittaaq allaqqavoq, Kalaallit Nunaata imartaanik nalunaarsuinermi ilangaatsiarsua ukiuni 60-ni kingullerni uuttortaaneq ingerlanneqarsimasoq, aatsaallu 2003-mi ekkolodikkut qinnguartaaneq atorlugu nalunaarsuisalersimasut, tamannalu -/+ 50 cm annertussusilimmik uniuutilaartartoq.

”Aqagu isumaqatigiinniaqatigiinnissamut qilanaaqaanga, assullu nuannaarutigalugu danskit Folketingimi inatsisartui suliamut soqutiginnimmata. Tassami pingaaruteqaqaaq Kalaallit Nunaata imartaani uuttortaanermut periuutsit pitsaanerpaat atorlugit piaartumik imartat annertuut uuttortaavigineqartalernissaat”, Sara Olsvig taama oqarpoq.

Timmisartut satellitsillu atorlugit imartamik uuttortaasarneq piukkunnartoq

IA-p Issittumi aatsitassat – Nunat allat pillugit politikkikkut unammillernartui sammisaralugit isumasioqatigiisitsinerani, Christiansborgimi maajip aappaani ingerlanneqartumi saqqummerpoq, silaannarsuarmi atortugissaarutit atorlugit Issittumut saatsinneqarsinnaanera periarfissaasoq.

Issittumi sammisat annertusiartorneranni umiarsuit angallannerannik nakkutilliineq aamma pisariaqaleraluttuinnassaaq. Kisiannili avataarsuaniit atortugissaarutit atorlugit nakkutilliineq kisimi ingerlanneqartariaqanngilaq.

Maannakkut timmisartut satellitsillu atorlugit immap itisussusianik uuttortaaneq ingerlanneqartarpoq, taamaattumillu uku uuttortaanermut iliuutsit allaanerulaat atorneqartalernissaat misissortariaqarparput. Tamanna uuttortaanermut iliuuseq eqquunnerpaajunngikkaluartoq, umiarsuakkut imartamik uuttortaasarnermut tapertarineqarsinnaalluarpoq, ilaatigut umiarsuit sumerpiaq uuttortaasarnissaanut tikkuartuutitut atorluarneqarsinnaassalluni. Tamannalu isumaga malillugu periarfissaq nunatsinnut tulluussorinarmat suliassatut ingerlateqqinneqarsinnaanera soqutiginaateqarpoq, taamaasillutalu imartatta 20 % sinnerlugu uuttortarneqarnissaa sukkanerusumik ingerlanneqarsinnaalluni, tamannalu apeqqut aqagu Avatangiisinut Ministerimut ingerlateqqissamaarpara”, Sara Olsvig taama nalunaarpoq.

Silaannakkut uuttortaaneq sikup issussusaanik uuttortaanermut aamma atorneqartarpoq. Tamannalu Sara Olsvigip Avatangiisinut Ministerimut saqqummiussimavaa, silaannakkullu imartamik uuttortaasarneq periarfissatut misissorluarneqarnissaa kaammattuutigisimallugu.

2012-mi upernaakkut Kalaallit Nunaannut tunngassutilinnut Ataatsimiititaliaq Issittoq pillugu immikkut sammisatut ataatsimiissutigisimavaat, tassanilu ilaatigut imartamik uuttortaasarneq eqqartorneqarsimalluni.

Isumaqatigiinniaqatigiinneq ammasumik ingerlanneqassaaq. Tamannalu TV-kkut toqqaannartumik malinnaavigineqarsinnaassalluni.

Paasissutissanik annertunerusunik pissarserusukkuit Illersornissamut Ataatsimiititaliap nittartagaanut aallersinnaavutit, uani:

http://www.ft.dk/Folketinget/udvalg_delegationer_kommissioner/Udvalg/Forsvarsudvalget/Nyheder/2012/10/FOU_soeopmaaling_groenland.aspx

Sara Olsvig ugguuna attavigineqarsinnaavoq sara.olsvig@ft.dk imaluunniit oqarasuaat +45 3337 5404. Apeqqutit allallu uani takukkit www.IAfolketingimi.dk

Print Friendly, PDF & Email