Ilisimatusarnermut isumaqatigiissut qulakkeerneqarpoq: Ilimmarfimmi Silap pissusianut aammalu Nunanut allanut politikki pillugu ilisimatusarnermut centerissaq

”Partiit akimorlugit suleqatigiinneq imminut akilerpoq.” taamatut folketingimut ilaasortaq Aaja Chemnitz Larsen oqarpoq, sapaatip akunnera kingulleq, 30. oktober ilisimatusarnermut isumaqatigiissut aqqutigalugu ilisimatusarnermut centerissamut aningaasanik immikkoortitsisoqarmat.

Partiit Enhedslisten aamma Konservative pitsaasumik suleqatiginerisigut Nuummi ilisimatusarfimmi centerissap pilersinneqarnissaanut aningaasat immikkoortinneqarput. Centerissaq immikkut ittumik silap pissusianut nunanullu allanut politikkimut ukkatarinnissaaq.

Tassunga tunngatillugu Aaja ima oqariartuuteqarpoq: ”Issittoq pillugu ilisimatusarneq Issittumi ingerlanneqarnerulissaaq issittumi najugaqartunit. Ilisimatusarneq pingaaruteqarpoq ilisimasatta annertusarnissaanut isumassarsiattalu ineriartortinnissaanut tamatsinnut iluaqutaasussamik”

Ilisimatusarnermut centerissaq nutaaq Inuit Ataqatigiit folketingimi ukioq ataaseq sinnerlugu sulissutigineqarnikuuvoq, pikkorissunillu suleqateqarnikkut iluatsippoq

Assimi takuneqarsinnaavoq Eva Flyvholm Enhedsliste-meersoq anguniakkap piviusunngorneranut qitiulluinnartoq: ”Qujamasuppunga nuannaarlungalu. Eva Enhedsliste-meersoq, suliap ingerlanerani assut iluaqutaavoq” Aaja oqarpoq.

Centerissap 2021-imi aallartisarnissaanut 2 mio. kr.-mik immikkoortitsisoqarpoq, aammattaaq Issittumi ilisimatusarnissamut 6,2 mio. kr. immikkoortinneqarput ilaatigut U-Arctic aammalu ilisimatusarnermi umiarsuaq DANA 170 mio. kr.-mik ukiunut pingasunut tulliuttunut aningaasaliiffigineqarluni.

 

 

del på de sociale medier

Share on facebook
Share on twitter
Share on linkedin