Navigate / search

Ilinniarnerminut atatillugu suliffimmiittoq Karsten Jensenimut inuulluaqqussut suleqatigiissimanermullu qujaneq

Ilinniarnerminut atatillugu suliffimmiittoq Karsten Jensenimut inuulluaqqussut suleqatigiissimanermullu qujaneq
Ilinniarnerminut atatillugu suliffimmiittoq Karsten Jensenimut inuulluaqqussut suleqatigiissimanermullu qujaneq

Qaammatini kingullerni tallimani IA Folketingimi nuannaarutigalugu Karsten Peter Jensen ilinniagartuun-ngorniarneranut atasumik suffimmiittuutigivarput. Karstenip Nuummi Ilisimatusarfimmi inuiaqatigiilerineq ilinniagarivaa. Karstenip IA Folketingimip allattoqarfiani suleqataanera nuannarisimaqaarput, siunissamilu ingerlalluarnissaanik kissaapparput.

 ”Maanna qaammatit tallimat maaneereersimalerpunga, nikallungassutigilaarparalu tassa naariikatammata. Piffissaq ingerlapallaqaaq. Tamatumunngalu peqqutaavoq, qaammatit taakku tallimat misigisarpassuarnik ilisimalikkanillu nutaanik ulikkaarmata. Maani Christiansborgimi ilinniarninnut atatillugu suliffim-miinninni  periarfissaqarpunga Sara Olsvigip sulinera assigiinngitsorpassuartigut  malittarisallugu”, Karsten Jensen oqarpoq.

Siorna ukiakkut qinersinerup siornagut nalaanilu IA Savalimmiunilu partii Tjodveldi kattullugu ilinniarnermut atatillugu suliffimmiittuuteqarput, nalagaaffiit pissusiinik ilisimatuunngorniaq Birita i Dali, taassumalu suliffimmiinnini qinersinerup kingorna ukiakkut atuartitsinerup naanissaanut nangippaa, IA aamma Javnardarflokkurin sullillugit.

Piaartumik paasinarsivoq ilinniarnermut atatillugu suliffimmiittuuteqarneq pitsaaquterpassuaqartoq, taavalu IA Folketingimip pilersinneqarnerata kinguninngua Sara Olsvig Christiansborgimi allaffeqarfimmut suliffimmiittussarsioqqippoq. Karsten Jensen-ip tamanna akorluarpaa suliffimmiittussatullu tiguneqarluni.

”Karsten siullerpaatut maani IA Folketingimi kisermaatamik ilinniarnermut atatillugu suliffimmiittuutigaarput. Qaammatit kingulliit tallimat ingerlanerini aammaarluta uppernarsivarput, taamatut suliffimmiittuuteqarneq pitsaalluinnartuusoq, qularnanngitsumillu ukiuni tulliuttuni taamatut aaqqissussineq ingerla-tiinnassavarput. Karsten suleqatigiilluarsimanitsinnut IA Folketingimilu suliaanut annertuumut qutsavigerusupparai”, Sara Olsvig oqarpoq.

Folketingimi sulineq angalasariaqartarnernik nassataqarpoq, aningaasaateqarfinnullu qinnuteqarsimanini iluaqutsiullugu Karstenip angalanerit ilaannut peqataasinnaanini akissaqartippaa. Christiansborgimi suliffillit aamma periarfissaqarluarput politikerit sulinerannik malittarinninnissaminnut, folketingip inersuarmi ataatsimiittarfiani allatigullu. Periarfissat tamakku Karstenip atorluarpai.

”Island-imi Nunat Avannarliit SIunnersuisoqatigiivini ataatsmiinnernut peqataavunga, annertuumik misigisaqarfigisannik Montréal-imi IPY2012-imi isumasioqatigiinnermut peqataallunga, aammalu minnerunngisumik maani Folketingimi suleriaatsit takullugit namminerlu peqataaffigalugit uannut misigisaavoq anner-tooq. Peqataaffigivakka ministerinik, Folketingimut ilaasortanik assigiinngitsutigullu immikkut ilisimasalinnik ataatsimeeqateqarnerit aammalu piviusumik takuara politikki qanoq ineriartortarnersoq. Minnerunngitsumillu Folketingip inersuaani ataatsimiinnerit uannut assut pissarsinarnikuupput. Paasisaqarluaqaanga. Christiansborgimi ulluinnarni akuuneq assut maqaasissavara.”

Ilinniarnerminut atatillugu suliffimiinnermi nalaani ilinniartup Sara Olsvigip sulinera qanimut malittarivaa aammalu suliarisarlugit ataatsimiinnernut nalunaarusiat, imaqarniliornerit aallallu, aammattaarlu suliamik misiliisoq Christiansborgimi suliassat assigiinngissitaartorpassuit sulianerinut peqataasarpoq. Assersuutigalugu upernaaq manna IA Folketingimi aatsitassat nunanullu allanut politikkeqarneq pillugu angisuumik siumasioqatigiisitsivoq. Tassunga atatillugu suliamik misiliisup Karsten Jensen-ip isumasioqatigiinnissap imarisassaanik pilersaarusiorneq peqataaffigaa aammalu isumasioqatigiinnerup ingerlanera pillugu eqikkaalluni nalunaarusiamik allanneq akisussaaffigalugu.

”Maanna Nuummut angerlaqqilerpunga aasallu kingorna Ilimmarfimmi inuiaqatigiilerinermut ilinniarnera nangissallugu. Nassataraakka ilisimasat nutaarpassuit aammalu misilittakkat pitsaasut misigisallu nuannersut, qularnanngitsumik siunissami iluaqutigumaakkakka. Ilinniarninni suliffigiumaagassannilu. Taava aamma soorunami qujaffigerusuppakka Sara Olsvig ilinniarninnullu atasumik suliffimmiinninni matumani suleqatigisimasakka inuit nuannersorsuit. Ataaseq qularutissaanngilaq. Tassalu naggataamik Christiansborg isinngilara!” Karsten Jensen oqarpoq.

IA Folketingimi 2012-p ukiaanerani atuarfissamut tunngatillugu atuarnermut atatillugu suliffimmittussarsioqqereerpoq, augustillu qeqqani ilinniagartuunngorniarnermut atatillugu suliffimmiittussaq nutaaq Christiansborgimi aallartissaaq.

 

Print Friendly, PDF & Email