fbpx

Folkemødep ”Dialogpris”-ia Aajamut tunniunneqarpoq

Aatsaat siullerpaamik Folkemødets Dialogpris kalaallimut politikeriusumut tunniunneqarpoq. Nersornaat IA-p ukiorpassuarni folketingimut ilaasortaatitaanut Aaja Chemnnitz Larsen-imut pivoq. Aaja ukiuni arfinilinni folketingimi ilaasortaanermini angusarissaarluartarsimavoq, nalunnginneqarluarluni folketingip iluani pilersitsiviulluartumik aammalu inernilerniakkamik oqaloqateqarsinnaanerminik – soorlu ilaatigut kalaallit qallunaallu suleqatigiiffiliornermini meeqqanik inuusuttunillu kinguaassiutitigut atornerluisarnermi suliniuteqalerneq.

”Nuannaaqaanga” Aaja Folkemødets Dialogpris 2021-mi ajugaasimanermi oqalugiarfimmiit Allingemiittumi aqqarami oqarpoq.

”Nalunngilluarpara Kalaallit nunatsinni ikioqatigiikkaangatta nukittunerusartugut. Una nersornaat Kalaallit Nunatsinnut akissarsiaavoq, tanngassimaarutigaara ilissi sinnerlusi tigusinnaagakku. Kalaallit Nunatta nittarsaanneqarnera aammalu paasissutissiineq iluatsilluarsimaqaaq. Folketingimi Kalaallit Nunaat aammalu issittoq pillugu sukumiisumik ukkatarinninneq aammalu peqataarusussusermut uteriiserneq akilersinnaavoq. Takutippaa oqariartaaseq ”Uagut pineqartilluta uagut mininneqassanngilagut” tigulluarneqarsimasoq taamallu angusaqarsimaqaluta. Siunertaq suli tikinngilarput, kisianni angusaqangaatsiareeqaagut.”

”Uannut inunnik naapitsinermi qanilaarnissaq pisariaqaqaaq – angisuut mikisullu – taavalu pingaartinnerullugu inunnik paasinninnissaq, uannut paasinninnissaat pivallaarnagu. Ministerinik naapitsineq taavalu innuttaasunit saaffigineqarneq uannut pingaaqatigiipput, aammalu ammasumik ersarissumik attaveqatigiinneq pingaartuuvoq. Taamaattumik nuannersumik qisuariarfigineqartaqaaq. Facebookimi akissutini ersippoq, malinnitsinnit kaammattorneqarnera malugisimaqaara. Uummammit pisumit malinnitsinnut aamma taasisimasunut tamassinnut qujanaq.”

”Isumaqarpunga pingaaruteqarluinnartoq paqumigineqartut eqqartortassallugit, tassami anguniakkama ilagivaat inuit namminneq oqarsinnaanngitsunut oqariartuussissallunga. Isornartorsiorneqarneq uannut attuivallaarneq ajorpoq, nalunnginnakkumi suna uanga napassutigalugu. Aamma upperigakku annertuunik anguniagaqarneq, tassa tamatsinnut inuuneq pitsaanerusoq – ingammik atugarliortunut. Tamakku misigissutsikkut eqqortinnarlunilu annernarsinnaagaluaqisut. Qanorluunniit isumaqatigiitsiginngikkaluaraanni upperaara oqaloqatigiinnikkut angusaqarluartoqarsinnaasoq.” Aaja Chemnitz Larsen oqarpoq.

Ukiut tamaasa politikerimut tusarnaarluarsinnaasumut, Folkemødemi oqaloqatiginninnikkut aammalu ukiup siuliani oqallinnermi sunnertisimalluaqisumut Dialogpris tunniunneqartarpoq. Dialogpris nersornaatitut politikerimut tunniunneqartarpoq, oqaloqatiginninnermik piginnaasaqarluartumut – ukioq mannalu Inuit Ataqatigiinni Folketingimi ilaasortaatitaat Aaja Chemnitz Larsen-i ajugaavoq, innersuunneqartut akornanni ilaavoq Tommy Ahlers, aallakaatitassiami ”Løvens Hule”-miit ilisimaneqarluartoq aammalu siornatigut Uddannelses- og Forskningsministeriusimasoq.

del på de sociale medier

Share on facebook
Share on twitter
Share on linkedin