Navigate / search

Finansministeri Kalaallit Nunaat suleqatigilluassallugu neriorsuivoq

Tusagassiutinut nalunaarut

Aasaq naavoq IA-miillu folketingimi ilaasortaq Aaja Chemnitz Larseni sulileqqilluni. Sap. ak. tulliuttuni danskit naalakkersuisuisa ministerii nutaat naapissavai taamaalillunilu Kalaallit Nunaat oqaluuserisassanngortissallugu. Ass. finansministerip Nicolai Wammenip (S) Aaja naapikkumasimavaa tassani Kalaallit Nunaat suleqatigilluarumallugu qulakkeerinninniarluni.

“Uannut danskit naalakkersuisui qineqqusaarnerup aallartinnerani naapissallugit pingaaruteqarpoq. Suliassat Kalaallit Nunaannut tunngasut amerlapput politikeriniillu suliarineqartariaqarlutik. Innuttaasut ajornartorsiutaat politikerit inerniliiffigissavaat. Taamaammat danskit naalakkersuisuisa ammaneri tusarnaarumanerilu nuannaarutigisorujussuuakka – aallartiinnarianngorpugut”, Aaja Chemnitz Larseni ataatsimeereernerup kingorna oqarpoq. 

Politikkikkut pingaarnerutitassat

Folketingip ammanngilaattaani Inuit Ataqatigiinnit Aaja Chemnitz Larsenip IA Folketingimi politikkikkut qinigaaffimmi pingaarnerutitaannik saqqummiinissaminut piareersarpoq. Taamaattorli maanna erseqqarissereerpoq politiinut akissarsiat meeqqanullu sumiginnakkanut suliniutit ilungersuussassani siumut ilaasussaassut.

“Maanna pingaartilereerpara danskit naalakkersuisui ministerillu nutaat Kalaallit Nunaanni politiit akissarsiaannut meeqqanullu sumiginnakkanut suliassanik pimoorussilernissaat. Uannit qangali piumasaqaataanikuuvoq Danmarkimi Kalaallit Nunaannilu atorfillit suliaminnut assinganik akissarsisarnissaat. Taakku saniatigut nuannaarutigaara Kalaallit Nunaannit maanna Danmarkimut meeqqat sumiginnakkat pillugit iliuuseqartoqarnissaanut ikioqqugatta. Tamanna suliassaavoq imaannanngitsoq uannut aamma piffissamik atuiffiusussaasoq”, Aaja Chemnitz Larsen naggasiivoq.

Paasissutissat: Aajap sap. ak. tullerni ministerit naapitassai:

·         Finansministeri, Nicolai Wammen

·         Udenrigsministeri, Jeppe Kofod

·         Justitsministeri, Nick Hækkerup

·         Inooqatigiinnut tunngasunut ministeri- aamma indenrigsministeri, Astrid Krag

·         Forsvarsministeri, Trine Bramsen

·         Sulisitsinermut ministeri, Peter Hummelgaard

·         Piorsarsimassutsimut oqaluffeqarfinnullu ministeri, Joy Mogensen

·         Assartuinernut ministeri, Benny Engelbrecht

·         Inuussutissarsiornermut ministeri, Simon Kollerup

·         Silap pissusaanut – Nukissanut – Pilersuinermullu ministeri, Dan Jørgensen

·         Meeqqanut – Atuartitaanermullu ministeri, Pernille Rosenkrantz-Theil

·         Akileraaruteqarnermut ministeri, Morten Bødskov

Assiliisoq: Finansministeri Nicolai Wammen (S) aamma folketingimi ilaasortaq Aaja Chemnitz Larsen (IA)

Attavissaq: Aaja.Larsen@ft.dk imal. mobiili nr. +45 61624667

Print Friendly, PDF & Email