Navigate / search

Eqqartuussisoqarfik pitsanngorsaavigineqassaaq

Aaja C Larsen
Eqqartuussisoqarfik pitsanngorsaavigineqassaaq

Ataasinngormat 28. november Advokatit siunnersuisoqatigiiffiata Kalaallit Nunaanni Inatsisitigut isumannaatsuneq pillugu nalunaarusiaq saqqummiuppaat. Nalunaarusiaq ullumikkut pingasunngornermi 30. november Nuummi saqqummiunneqarpoq, tassanilu Inuit Ataqatigiit folketingimi ilaasortaatitaa Aaja Chemnitz Larsen peqataavoq. Nalunaarummi Kalaallit Nunaanni eqqartuussiveqarfimmi arlalissuartigut unammilligassaqartoq ersersinneqarpoq. Eqqartuussisoqarfik taassumalu ataani Kalaallit Nunaanni eqqartuussiveqarfik danskit akisussaaffeqarfigivaat, nalunaarusiarlu Inuit Ataqatigiinniit akuersorneqarpoq, taakkuami Eqqartuussisoqarfimmut tunngasut politikkikkut aallutarivaat.

Nalunaarusiaq inassuteqaatinik arlalissuarnik imaqarpoq, ilaatigut eqqartuussiveqarfimmut sulisutigut annertusaanissamut suliallu pisariusut ilungersunartullu inatsisilerituunit suliarineqartarnissaannut tunngasunik imaqarluni. Tamatuma saniatigut pingaartumik illersuisut kredsdommerillu pikkorissusissaasa qaffassarneqarnissaat kiisalu Kalaallit Nunaanni innuttaasut malittarisassanut inatsisinullu ilisimasaqarnerulernissaat inassutigineqarput. Aammattaaq Nuna Tamakkerlugu Illersuisuunermik pilersitsisoqarnissaanik maannalu piviusunngulersumik inassisoqarpoq, tamannarpiarlu IA-p Folketingimi sulissutigisimavaa.

Aaja Chemnitz Larsen, IA-p folketingimi ilaasortaatitaa nalunaarut saqqummiunneqareermat ima oqaaseqarpoq: “Nuannaarutissaavoq pisarpassuit IA-p sulissutigisimasai aamma Advokatit Siunnersuisoqatigiiannit taakkartorneqarmata. Inuiaqatigiit nukittussusaat eqqartuussiveqarnerup qanoq nukittutigineranit takussutissinneqartarpoq. Pingaarnersiuinermi salliutinneqarnerulissaaq tamannalu sukkanerpaamik pissaaq.”

Ukiumi nutaami Kalaallit Nunaanni eqqartuussisoqarfik pillugu tamanut ammasumik  Folketingimi tusarniaasitsinissaq IA Folketingimiit sulissutigineqarpoq. Tamannalu Inatsisartut Inatsisinut Ataatsimiititaliaat Naalakkersuisullu qanimut suleqatigalugit pisariaqarpoq. Tusarniaasitsineq pisap Folketingimi Inatsisartunilu politikkikkut aallunneqarnerata qaffassarneqarnissaanut peqataassaaq, pitsanngoriartitsinissanillu qulakkeerinnilluni.

Aaja Chemnitz Larsen oqarpoq: ”Tigussaasutut akuerisaasumik illersuisuusut pitsaanerusumik ilinniartinneqarnissaat sulinermilu atugarissaarnerulernissaat sulissutigissavakka, tassa saniatigooralugu suliaajunnaarsillugu, soorlu aamma kredsdommerit pisinnaasaasa qaffassarneqarnissaat aallutissagiga taamatullu suliaasa iluini fagiminni ineriartortinneqarnerat nukittorsarlugu. Maanna danskit naalakkersuisuisa, pingaartumillu Inatsiseqarnermut ministerip iliuusissaat tullinnguupput, taakkualu inassuteqaatit uku pillugit, kiisalu Kalaallit Nunaanni Inuttut pisinnaatitaaffinnut Siunnersuisoqatigiit kiisalu Institut for Menneskerettigheder eqqartuussisoqarfimmut tunngasutigut nalunaarusianni kingullermi inassuteqaataat pillugit oqaloqatigissavara.”

Link til rapporten Retssikkerhed i Grønland

Link til Institut for Menneskerettigheder/Grønlands råd for Menneskerettigheder status 2016


Attavissaq: Aaja.Larsen@ft.dk iml. mobil: +45 61624667

Print Friendly, PDF & Email