Navigate / search

Danskit aningaasanut inatsisaat: inatsisinik atuutsitsinermut tunngasut issittumilu nutaaliornikkut suliniut qulakkeerneqarput

Asseq: Inuit Ataqatigiit Folketingimi

Ippassaq danskit 2020-imut aningaasanut inatsisissaat saqqummiunneqarmat sapaatit akunnerini arlalissuarni isumaqatigiinniarsimanerit naammassipput. Inuit Ataqatigiinniit folketingimi ilaasortap politiit pinerluttunullu inissiisarfinni paarsisut akissaataasa qaffanneqarnissaat kiisalu Issittumi unammilligassanut aaqqiissutissarsiornissaq siunertaralugu Sisimiuni Arctic Circle Fab Lab-ip pilersinneqarnissaa isumaqatigiinniarnerni sorsuutigisimai.

Inuit Ataqatigiit folketingimi ilaasortaatitaata aningaasanullu ministerip Nicolai Wammenip sivisuumik isumaqatigiinniareerneranni inatsisinik atuutsitsinermut tunngasut pitsanngorsarneqarnissaannut ukiunut sisamanut atuuttussamik 50 mill. kr.-it illikatinneqassasut isumaqatigiissutigineqarpoq. Folketingimi ilaasortap Aaja Chemnitz Larsenip aningaasat qanoq agguataarneqarnissaannut aallarniutitut justitsministeri ataatsimeeqatigiumasimavaa. IA-p folketingimi ilaasortaatitaata politiit inissiisarfinnilu paarsisut aningaasarsiaasa qaffanneqarnissaat aammalu aqqusinerni politiit amerlanerulernissaat kiisalu meeqqanut illersuisutigut aaqqissuussap siammarnerunissaanut ilaatigut aningaasat atorneqarnissaannut kissaatini saqqummiutissavai. Aningaasanut ministerimik isumaqatiginiarnermini inatsisinik atuutsitsinermut puljemimut 1/1-2020-imi atuutilersussamut ilikkartinneqartut atuutsinneqarnissaat piumasarisimavaa.

Inuit Ataqatigiit folketingimi ilaasortaatitaat oqarpoq: ”Aammaarluta aningaasanut inatsimmut inatsisinillu atuutsitsinermut tunngasunut sunniuteqarluarpugut, justitspuljellu 2017-meersup nanginneqarneratut ukiuni arlalinngortuni sorsuutigisimasatsitut pitsanngorsaatit pisussanngorput. Justitsspuljep matuma qanoq agguataarneqarnissaanut juullertinnagu paasisaqassaagut. Politiit inissiisarfinnilu paarsisut akissaatitigut qaffaavigineqarnissaat, aqqusinerni politiit amerlisarneqarnissaat meeqqanullu illersuisut amerlinissaat pingaarnerutissavagut.”

Justitspuljemi 2017-meersumi eqqaaneqartumi ukiunut 2018-2021 inatsisitigut atuutsitsinikkut pitsanngorsaatissatut taamanikkut 2017-imi ukiakkut Inuit Ataqatigiit folketingimi ilaasortaatitaata ukiumut 10 mill. kr.-it qulakkeersimavai.

Politiit inissiisarfinnilu paarsisut aningaasarsiaanut tunngasut folketingimi ilaasortap pingaarnertut inissisimatippai: ”Politiit inissiisarfinnilu paarsisut akissaatitigut pitsanngorsaavigineqarnissaat qineqqusaarutigisimavara, sulianummi assigiinnut akissaatit assigiittariaqarput. Maannalu justitspuljemi matumani aningaasat illikartinneqarput, akissaatillu qaffannissaasa piviusunngortinnissaat tamakkiisumik suliniutigissavara”, Aaja Chemnitz Larsen oqarpoq.

Tamatuma saniatigut Arctic Circle Fablab-imut, tassa Sisimiuni nutaaliorfissamut aningaasat qulakkeerneqarput, tassanilu DTU Arctic-imi KTI-milu ilinniartut kiisalu nuna tamakkerlugu aallarnisaasut misileraallutillu ineriartortitsisinnaanngussapput. Aamma ilaatigut Islandimi Savalimmiunilu Fablab-eqarput.

Taamatuttaaq ICC-p Issittumi Siunnersuisoqatigiinni kiisalu FN-imi 2020-mi sulinissaanut Nunanut Allanut ministeriaqarfimmiit 1 mio. kr.-inik aningaasaliisoqarnissaa IA-p folketingimi ilaasortaanit qulakkeerneqarpoq.

Print Friendly, PDF & Email