Navigate / search

Danmarkimi palasit kalaallit ataatsimik ilaneqarnerat IA-p nuannaarutigivaa

Bertel Haarder Aaja C Larsen-lu
Danmarkimi palasit kalaallit ataatsimik ilaneqarnerat IA-p nuannaarutigivaa

Inuit Ataqatigiit sinnerlugit folketingimi ilaasortaatitap Aaja Chemnitz Larsenip Danmarkimi kalaallisut upperisarsiornermik aallussinerusinnaaneq arlaleriarluni ujartortarsimavaa. Maannalu folketingimi ilaasortaq ilageeqarnermut ministerimit Bertel Haarrderimit (V) allagarsivoq oqaluttuunneqarlunilu palasit ilaneqarnissaannik kissaat akuersorneqarsimasoq.

Kalaallit Danmarkimiittut 16.000-t sinneqartut namminneq ilagiit sinniiseqarnissaminnut periarfissaqartariaqarput, kalaallinullu Danmarkimi najugaqartunut palasit amerlanerusariaqartut kalaallit folketingimi ilaasortaatitaat Aaja Chemnitz Larsen isumaqarpoq. Ullumikkut Danmarki tamakkerlugu palasi kalaaleq ataasiinnaq atorfeqartinneqarpoq, taannalu danskit ilageeqarnermut miniateriaqarfiata ataani inissisimavoq. Taassuma saniatigut Namminersorlutik Oqartussat kalaallinut Danmarkimiittunut palasitut sullissisussamik ataatsimik atorfeqartitsipput, taannalu ilinniartut, peqqissariartut imaluunniit assersuutigalugu Herstedvesterimi paarnaarussat atortarpaat.

Aaja Chemnitz Larsenip kalaallit Danmarkimiittut namminneq oqaatsitik atorlugit kuisitsinerni, katinnerni, apersortinninnerni imaluunniit ilisinerni palaseqarnikkut periarfissaqarnerunissaannik ujartuisimavoq. Taamaattumillu maanna ilagiinnut kalaallinut Danmarkimiittunut palasit kalaallit ilaneqalernerat Aajap nuannaarutigivaa. Aajamut allakkamini ilageeqarnermut ministeri Bertel Haarder allappoq, taamatuttaaq 2017-imi ilaagiit kalaallit sinniiseqalernissaannut periarfissat aamma qimerloorneqassasut.

”Danmarkimi angalasarninni kalaallit 400-t tikillugit oqaloqatigereernerisigut palasinik kalaallisut oqaluttunik amerlanerusunik pisariaqartitsinerat uppernarsisarsimavara. Aamma ilageeqarnermut ministerimik Bertel Haarderimik kiisalu Ilageeqarnermut Naalakkersuisumik Nivi Olsenimik oqaloqateqartarninni ajornartorsiut tamanna eqqartortarsimavarput, taamaattumillu kalaallinut Danmarkimiittunut 16.000-iusunut maanna palasit ilaneqarnerat soorunami assut nuannaarutigivara”, Aaja Chemnitz Larsen oqarpoq.

Aamma Inuit Ataqatigiit ilaasortaatitaata Aaja Chemnitz Larsenip danskit ilagiivisa ataanni palasit kalaallit ilaneqarnissaannut pisariaqartitsineq pillugu kalaallinut Danmarkimiittunut palasi, Oline Berthelsen, naapeqatigisimavaa. Kalaallit Danmarkimiittut ullumikkut 16.202-iupput.

 

Attavissaq: Aaja.Larsen@ft.dk imal. +45 61624667.

Print Friendly, PDF & Email