Danmarkimi Naalagaaffeqatigiinneq attatiinnarumallugu iperaasoqartariaqartarpoq

Folketingimi partiinut siulittaasunut oqallinnermut sivitsukkamut oqalugiaat

13-04-2021

Kalaallit Nunaanni nutaanik naalakkersuisoqalerpoq. Naalakkersuisut nutaat. Tamanna Inuit Ataqatigiit sapaatip akunnermi qaangiuttumi ajugaarujussuarnerannit pivoq – tamanna politikkikkut oqaluttuarisaanermi ajugaarujussuarneruvoq. Folketingimi ataatsimoornitsinni Kalaallit Nunaanni nalaakkersuisuni naalakkersuisoqatigiinnissamut isumaqatigiinninniartoqaleruttorpoq.

Naalagaaffeqatigiinni ingerlaartumik akunnattoorfeqartuartarpugut. Danmarkimi Naalagaaffeqatigiinneq attatiinnarumallugu iperaasoqartariaqartarpoq. Taamaammat ataatsimut ilinniarnerup qaffasissusissaa inuussutissarsiornermilu ineriartortitsinissaq pitsanngorsartariaqarpagut. Sammisat taakku marluk Kalaallit Nunaanni ineriartornissamut tunngaviliisussaapput. Ineriartorneq taanna Danmarkimit qunugineqarnani tapersersorneqartussaavoq.

Malinnaasimasut amerlasuut malugisimavaat Danmarkimi tusagassiuutit Kalaallit Nunaanni qineqqusaarnermik sammisaqarsimasut pingaartumik namminiilivinnissamik eqqartuineraasimaneri. Tamanna eqqortumik takutitsinerunngilaq.

Qineqqusaarnermi Kuannersuit, atugarissaarnissaq qanilaarnissarlu assut aamma sammineqarput. Qanoq ililluta meeqqat atugarliortut inuillu innarluutillit ikiussanerigut eqqartorneqarlutik. Qanorlu isilluta inuusuttut ilinniarnissaat suli pitsanngorsartuassanerigut eqqartorneqarpoq. Minnerunngitsumik inuiaqatigiinni peqqissuunissaq utoqqartatsinnullu inuulluarnissap pitsanngorsarnissaa eqqartorneqarluni.

Qineqqusaarluni ataatsimiinnerni inuiaqatigiit atugarissaarnermut tunngasunut unammillernartitatik pillugit apersuipput. Assigiinngissuseq apeqqutigisarlugu. Qanoq isilluta kinguaassiuutitigut atornerluinerit pinaveersaartinniarnerigut, nakuusernerit imminortarnerillu qanoq pinaveersaartinniarnerigut apersuillutik. Qanoq ililluta amerlanerit sulilersissinnaanerigut. Qineqqusaarluni ataatsimiinnerni tamakku apeqqutigineqartarput qineqqusaarnerlu aamma taakkununnga tunngassuteqarpoq.

Inuit Ataqatigiinnit arlaleriarluni uteqattaarneqartarnikuuvoq Kalaallit Nunaanni atugarissaarnerup tungaatigut peruluttoqartoq. Uagut tamanna inerniliiffigissallugu pingaartinnerpaavarput. Tamanna qinersisut qinersimavaat – aqagumullu namminiilivinnissamut neriorsuinerit qinernagit.

Naalakkersuisut nutaat tassaapput politikerit uattut kinguaariinnit tassanit pisut. Namminersornerullutik Oqartussat meerarivaatigut nammineerusunnerlu nalunngittuaannarnikuuarput. Allatut oqaatigalugu piffissami inuuffitsinnit sanaajuvugut.

Neriuppunga inernileerusussuseqarnerusumik, sulili peqqissaarnerusumik Nunatsinnilu aqqummut ingerlaffigerusutamut ersarinnerusumik takujumaarluta. Immikkut, kisianni aamma ataatsikkut. Tusartuanngikkaluarlugu Naalagaaffeqatigiinnerput nunanut allanut amerlasuunut maligassiuinertut isigineqartarpoq nunallu inoqqaavisa assersuutissatut nuannersutut isigisarpaatigut, arlalitsigut aamma katinngarmik immitsinnut nuannaraluta suleqatigiittarpugut.

Qinersineq neriulluarniarnermik neriuummillu pilersitsivoq. Inuit Ataqatigiit akisussaaffitsik suliassatillu nalunngilluarpaat. Uagut upperaarput uagut suliassat taakku Kalaallit Nunaannit Naalagaaffeqatigiinnermiillu sakkussagut piginnaasagullu atorlugit inerniliiffigisinnaallugit.

Qujanaq. Oqaaseqartitaaninnut qujanaq.

del på de sociale medier

Share on facebook
Share on twitter
Share on linkedin