Danmarkimi angerlarsimaffeqanngitsunut ineriartortitsineq Danmarkimit taamaallaat mumisinneqarsinnaanngilaq

Danmarkimi angerlarsimaffeqanngitsut ataatsimut ikiliartoraluartut kalaallit angerlarsimaffeqanngitsut 2013-imili angerlarsimaffeqanngitsut Kalaallit Nunaanneersut kisinneqartalermatali amerliartuinnarneri takuneqarsinnaapput. Statsministerip Mette Frederiksenip naapinnerani (S) Folketingimi ilaasortap Aaja Chemnitz Larsenip (IA) Naalakkersuisut danskillu naalakkersuisui ataatsimut angerlarsimaffeqannginnermut suliniuteqarnissaannik siunnersuivoq. 

”Angerlarsimaffeqannginneq inittoraluttuinnarpoq – Nunatsinni Danmarkimilu. Kommunit amerliartortut akunnittarfinnik pilersitsisalerput, taakkulu tuaviinnaq ulikkaartarlutik. Akunnittarfiit pisariaqarput, taamaaliornerli ikuallattumik qamitsinerinnartut nalilerneqarsinnaalluni. Ineriartorneq taamaattoq akuerisassaanngilaq uangalu isumaqarpunga Nunatta avataanit ikioqatigiinnikkut inerniliisoqarsinnaasoq. Meeqqanik atugarliortunik ikiuinialeratta takutinnikuuarput ikioqatigiissinnaalluta, maanna angerlarsimaffeqanngitsut amerliartortut tungaatigut inerniliisinnaavugut”.

”Arlallit atugarissaarnermut ikiorneqartussaagaluarlutik nakkaannarneq misigisarpaat. Pingaartumik ineqarnermut politikkerput kukkunertaqarpoq. Atorfillit illui piviusunngunnginnermit naliginnaanerupput. Atorfilittut illoqarnermi ajoqutaa tassaavoq suliffiup annaanerani angerlarsimaffik aamma annaaneqartarnera. Isertitaqanngikkaanni angerlarsimaffeqarnanilu amerlasuut inuunermut ajunnginnerusumut piumallutik siumuinnaq Danmarkimut aallartarput. Tamannali tamatigut ajunngitsumik inerneqarneq ajorpoq”.

”Arlallit attaveqaqateqarpiarneq ajorput imaluunniit Danmarkimi ataqatigiimmik aaqqissuussanut suliffinnik inissamilluunniit pissarsisinnaasunik ilisimasaqarneq ajorlutik. Statsministeri Mette Frederikseni naapikkakku oqariartuutigaara suleqatigiinnerulernissaq pisariaqartinneqartoq. Inuit aasami angalanerminni nooriataannginneranni imaluunniit feeriaqarnersiutinik akilersinneqannginneranni ikiorneqartariaqartassapput. Imaassinnaavoq suliffinnut suliniutinut inissinnissaannut ikiorneqassasut imaluunniit nuunnissamik pilersaarusiornissamut ikiorneqartassasut. Taamaaliornermi Danmarkimut angerlarsimaffeqannginnermut ikinnerusut  pinissai qulakkeerneqassapput. Nalunaarusiaq Fra Grønland til gaden saqqummeqqammersoq qanoq iliornissatsinnut tikkuussivoq Nunatsinnilu angerlarsimaffeqanngitsunut suliniutitsinnut pitsanngorsaanissamut isumasiorfissaalluni, soorlu aamma Danmarkimi naalakkersuisuttalu akornanni isumasiorfissatut atorneqarsinnaalluni”.

 

Rapporteq Fra Grønland til gaden linki una malillugu atuarneqarsinnaavoq: https://menneskermedmere.dk/wp-content/uploads/2020/11/FraGroenlandTilGaden.pdf

del på de sociale medier

Share on facebook
Share on twitter
Share on linkedin