Borgmesterimut Palle Jeremiassenimut akissut

Folketingimi ilaasortamit Aaja Chemnitz Larsenimit allataq, Inuit Ataqatigiit.

Folketingip ammaanersiornerani oqallinnerup kingorna amerlasoorpassuit nuannersumik utertitsisimapput ikinnerillu nuanniinnerusumik qisuariarsimallutik. Kingullermi taasannik qisuariartut uannit itisiliinermik pisariaqartitsipput.

Piffissami kingullermi isorniarpaluttumik nipaqartumik qisuariartut ilaanniippoq Avannaata Kommuniani borgmesteri Palle Jeremiasseni. Pallep nalunaarnerani ataasinnguamilluunniit inooqatigiit akornanni ajornartorsiutinut, peqqinnissaqarfimmit sulissussinermut appariartuinnartumut nunaqarfinnilu inuunermut periarfissanut killeqarnermut, soorlu aamma illoqarfinni periarfissat killeqartut eqqaaneqanngillat.

Borgmesterip oqaaserisannut isiginninnera uanni tupigusutsitsivoq. Inerniliussaasinnaasut ammasumik unneqqarissumillu eqqartorsinnaasariaqarpagut, ass. politiit nunaqarfinni kinguaassiutitigut atornerluinernik kingusissukkut nalunaarutiginnittarnernik eqqartuigaangata, ilami Naalakkersuisut nalunaarusiaanni takusinnaagatsigu nunaqarfinni illoqarfinnut sanilliullugu kinguaassiutitigut atornerluinerit amerlanerusut. Tiliumit aamma uparuarneqarpoq innarluutilinnut avinngarusimasuni maannakkut inuunermut atukkat illersorneqarsinnaanngimmata. Soorunami tamanna sumi tamaani atuutinngilaq, nunaqarfinnili pisuni akisussaaffigiumannginninnermik atuinata inernissanik oqaluuserinnissinnaasariaqarpugut.

“Atugarissaarnerup” suuneranik isumasiuutersuineq uannut nigorterinertut paasisassaavoq. Uannut innuttaasut inuulluarnissaat pingaarneruvoq – umiatsiaaqqamik peqarluni, aalisarsinnaalluni, piniarsinnaalluni, kalaaliminernik nerisinnaalluni, il. il. Tassa inuunermi naleqartitassat. Atugarissaarnerli aamma peqataasussaavoq, nuannaarneq meeqqanut kinguaassiutitigut atornerlunneqartunut katanneqartarmat ilaqutariillu meerallit piitsuusut amerliartorlutik.

Taamaammat apeqqut ima nipaqarpoq: Napparsimalissagaluarutta ikiorneqarnissatta tungaatigut, meeqqatta atuarnissaannut utoqqartattalu paarsarineqarnissaannut qulakkeerinnissagutta qanoq iliussaagut? Atugarissaarneq kalaallisullu inuuneq tulluarsarneqartussaapput, sumili tamani taamatut inissisimanngilagut. Ikiorneqarnissaq sumi tamani pissarsiarineqarsinnaanngilaq, ilimagaarali tamanna borgemesterip nalunngikkaa. Ilimagilluinnarpara nammineerluta imal. meeqqagut napparsimalissagaluarpata peqqissaasumit nakorsamilluunniit ikiorneqarusussalluta – imaluunniit nunaqarfimmi toqqissisimanngitsoqassappat kommunefogedimit ikiorneqarnissarput pisariaqartinneqartoq isumaqatigiissutigisinnaassagipput ilimagalugu.

Qinikkatut suliassaqarlutalu pisussaavugut innuttaasut tusarnaassallugit unammillernartullu naapitaat inerniliiffigissallugit aamma pisussaaffeqarluta. Tassani atugarissaarneq – soorlu peqqissuuneq, ilinniarneq inooqatigiillu akornanni atugarliornerit – suliassat annersaraat. Uanga nammineerlunga nunaqarfinni eqqartuussisoqarnerup tungaatigut tapeeqataallungalu akisussaassusermik tiguserusuppunga. Isornartorsiorneqarninni takorluukkanik, kinguneqartussamik isumaliornermik qanorlu atugarissaarnissamut aningaasaqarnitsinnullu inerniliisinnaanermut ineriartortitsinissamut eqqarsarnermik takutitsisoqarnissaanik amigaateqarpunga. Pingaartumik najukkani ingerlalluarfiunngitsuni. Taamaammat isumaqarpunga sumiiffiit ingerlalluartut taagussallugit ajornanngippallaartoq, taamaalionermimi innuttaaqataasut amerlasuut ajornartorsiutit ulluinnarni naapittagaat iliuuseqarfigineqanngitsoorsinnaammata.

Palle Jeremiassenip Avannaata Kommuniani inooqatigiinni atugarissaarnermilu ajornartorsiuteqanngitsutut inissiisinnaappat nuannaarutigissagaluarpara. Ilimaginngilarali piviusumi taamatut inissisimasoqartoq. Taamaammat borgmesterip inernissanut siunnersuinissaanut neriuuteqaraluarpunga, oqalutsinneqarnanga qanorlu atugarissaarnermik isumasiornermut tunngatillugu eqqartuineq atornagu inernissanik siunnersuisoqarnissaa kissaatigigaluarpara.

Ilumoorpoq, nunaqarfiit arlallit ingerlalluarput. Taamaammat oqallinneq una siornatigut oqallinnernut allaanerusumik nunaqarfiit tamaasa ajortutut ingerlaneraanermik imaqanngitsumik ingerlanneqassaaq. Ataatsimut inuunermut ajunngitsumut ingerlatsinissamik qulakkeerinnittariaqarpugut, aamma inunnut najugaqarfimminnit nuuttartunut.

Maannakkut nunaqarfinnut ataatsimiisitsinissaq nunaqarfinnut peqatigiiffinnut siulittaasup Jens Kristian Therkelsenip KANUKUPE-mit ujartortariigaata piviusunngortinnissaa piukkunnarluinnarpoq. Ilisimatuutut misissuinerit takutikkaluarpaat nunaqarfimmiut arlallit ajunngitsunik inuuneqartut, taamaattorli suli nuna tamakkerlugu qanoq suliniutit ajunngitsut piviusunngortissanerlugit pilersaarusiortariaqalerpugut. Iliuuserineqartoq taanna malugineqarsinnaasariaqarpoq – pingaartumik nunaqarfinni inuuniarneq artornartillugu. Inerniliussinnaasatsinnik eqqartueqatigiitta aporfiusinnaasut eqqartuinnarnagit.

 

del på de sociale medier

Share on facebook
Share on twitter
Share on linkedin