fbpx

Angallannermut politikki ilorraap tungaanut saqili

Allattoq  Aaja Chemnitz Larsen, Folketingimi ilaasortaq, Inuit Ataqatigiit

Folketingimi inissisimaffinniit angallannermut ministerip Kalaallit Nunaannut akisussaaffimminik pingaartitsinerunissaanik kissaateqarpunga – susassaqarfimmi uninngatiinnarneqarpoq.

Biilit nakkutigineqannginnerat

Pisat assigiinngitsut isumakulunnartoqartippakka. Assersuutigalugu biilinik nakkutilliinermut tunngasoq. Aquutit, siggartaatit qulliillu tamatigut ajunngilluinnartumik atuuttussaapput. Danmarkimi biilit ukioq allortarlugit misissorneqartarput, misissortinngitsooraannilu biilip normua peerneqarsinnaasarpoq, isumannaatsuunissarmi pingaaruteqarpoq.

Kalaallit Nunaanni biilit nakkutigineqarnerannut naalagaaffik akisussaasuuvoq, taamaattorli 1999-imili biilinik ataasinnguanilluunniit misissuisoqarsimanngilaq. Tassa ukiuni 22-ni misissuisoqarsimanngilaq. Kalaallit Nunaanni aquutit, bremsit nipimullu annikillisaatit ajoquteqannginnissaannik kissaassiinnartariaqarpugut. Tamannalu Danmarkimi akuerineqarnavianngikkaluarpoq. Bussinik ingerlatsiviit namminneq biiliminnik nakkutilliisarput, taamaasillutillu angallassinerminni isumannaatsuunissartik isumagisarlugu.

2005-imiit biilinik nakkutilliineq pillugu danskit naalakkersuisui Naalakkersuisunik isumaqatiginninniartarsimapput. Aaqqiinissaq annikinnerusoq eqqartorneqartarsimavoq, tamannali innuttaasut isumannaatsuunissaannut naammanngilaq. Tamannalu pissutigalugu Naalakkersuisut itigartitsisarsimapput. Kalaallit Nunaanni biilit nakkutigineqallattaartarnerat sukkanerpaamik eqqunneqartariaqarpoq.

Angallannikkut inatsit eqquinerluppoq

Angallanikkut inatsisip kalaallinut naleqqussarlugu nutarterneqarnissaa pisariaqarpoq. Sumiiffiit tamarmik asfaltikkanik aqqusineqanngillat, taakkunanilu ATV-iit sunut tamanut atortariaqartarput. Inuit napparsimasut innarluutillillu angallanneqartarput, allakkat assartorneqartarput ATV-llu inuussutissarsiuteqartunit atorneqartarlutik.

ATV-inilli ingerlatsiniaraanni taakkununnga kørekorteqartoqartariaqarpoq. Sumiiffinnilu tamani kørekorti tamanna pissarsiassaanngilaq. Taamaannerani angallassinissanut periarfissatigut naligiinngittoqarpoq, inuillu angallannikkut atugarissaannginnerusuniittut eqqorneqartarlutik.

ATV-iit snescooteritulli pineqartariaqalerput, tamannami arlalippassuartigut tulluarnerussaaq. Kissaat tamanna ministerimut arlaleriarlunga apuuttarsimavara, ilisimavaralu Naalakkersuisut tassunga aaqqiissutissamik kissaateqartuttaaq.

Biilernermut allagartut nakkutigineqarnerat

Biilernermut allagartanut tunngasut immikkoortuisa ilaat misissorneqartariaqarput. Assersuutigalugu biilernermut allagartaagallartumik pissarsisinnaanermut tunngasut. Danmarkimi najugaqartilluni Kalaallit Nunaanni biilernermut allagartaq tammaagaanni, taava Kalaallit Nunaannut nutaamik pissarsiniartoqartariaqartarpoq. Ataqatigiinngittoqarpoq. Pingaartumik 2019-imi inatsisip allanngortinneqarneratigut akunnerni marlunni akuerisaasumik ilinniartitsisulerluni biilernissamut ilinniartinneqareernikkut kalaallit biilernermut allagartaat Danmarkimi atorneqarsinnaalersinneqarnerat eqqarsaatigalugu.

Inatsisip allanngortinneqarnera tamanna siuttuuffigivara, assigiiaartunilli atugassaqartitsilernissaq angorusunnerullugu; Kalaallit Nunaanni biilernermut allagartartaarnissatigut sukanganerusunik malittarisassaqalernissaa, assersuutigalugulu soorlu savalimmiormiut taamatut atugassaqartut kalaallit biilernermut allagartaasa danskit allagartaannut nooriaannanngortinneqarnissaannut periarfissamik ammaassinissaq.

Pisaq alla aaqqittariaqartoq tassaavoq biilernermut allagartamik digitaliusumik pissarsisinnaanissaq. Danmarkimi app-kørekorti atorneqarsinnaavoq, taamaattorli taamaallaat danskit kørekortiinut atorsinnaalluni. App-i Danmarkimi kalaallit biilernermut allagartallit aamma atorsinnaasariaqarpaat, tassa eqqaamiut, suleqatit ikinngutillu allat assigalugit digitalitigut aaqqiissutit atorsinnaasariaqarlugit.

Ataatsimut isigalugit pitsanngoriaatit

Ataatsimut isigalugu angallannikkut isumannaatsuunissatigut pitsanngorsaassaagut. Biilernermut allagartat eqqarsaatigalugit allattariarsornikkut teoriprøvet assigiissarneqarnissaat pisariaqarpoq, biilernermut ilinniartinneqarnermi akunnerit atugassat aalajangersimasumik amerlassusilerneqartariaqarput, manøvrebanet atorlugit kiisalu unnukkut biilernermik aamma ilinniartitsisoqartariaqarpoq.

Angallannermut angallassinermullu tunngasut tassaapput qinikkatut saaffiginnissutitigut tigusaqarnerpaaffigisartakkakka. Biilinut allagartat ATV-nullu tunngasut kalaalerpassuit ulluinnarni inuuneranni qitiusuupput, Kalaallit Nunaanni Danmarkimiluunniit najugaqarpata apeqqutaanani.

Ukiuni 22-ni biilinik misissuisoqanngitsoq. ATV-iit allatut inissinneqartariaqarneri. Inatsisit pisoqalisut. Naalakkersuisut kinguleriiaattut Kalaallit Nunaanni angallannikkut isumannaallisaanikkut aaqqiinngitsoortartut.

Asasara angallannermut ministeri – suliassaq aallartiguk Kalaallit Nunaallu salliutinneruleruk!

del på de sociale medier

Share on facebook
Share on twitter
Share on linkedin