Aajap Danmarkimi tusagassiuuteqarnerup tungaatigut isumaqatigiilernissamut Kalaallit Nunaannit ilaasoqarnissaa qulakkeerpaa

Akuttunngitsumik tusartarparput Danmarkimi Kalaallit Nunaat pillugu ilisimasaqarnerunissamik pisariaqartitsisoqartartoq. Tamanna peqqutigalugu Inuit Ataqatigiit Folketingimi ukiorpassuarni Danmarkimi inuiaqatigiit akornanni Kalaallit Nunaat pillugu ilisimasaqarnerusoqarnissaa sulissutigisarnikuaat suliaqarnerlu taanna maanna ingerlanneqaqqissinnaalerpoq, tassa folketingimi ilaasortat Atlantikup avannarpasissuanneersut tusagassiuuteqarnerup tungaatigut isumaqatigiilernermut siullermeersumik qaaqqusaaneri tunuliaqutigalugu. Tamanna folketingimi ilaasortap Aaja Chemnitz Larsenip suliniuteqarneranit pilersinneqarsimavoq.

”Danmarkimi tusagassiuutit Kalaallit Nunaat mutiusoq suli annikippallaartumik eqqartortarpaat. Tassunga uanga allanngueqataarusuppunga maannalu Kulturministeri Joy Mogenseni (S) ilagalugu tusagassiuuteqarnermut tunngatillugu sunneeqataasinnaalernikuulluta. Tamanna nuannaarutigaara siumut isigissagutta ileqqutoqqatut ingerlanneqalersinnaammat. Kalaallit Nunaanni filmiliornermi ingerlatsisunik, filmiliortartunik, isiginnaartitsisartunik eqqumiitsuliortartunillu pikkorissunik ulikkaarpugut taakkulu soorunami Danmarkimi isiginnaartartunut aamma apuunneqarnissaminnut periarfissinneqassapput taamaalillutillu assit filmillu aqqutigalugit nunarput pillugu oqaluttualiorsinnaanissaminnut periarfissinneqassallutik”, Aaja Chemnitz Larseni aallarniivoq.

Folketingimi politikerip arlaleriarluni tusagassiuutit tungaatigut isumaqatigiilernermut ilaanissaminut piumanini takutittarsimavaa. Kingullermik taamak pisoqarmat isumasioqatigiissitaq aqqutigalugu Kultoorikkut ataatsimiititaliami Aaja Chemnitz Larsenimit ilaanissamut aperisoqarpoq taassumallu kingorna kulturministerip Atlantikup avannarpasissuanit ilaasortat qaaqquneqarnissaat qularnaveeqqummik neriorsorsimallugit, tamannalu tusarluarnarpoq. Tusagassiuutitigut isumaqatigiilernermi ass. DR-imut TV2-mullu aallakkaatitassiat imaannut piumasaqaatinik pilersitsisoqarsinnaavoq taamatullu Kalaallit Nunaat mutiusoq pillugu aallakaatitassianik paasissutissiisunik ilanngussinissamut ammaasuusinnaalluni.

”Tusagassiuutitigut isumaqatigiilerneq uannut pingaaruteqartuuvoq ilisimasanut qaffassaanermut iluaqutaasinnaammat Danmarkimilu assigiinngissitaarnerusumik Kalaallit Nunaat takutinneqarsinnaalluni. Tamanna ullutsinni ajoraluartumik assiigiinngissitaarpallaanngitsumik killiffeqarpoq. Tamanna uanga allanngueqataaffigerusuppara. Piniinnarnerma kingunera nuannaarutigaara nuannaarutigalugulu maanna Kalaallit Nunaannit isumaqatigiinniarnerni ministeri ilagalugu ilaasoqarsinnaanera”, folketingimi ilaasortaq Aaja Chemnitz Larseni oqarpoq.

Tusagassiuutitigut isumaqatigiinniarnerni kalaallinit sunniisoqassappat ilisimasakinnerup kingunerisaanik silaannaqanngitsutut inissisimanermut immersuisoqarsinnaavoq taamatullu tusagassiuutit aqqutigalugit ilisimatitsinermut isummanik pigiliutiinnakkanik unammillertoqalersinnaalluni ataatsimullu paaseqatigiinnissamut qulakkeerinnittoqarsinnaalluni. Folketingimi kalaallit ilaasortat isumaqatigiinnernut taamaattunut ilaasarnikuunngillat, kisianni Aajap inooqatigiinnut tunngasunut isumaqatigiinniarnerni politiinullu tunngasunut isumaqatigiinniarnerni ilaanissamut ammaassisareernikuuvoq, neriuppugullu pinerluttunik isumaginnittoqarfiup- aamma illersornissaqarfiup tungaatigut isumaqatigiinniartoqalerpat ilaanissaq aamma qulakkeerneqarumaartoq.

del på de sociale medier

Share on facebook
Share on twitter
Share on linkedin