Navigate / search

Aajakkut Kim Leinelu Kalaallit eqqumiitsuliaannut takorluukkat pillugit oqaloqatigiittut

Asseq: IA Folketingimi
Asseq: IA Folketingimi

Folketingimi ilaasortap Aaja Chemnitz Larsenip (IA) atuakkiortoq nersornaatisisartoq, nunatsinnilu ukiorpaalunni najugaqarsimasoq atuakkiornerminilu Kalaallit Nunaannik aallaaveqartumik oqaluttualiortartoq, Kim Leine, ataatsimeeqatigisimavaa. Ataatsimeeqatigiinneq kalaallit eqqumiitsuliaannut tunngasunik, taamatullu kalaallit kulturiata Danmarkimi, Nunani Avannarlerni nunarsuattalu sinnerani qanoq atuuffeqarsinnaaneranut tunngasunik Inuit Ataqatigiit Folketingimi aallussiniarneranni alloriarneruvoq siulleq.

Aaja Chemnitz Larsen ima oqarpoq: ”Eqqumiitsuliorneq kulturilu Nunat Avannarliit nunarsuattalu sinnerani Kalaallit Nunaannik paasinnittaaseqarneranni pingaaruteqartutut ilaalluinnarput. Taamaattumik piffissami aggersumi kalaallit eqqumiitsuliortut oqaloqatigisassavakka, tassa uagut nammineq inuiaqatigiittut paasisimasaqassutsitsinnik nukittorsaanissatsinni nunarsuattalu sinneranut sammiveqarnitsinni eqqumiitsuliornerup qanoq atuuffeqarsinnaaneranut tunngasunik tusagaqarusullunga.”

Taamaasillunilu Aaja Chemnitz Larsen sapaatip akunnerani tullermi, januarip 18-iani, Christiansborgimi kalaallit eqqumiitsuliortuinik oqaloqatigiissitsissaaq. Naapinnissami Kalaallit Nunaata nunanut allanut attaveqarnissaani eqqumiitsuliornerup qanoq atuuffeqarnissaanut eqqarsaasersuutinik takorluukkanillu eqqartuisoqassaaq. Tamannaavorlu Aaja Chemnitz Larsenip Kim Leinellu allarnisagaat, piffissarlu sivisunerusoq eqqarsaatigalugu ingerlassami eqqumiitsuliorneq kulturilu tapulluarneqarumaartut neriuutigisaat.

Tassunga atatillugu Aaja Chemnitz Larsen ima oqarpoq: ”Soorlu Kim Leinep oqaatigigaa Kalaallit Nunaata, pingaartumik Danmarkimi, kusanassusersua annertunersualu imaluunniit atugarliuuteqarfiunera nalinginnaasumik eqqarsaatigineqartarput. Tamanna pillugu kalaallit nalinginnaanerusumik takorloorneqalersinnaanissaat pisariaqartinneqarpoq, silaannaap allanngoriartornera atukkatigullu atugarliortut kisiisa pinnagit. Kalaallit Nunaat allarpassuaqarpoq, Kalaallit Nunaatalu ilisimasassartaasa oqaluttuassaasalu siaruarternissaannut periarfissarpassuaqarpoq.”

Neriuutigineqartoq tassavoq Kalaallit Nunaata tamatigoornerusumik oqaluttuarinissaanut eqqumiitsuliortut politikerillu ataatsimoorlutik atugassanik pitsaanerusunik pilersitsinissaat. Kattuffiit/peqatigiiffiillu, soorlu film.gl-kkut, aningaasaliisarnikkut, tusagassiutitigut soqutigineqarnissatigut annertunerusumillu aallaaveqarnissatigut peqatigiinnikkut angusaqartoqarsinnaasoq,taamaasiornikkullu Kalaallit Nunaannut eqqumiitsuliortunullu tigussaasumik naammassisaqartoqarsinnaavoq takutereerpaat.

Annertunerusumik paasisaqarusukkuit attaviuk, Aaja Chemnitz Larsen: Aaja.Larsen@ft.dk / +45 61624667

Print Friendly, PDF & Email