Navigate / search

Aaja ullumikkut Folketingip inersuanit: Statsministerimit ersarissunik akissutisinissara pitsaasumillu oqaloqateqarnissara naatsorsuutigivara

Aaja ullumikkut Folketingip inersuanit: Statsministerimit ersarissunik akissutisinissara pitsaasumillu oqaloqateqarnissara naatsorsuutigivara
Aaja ullumikkut Folketingip inersuanit: Statsministerimit ersarissunik akissutisinissara pitsaasumillu oqaloqateqarnissara naatsorsuutigivara

Ullumikkut nal. 13.00 danskit statsministeriat, Lars Løkke Rasmussen (V), ilaasortanit atlantikup avannaaneersunit siullermeertumik apeqqarissaarfigineqassaaq. Inuit Ataqatigiit ilaasortaatitaat Aaja Chemnitz Larsen apeqqarissaarnermi siulliulluni aperisuussaaq apeqqutissanilu piareeqqallugit.

“Ilaatigut aningaasanut inatsit aqagu sisamanngorpallu taasissutigineqartussaq pillugu apeqqutissaqarpunga. Aamma naalagaaffeqatigiinni uagutsinni siuariartortitsinissamut inuussutissarsiornikkullu inerisaanissamut tunngasunik Statsiministeri qanoq eqqarsaateqarnersoq aperissavara. Tamannarpiarmi naalakkersuinikkut tunngavigisami ersippianngilaq, naak Venstre partiiugaluartoq liberaliusoq naalakkersuisullu tunngavigisaanni Kalaallit Nunaannut/Naalagaaffeqatigiinnermut tunngasut naalakkersuisut siunertatik allaqqissaarsimagaluaraat. Kalaallit Nunaanni suliffissanik nutaanik pilersitsisoqassappat siuariartortitsisoqassappallu Kalaallit Nunaata Danmarkillu suleqatigiiffigisaannik inuussutissarsiornikkut nukittorsaanissaq aningaasaliisinnaasunillu qarmaanissat pisariaqarput”, IA-p folketingimi ilaasortaatitaat oqarpoq.

Apeqqarissaarnermittaaq EU-mi puisit amiinik tunisisinnaanerup ammaanneqarnissaanut nungusaataanngitsumik puisinniarnermit ammit pillugit EU-mi paasisitsiniaasoqarnissaanik ataatsimoorussamik uteriisertoqarnissaanut tunngatillugu Statsministeri aperineqassaaq. 2009-mili EU-mi inerteqqutigineqalermata isertitassaagaluit 350 mio. kr.-t annaaneqarsimasutut nalilerneqarput. Kiisalu EU-mut tunngasutigut Kalaallit Nunaata peqataatinneqarnissaanut tunngasut apeqqutigineqassapput.

Danskit inatsisiliaasa 50-80%-ii EU-miit aalajangerneqartartut nalilerneqarpoq, tassanilu pisani Kalaallit Nunaannut tunngasuni danskillu oqartussaaffigisaanni toqqaannartumik toqqaannanngitsumillu EU-mi inatsisiniit sunniuteqarfigineqartartut arlaliupput.

Apeqqarissaarfik atlantikup ilaasortaanit peqataaffigineqarsinnaasoq kvartalikkaartumik ataasiarluni pisarpoq. Periarfissaq tamanna qinigaaffimmi kingullermi ammaanneqarpoq.

Apeqqarissaarneq Folketingip web-TV-atigut linki una aqqutigalugu malinnaavigineqarsinnaavoq:

http://www.ft.dk/webTV.aspx

Attavissaq: aaja.larsen@ft.dk tlf. +45 33375454

Print Friendly, PDF & Email