Navigate / search

Aaja ukiortaarsiornissamut qaaqqusivoq

Asseq: Inuit Ataqatigiit Folketingimi

Inuit Ataqatigiinnit folketingimi ilaasortaq Aaja Chemnitz Larseni Christiansborgimi januaarip 15-ani nal. 17.00-imit 18.30-ip tungaanut ukiortaarsiortitsinissamut qaaqqusivoq. Ukiortaarsiortitsineq Kalaallit Nunaanneersunut Kalaallit Nunaannullu atassuteqartunut ataatsimoornissamut kajumissaarinermit tunngaveqarpoq. Soqutiginnittut tamarmik tikilluaqqusaapput.

Aaja Chemnitz Larsenip Kalaallit Nunaannit innuttaasunut Christiansborgimi aggeqqusisarnera matunillu ammaasarnera ilungersuussaata ilaanniipput. Kingullermik decembarimi juullerpalaartitsilluni angerlarsimaffeqanngitsunut qaaqqusinermini eqimattat taakku annertusiartortut politikkikkut ukkatarivai.

Ukiortaarsiornissamut innuttaasut tamarmik Kalaallit Nunaannut atassutillit tikilluaqqusaapput tassanilu Danmarkimi kajumissutsiminnik sulisartut amerlaqisut immikkullu suliaqartartut qaaqqusaaqataallutik. Ukiortaarsiortitsineq naalagaaffiup allanut attaveqarneranut tunngakkajuttarpoq, assersuutigalugu dronningip Naalakkersuisullu ukiortaarsiortitsisarneri eqqaassagutsigit taamatut inissisimakkajuttarlutik. Inuit Ataqatigiinniilli ilaasortatta innuttaasut ukkatarinissai pingaartitarivaa – taakkuummata politikkip pinngornerani pingaarnerpaasartut taakkuullutillu politikkinit ingerlanneqartunit malugisaqartuusartut. Allatut oqaatigalugu ukiortaarsiornerup inuinnaat naalakkersueqataanerat takutittarpaa, soorlu aamma Aaja Chemnitz Larsenip suliaa takutinneqartarluni. Suliaq Kalaallit Nunaat sinnerlugu Christiansborgip iluani ingerlanneqartartoq takutinneqartartut ilaanniippoq.

Ukioq nutaaq ukiumut pereersumut eqqarsalersitsisarpoq ukiumullu takkuttussamut pissanganermik pilerisitsilertarluni. Inuit Ataqatigiinnit folketingimi ilaasortaq pisumi oqaaseqalaarnissamut ukiumut 2020-imut ukiunullu tulliuttunut eqqarsaatinik takorluukkanillu avitsinermik imalimmik pilersaaruteqarpoq: “Innuttaasut tunuliaqutitsinnut tikilluaqqunissai pingaaruteqarpoq suliatsinnullu takoqqaarnermit isummertissinnaanissai pingaaruteqarluni. Uannut politikki tassaavoq inuit allat naligalugit ingerlatsineq ukiunullu tulliuttunut politikkikkut takorluukkatsinnik avitseqateqarnissara qilanaarivara”, Aaja Chemnitz Larseni oqarpoq.

Inuit Ataqatigiit ukiortaarsiortitsinermi katersuutsitsinissaq kissaatigivaat kalaallinullu Danmarkimi najugalinnut ataqatigiinnermik pilersitsinissaq kissaatigalugu. Taakku saniatigut innuttaasut Kalaallit Nunaannut atassuteqartut ataatsimoortikkusullugillu ataqatigiinnermik pilersitsiffigerusuppai.

Ukiortaarsiornermi mamartunik sassaalliuteqartoqassaaq, soorlu aamma Aavaat ukiumut nutaamut isernerput tunngavigalugu erinarsussallutik. Taakku saniatigut nipilersornerup tungaatigut tupaallannartumik takkuttoqassaaq tamannalu folketingimi ilaasortap saqqummiunnissaa assut qilanaarivaa.

Ukiortaarsiornissamut inissat killeqarput. Ilaaneq akeqanngilaq nalunaarnerlu billetto aqqutigalugu allanneqarsinnaalluni:

https://billetto.dk/e/kalaallit-nunaat-folketingimi-ukiortaarsiorneq-2020-gronland-i-folketinget-nytarskur-2020-billetter-399381

Facebook-ikkut aamma ukiortaarsiornissaq link-i una malillugu paasisaqarfigineqarnerusinnaavoq: https://www.facebook.com/events/734571780380020/

Print Friendly, PDF & Email