fbpx

Aaja: Saamit qilaataat utertinneqarmat alloriarneq eqqortuullunilu pingaaruteqartuuvoq

Allattoq: Aaja Chemnitz Larsen

Ukiut 300-t sinnerlugit saamit qilaataat qaqutigoorluinnartoq Danmarkimi Nationalmuseumimiissimavoq. Qilaat taanna angakkumit Anders Poulsenimit pigineqarpoq, tassa taassuma parnaarussaannginnerani tassanilu parnaarussamit allamit toqutaannginnerani arsaarinnissutaasimasoq. Saamit oqaluttuarisaanerannut immikkut pingaaruteqarluni attuumassuteqarpoq saaminullu kulturikkut anersaakkullu pingaaruteqarluinnartuulluni.

Kulturikkut kingornussat inuit qanoq imminnut isiginerannut kinaassusaannullu pingaaruteqartuupput, siornalu qilaatip Nationalmuseumimut atukkiussimaneqarnera qaangiummat utertinneqarnissaa pissusissamisuuginnarpoq. Taamaattumik Arktiske Parlamentarikerini siulittaasutut, Sametingillu Siulittaasorisimasaa Aili Keskitalo suleqatigilluarlugu, Danmarkip Nationalmuseumiani pisortaq, Rane Willerslev aamma kulturministeri Ane Halsboe-Jørgensen, qilaat piginnittuinut nunaanullu utertinneqassasoq ersarissumik kajumissaarsimavagut. Suliamut piffissaq sivisulaartoq atorneqarpoq maannakkulli qilaatip Norgemut utertinneqarnissaa kulturministeriamiit aalajangiunneqarsimavoq.

”Saamit sinnerlugit qilaatip piginnittuminut utertinneqarnissaa nuannaarutigivara, ilanngullugulu danskit tungaanniit taamatut kulturikkut pigisat oqaluttuarisaanermi pingaarutillit utertinneqarnissaannut ammanerat suleqataarusussuseqarnerallu aammattaaq nuannaarutigalugu.”

Qilaatip utertinneqarnera kulturikkut pigisatta immikkoorutillup ataatsimoorussaasullu qanoq eqqartorneqarnissaa qanorlu pineqarnissaa eqqarsaatigalugit ajunngitsup tungaanut alloriarneruvoq, Inuit Ataqatigiinnilu pigisat suulluunniit uterfissaminnut apuuttarnissaannut sulissuteqartuaannassaagut ikiuussinnaagaangattalu ikiuuttuaannassalluta:

”Pingaartumik nunat inuii nunasiaataasimasut pineqartillugit sutigulluunniit ikiuunnissatsinnut akisussaaffeqarpugut, uagummi aamma taamatorluinnaq ikiortariaqarsinnaavugut. Taamaattumillu qilaat qaqutigoortoq pillugu pisinnaasarput naapertorlugu saaminut ikiuussinnaanerput uanni pissusissamisuuginnarpoq.”

del på de sociale medier

Share on facebook
Share on twitter
Share on linkedin