fbpx

Aaja: Politiit pikkorissut akissarsiassat inissilluarsimannginneri pissutigalugit annaasarpagut

Tusagassiuutinut nalunaarut
Aaja Chemnitz Larsenimit allataq, Folketingimi IA aqqutigalugu ilaasortaq

 

Folketingimi ilaasortaq Aaja Chemnitz Larse (IA) sap. ak. kingulliup siuliani Sisimiunut ilisimasassarsiorluni angalavoq, angalanermi susassaqarfiit arlallit ataatsimeeqatigai, ilaatigut eqqartuussisoqarnermut tunngasunik suliallit naapeqatigalugit. Aaja eqqartuussivimmit, isertitsivimmit politiiniillu Sisimiuniittunik aallartitanik naapitsivoq. Taakku eqqaassanngikkaanni Aajap Qeqqatata Kommuniani borgemesteri Malik Berthelsen ataatsimeeqatigaa, Tiliumi innarluutillit illersuisuat Anja Hynne Nielsen, Arctic Circle FabLAB aamma Arctic Circle Business naapeqatigalugit. Aajap Sisimiuni GUX-imi atuartut 100-rujut missaanni amerlassusillit saqqummiivigai innuttaasunullu ataatsimiisitsilluni.

Ataatsimiinnerni sammisani eqqaaneqartuartoq tassaavoq Kangerlussuarmi attatitsiinnarusunneq, Aajallu tamanna sulissutigerusuppaa, erseqqissarluguli Kalaallit Nunaata Kangerlussuup ingerlatiinnarnissaa akisussaaffigigaa, Nuummi Ilulissanilu ukiuni tullerni timmisartoqarfiit ammarpata tamanna Nunatsinnit qulakkeerneqartariaqassammat.

Akissarsiassanik qaffaaneq pingaartitani siullersaassaaq

Aajap Folketingimi pingaartitaasa ilagaat politiit isertitsivimmilu politiit suliaminnut naleqquttumik akissarsiaqarnissaannut qulakkiinissaq, soorlu aamma meeqqanut kinguaassiuutitigut atornerluinermut akiuinissaq aamma politikkikkut Aajamut ukkatarineqarluarsimasoq.

”Politeertatta Kalaallit Nunaanni inuiaqatigiinni suliaannut ataqqinnittorujussuuvunga. Assigiimmik suliaqarnermi assigiimmik akissarsinissaq ilungersuussaraara nuannaarutigalugulu qineqqusaarnermi neriorsuut annertunerusumik angusaqarfigisimagatsigu. Sulili 2023-p kingorna atajuartumik aaqqiisoqarnissaanik ilungersorlunga suliniuteqarpunga, taamanikkussamut aningaasat nunguttussaammata, taamaalioruttami politiit Nunatsinniittut nalussanngilaat suleqatitik Danmarkimiittut Savalimmiuniittullu assigalugit naleqqatigiillutik suliartortarlutik.”

”Isertitsivinni politiit misigisarsimavaat suleqatitik suliffimminnut utertartut, taamaattorli politiit attatitsiinnarnissaq ajornakusoortippaat akissarsianik qaffaaniarneq ilaannakortumik inernilerneqarnikuummat. Isertitsivimmi politiit ukiut sisamat ingerlaneranni 40 mio. koruunit missaannik akissarsiatik qaffatsinnikuuaat, politiinulli taamaallaat 10 mio. koruuninik ukiut sisamat ingerlaneranni qaffaaviginnittoqarsimalluni. Politiit kalaallit qallunaallu assigiinngitsumik pineqartarneri ajornartorsiutaavoq, suliaat assigiimmik naleqarmata ilaatigullu Kalaallit Nunaanni politiit suliaat annertunerusarlutik. Taamaammat politiit suli pikkorissunik attatitsiinnarnissartik ajornartorsiutigisarpaat suliffinni allani akissarsiat annertunerusarneri peqqutaallutik allanik suliffittaartarmata. Ataatsimut qaffassassat eqqarsaatigalugit, ass. eqqartuussivinni allatsit, HK-mi atorfillit il. il. eqqartuussivimmut atassutillit, oqarsinnaavugut suli pingaarutilinnik suliniutissaqarpugut”.

Aaja Chemnitz Larsen, tlf. +45 61624667, aaja.larsen@ft.dk

del på de sociale medier

Share on facebook
Share on twitter
Share on linkedin