Navigate / search

Aaja nunat issittumiittut pillugit Islandimi ataatsimeersuarnermi peqataalluarpoq

Aaja nunat issittumiittut pillugit Islandimi ataatsimeersuarnermi peqataalluarpoq
Aaja nunat issittumiittut pillugit Islandimi ataatsimeersuarnermi peqataalluarpoq

Ulluni makkunani ileqquulersimasimasumik ataatsimeersuartarneq Arctic Circle Islandip pingaarnertut illoqarfiani, Reykjavik-imi, ingerlanneqarpoq. Ataatsimeersuartarneq nunani issittuni ataatsimeersuartarnerit annersarilernikuuaat, 2000-init amerlanerusut nunat 50-it sinnerlugit aggerfillit peqataasoraralugit. Issittoq pillugu suliaqartunit tamanit ussagarneqarluartoq. Aammaarluni ukioq manna Kalaallit Nunaat peqataatitaqarluarpoq, 60-it sinnerlugit peqataaniarlutik nalunaarsimallutik. Taakku akornanniipput Inatsisartut ataatsimiititaliaat arlallit aammalu Inuit Ataqatigiit folketingimi ilaasortaatitaat Aaja Chemnitz Larsen.

Ukioq manna Aaja ataatsimeersuarnerup ingerlanerani oqallinnerni ataatsimiinnernilu arlarlinni peqataavoq. Tallimanngornermi Aaja aaqqissuussamut iluatsilluartumut Folketingip issittoq pillugu suleqatigiiffianit aaqqissorneqartumut qaaqqusisooqataavoq, tamatumalu kingorna Naalagaaffeqatigiit issittoq pillugu ambassadørertaavat Hanne Fugl Eskjær ataatsimeeqatigalugu. Ullumi arfininngornermi Aaja pingaarnertut saqqummmiisarfimmit Kalaallit Nunaanni atasinnaasumik ineriartortitsineq pillugu oqallitsinneqartunut ilaavoq.

“Issittoq soqutigineqaqaaq ukiunili makkunani Kalaallit Nunaannut Issittumullu soqutiginninneq annertunerujartuinnartoq takussaavoq. Tamanna aamma maani Arctic Circle-mi takussaavoq”, Aaja ukioq manna Arctic Circle-mut peqataanini pillugu oqarpoq.

Imatullu erseqqissaavoq: “Issittumut soqutiginninneq Kalaallit Nunaanni inuutissarsiutinik ineriartitsinermut nunanillu allanit aningaasaliffigineqarusussusermut kivitseqataasinnaasutut isigisariaqarparput. Ilutigisaanik Kalaallit Nunaanni ilinniagallit amerliartortinnissaat aatsaat taama pingaaruteqartigaaq. Takornariaqarnerup iluani, aatsitassarsiornermi nutaaliorlunilu suliffissanut neqeroorutigisinnaasariaqarpagut sulisussat piginnaasaqarluartut nammineq nunatsinneersut. Meeqqat atuarfiata nukittorsarneratigut amerlanerillu ilinniarsimasunngornissaannik aqqutissiuussinikkut ilinniagartuut ilinniaqanngitsullu suliffissaqarnissaat qulakkiissavarput”.

Siusinnerusukkut Inuit Ataqatigiit folketingimut ilaasortaatitaata, Sara Olsvigip, 2014 suliniutigaa Folketingimi issittoq pillugu suleqatigiiffeqalissasoq, tamannalu kingorna piviusunngorpoq. Folketingimi ilaasortat Atlantikup Avannaaneersut sisamat tamarmik suleqatigiiffimmut ilaasortaapput ukioq mannalu Arctic Circle-mi tallimanngormat ualikkut oqallinnissamik aaqqisuussaqarput, ilasseqatigiinnermik Atlantikup Avannaanit mamartulianik sassaalliiffiusumik. Apeqqorissut 70-t sinnerlugit aaqqissuussamut peqataapput.

Arfininngornermi Aaja Chemnitz Larsen (IA) qinnuigineqarsimavoq pingaarnertut saqqummiisarfimmi peqataasut 2000-t tusarnaartoralugit oqallitsitsinissamut peqataaqqullugu. Oqallinnermik aaqqissuisuupput Guggenheim Partners aamma WWF-ip issittoq pillugu allaffeqarfiat.

Takukkit ilanngussat: Assit aamma oqallinnerni marlunni Aaja Chemnitz Larsenip oqaaseqarfigisai. Oqaatsit nalituujupput.

Arctic Circle pillugu ugguna paasisaqarnerusinnaavutit: http://www.arcticcircle.org/ Attavissaq: Aaja.Larsen@ft.dk imaluunnit oqarasuaatikkut +45 61624667.

Print Friendly, PDF & Email