fbpx

AAJA KALAALLINI SIULLERSAALLUNI FOLKEMØDE-MIT DIALOGPRIS-IMIK TAANEQARTARTUMUT PIUKKUNNEQARPOQ

Folketingimi ilaasortaq Aaja Chemnitz Larseni Folkemøde-mi ukiumut ingerlanneqartartumi nuannarineqarluartumi Dialogpris-imut piukkunneqartunut tallimanut ilanngunneqarpoq. Politikerinut politikkimullu soqutigisalinnut allanut Folkemødet Roskilde Festivalitut assersuunneqarsinnaavoq. Aaja kalaallini siullersaalluni piukkuneqarpoq, siornatigullu ilaatigut Uffe Elbæki aamma Pia Olsen Dyhri piukkunneqareerlutik toqqagaanikuullutik. Folkemødet juunip 17-anit 19-ata tungaanut ingerlanneqassaaq, dialogpris-ilu unnummi naggataarfiusumi 19-ani hovescene-mit Allingemiittumit, Bornholmimit tunniunneqassalluni.

 

– Nuannerluinnartumik tupaallannarpoq. Kalaallit Nunaanneersunik piukkussaqartoqarnikuunngisaannarpoq. Nunannut sinniisutut suliaqarninnut taamatut akuersaarneqarnera tulluunnartutut tiguara. Uanga isinni piukkunneqarnera uannut piukkussinerinnarmik imaqanngilaq, Kalaallit Nunaannilli akuersaarnermik imaqarluni qanorlu politikkikkut qitiusumik inissisimalersimanitsinnik takutitsisuulluni. Piukkussinermi ammasumik oqaloqatigiinnissamut ukkataqarsimanera erserpoq malugineqarsimallunilu, tamannalu allannguisimasutut aamma malugineqarsimanera erserluni. Politikki tassaammat oqalunnerinnaanngitsoq, tusarnaasinnaanerli oqaloqatigiinnikkullu inerniliinissamik ujartuisinnaaneq. Taamaammat Dialogpris-i uannut immikkut isumaqarluinnarpoq, uanga nipituuliorlunga saaffiginnittuunngikkaluarlunga inernissanik iliuusissanillu tamanut iluaqutaasinnaasunik ukkataqarlunga sulisarsimagama.

 

– Kalaallit Nunaata Danmarkillu akornanni politikkimut tunngatigullu oqaloqatigiissinnaaneq qitiulluinnarpoq, pingaartumik piffissami uani Issittumut soqutiginninnerup annertusiartornerani akerleriinnernullu pisinnaasunut ammaassisoqarnerani. Taamaammat Kalaallit Nunaannit sorusunnerluta kinguneqartussamik isumaliorluta aaliangersimasumillu politikkeqarluta oqaloqateqarsinnaanerput pingaaruteqarpoq. Tassani isumaqarpunga oqaloqatigiinnikkut angusaqarfiunerpaasinnaasoq, taamatullu uagut nunarsuarmi inissisimaffitsinni eqqissinermik ineriartornermillu sullissineq ingerlallugu pigutta angusaqarnerunissaq nalilerpara. Politikkip iluani suliamma ingerlaartut ilaat tassaavoq Kalaallit Nunaat mutiusoq Danmarkimit ilisimaneqarnerulernissaa. Allatut oqaatigalugu Kalaallit Nunaata naliginnaanerulernissaa sulissutigaara. Taamaaliornermi suleqateqarnissaq oqinnerulertussaavoq, ataatsimullu suliassatsinnut tatiginneqatigiinnissaq pisariaqartinneqartoq pilersinneqarsinnaalluni.

 

– Piukkunneqarneq ataqqineqaatitut tiguara, kisianni neriuppunga inuit uanga qinissagaannga. Tapersersorneqarluareeqaanga, taamaammallu tamassinnut qujanarusuppunga. Piukkunneqartunut allanut Danmarkimullu takutikkusunnarpoq uagut aamma Kalaallit Nunaanneersuusugut qanoq immitsinnut tapersersullaqqitsiginersugut.

 

Piukkunneqartut allat tassaapput Tommy Ahlers, Mona Juul, Stinus Lindgreen aamma Hans Stavnsager.

Dialogprisen juunip 19-ani nal. 19 Folkemøde-mi Bornholmimi pisussami tunniunneqassaaq.

Link-i una malillugu Aaja qinerneqarsinnaavoq: http://www.dialogprisen.dk/

del på de sociale medier

Share on facebook
Share on twitter
Share on linkedin