Navigate / search

Aaja inooqatigiinnut tunngatillugu isumaqatigiinniarnerni oqaluttuarisaanermi kalaallinit aatsaat ilaaffigineqartumut aqqutissiuivoq

Asseq: Inuit Ataqatigiit

Marlunngorneq oktobarip 22-at 2019

Danskit naalakkersuisui ullumikkut inooqatigiinnut tunngatillugu isumaqatigiinniarnerit aallartippaat aatsaallu nutaasumik folketingimi ilaasortaq Aaja Chemnitz Larseni (IA) isumaqatigiinniarnerni ilaalluni. Tamanna Social- aamma Indenrigsministeriami ingerlanneqarpoq. Inooqatigiinnut tunngatillugu isumaqatigiinniarnerni ilaaneq Aajamit folketingimi Kalaallit Nunaannit ilaasoqarnerunissaannit sulissuteqarnikuuneranit inerneruvoq. Tamanna angusassamik toraagaqarpaluttumik ingerlatsilluni piviusunngortinnikuuaa.

”Inuit Ataqatigiinnit aningaasartuutissanut aamma inooqatigiinnut tunngatillugu isumaqatigiinniarnernut ilaasoqarnera folketingimi naligiimmik ilaalernissamut aqqummi qanillinninneruvoq taamaallunilu danskit folketingimi ilaasortaannut naligeeqatigiimmik ilaasinnaanermut qanillisaataalluni. Naak danskit naalakkersuisui isigiinnarnissamut inissisimanerput killeqartikkusukkaluaraat uanga imminut killilernanga oqalliseqataavunga isumaqatigiinniarnermullu ilaallunga. Siumut aamma isumaqatigiinniarnerni allani taamatut ingerlasarumaarpunga”, Folketingimi ilaasortaq Aaja Chemnitz Larseni oqarpoq.

Inuit Ataqatigiit meeqqanut inuusuttunullu Kalaallit Nunaanniittunut atugarliortunut ikiuinissaq ukkatarisarnikuuaat partiilu siornatigut Danmarkimit 80 millionit koruuninik pisariaqartitsinertik oqaatigisareernikuullugu. Maanna naalakkersuisut aningaasat taamak amerlassusillit meeqqanut inuusuttunullu kinguaassiutitigut atornerlunneqarsimasunut tunniusserusupput. Piviusoq malillugu Inuit Ataqatigiit meeqqanut ikiuineq meeqqat illuanni atorneqarnissaat siunnersuutiginikuuaat, soorlu aamma angajoqqaatut meeraaqqanut piginnaaneqarnerunissamut suliniuteqarnissamik siunnersuuteqarnikuullutik.

Taakku saniatigut Inuit Ataqatigiit siusinaarlutik utoqqalinersiutilinnut suliniuteqartoqarnissaa kissaatigisarnikuuaat – pingaartumik Kalaallit Nunaannit Danmarkimut nuuttartut eqqarsaatigalugit. Inuit Ataqatigiit aamma meeraanermi atornerlunneqarnikunut ikiuinissaq Danmarkimilu kalaallinik atugarliortunik ikiuinissaq eqqartortarnikuuaat, soorlu aamma angerlarsimaffeqanngitsut Danmarkimi amerliartortut sulissutigerusuttarnikuullugit.

Inooqatigiinnut tunngatillugu isumaqatigiinniarnerit saniatigut Folketingimi ilaasortap Aaja Chemnitz Larsenip politiit, pinerluttunik isumaginnittoqarfik, illersornissaqarfik aamma tusagassiuutinut isumaqatigiissuteqarnermi eqqumiitsuliortunullu tapersersuinernut tunngasuni isumaqatigiinniarnernut ilaasarnissaminut qinnuteqarnikuuvoq. 

Attavissaq: Aaja Chemnitz Larsen, aaja.larsen@ft.dk tlf. 61624667

Print Friendly, PDF & Email